Cylch gorchwyl

Bydd y Bwrdd Cynghori Cenedlaethol ar Roi Diwedd ar Ddigartrefedd yn rhoi cyngor i'r Gweinidog Newid Hinsawdd ar ddatblygu polisi mewn perthynas â'r sector Atal Digartrefedd a Chymorth Tai.

Prif ddiben y Bwrdd fydd rhoi cyngor arbenigol a thraws-sector i'r Gweinidog ar effeithiolrwydd yr ymateb polisi traws-lywodraethol o ran atal a mynd i'r afael â digartrefedd a darparu atebion effeithiol ynghylch cymorth tai. 

Bydd y Bwrdd yn goruchwylio ac yn llywio'r gwaith o ddatblygu, cyflawni a rhoi ar waith y cynllun gweithredu sy'n deillio o'r argymhellion a wnaed gan y Grŵp Gweithredu ar Ddigartrefedd a bydd yn sicrhau bod yr agenda trawsnewid yn symud ymlaen mewn da bryd, fel y nodir yn strategaeth Llywodraeth Cymru ar gyfer atal a chael gwared ar ddigartrefedd.

Swyddogaeth y Bwrdd fydd:

• cynghori'r Gweinidog ar y cyfeiriad strategol ar gyfer datblygu polisi i atal a mynd i'r afael â digartrefedd a darparu atebion effeithiol ynghylch cymorth tai;
• cynghori'r Gweinidog ar farn y sector ynghylch effeithiolrwydd cyllid grant sy'n gysylltiedig ag atal digartrefedd yng nghyd-destun cyflawni eu hamcanion. Mae hyn yn cynnwys y Grant Cymorth Tai a'r Grant Atal Digartrefedd;
• datblygu mecanweithiau i allu gwrando ar farn a phrofiadau pobl sy'n defnyddio gwasanaethau cymorth tai, a'u defnyddio i lywio'r cyngor a ddarperir i'r Gweinidog;
• sicrhau bod cyngor yn ystyried Cynllun Gweithredu Cydraddoldebb Hiliol Llywodraeth Cymru a'i fod yn adlewyrchu natur amrywiol cymdeithas ac yn mynd i'r afael â'r anghydraddoldebau y mae rhai grwpiau yn eu hwynebu;
• ystyried data a thystiolaeth ymchwil a meincnodi cenedlaethol a rhyngwladol perthnasol, a'u defnyddio i lywio'r cyngor a ddarperir i'r Gweinidog;
• ystyried materion traws-lywodraethol a darparu cyngor ar draws Gweinidogion, sicrhau bod cyngor polisi yn ystyried ac yn cael ei weld drwy lens iechyd y boblogaeth; a
• darparu cyngor ad hoc a chyflawni darnau penodol o waith yn unol â chais y Gweinidog.  

• Corff cynghori yw’r Bwrdd ac o’r herwydd rhaid iddo gael ei rwymo gan ddisgwyliadau rhesymol corff o'r fath.  Mae'n bwysig cydnabod nad oes gan y Bwrdd unrhyw bwerau na swyddogaethau statudol.
• Mae'r Bwrdd yn cynghori Llywodraeth Cymru o fewn y cylch gwaith y cytunwyd arno ar ei gyfer gan y Gweinidog Newid Hinsawdd. Bydd y Bwrdd yn rhoi'r wybodaeth ddiweddaraf o bob cyfarfod i'r Gweinidog, gan gynnwys unrhyw gyngor i'w ystyried gan y Gweinidog. 
• Caiff y Bwrdd benderfynu a ddylid sefydlu is-grwpiau a chyfethol aelodau yn ôl yr amgylchiadau. Caiff ddewis ffurfio is-grwpiau i edrych ar dasgau penodol, e.e. lle mae angen ffocws arbennig o ran polisi neu gyflawni ond nad oes angen i’r Bwrdd cyfan ganolbwyntio arno, neu ar feysydd gwaith trawsbynciol. Bydd y Bwrdd, mewn cytundeb â'r Cadeirydd, yn penderfynu sut i ddyrannu gwaith a chyfrifoldebau ychwanegol yn barhaus.  Bydd pob is-grŵp/grŵp gorchwyl a gorffen yn adrodd i'r Bwrdd.

• Penodir aelodau fel cynrychiolydd eu sector penodol fel yr amlinellir yn Atodiad 1.
• Disgwylir i’r Aelodau hysbysu’r Cadeirydd pan fo gwrthdaro buddiannau posibl yn ymwneud ag eitem benodol ar yr agenda.
• Er mwyn sicrhau dilyniant, dim ond mewn amgylchiadau eithriadol y caniateir i ddirprwyon ddod i gyfarfodydd. Bydd angen i'r Cadeirydd roi caniatâd ymlaen llaw i'r Aelodau enwebu dirprwy i fod yn bresennol ar eu rhan.
• Bydd yn ofynnol i draean o aelodau’r Bwrdd fod yn bresennol i fod yn gworwm.
• Bydd aelodaeth y Bwrdd yn cael ei hadolygu'n flynyddol i sicrhau ei fod yn addas i'r diben.
• Nid oes tâl am aelodaeth.  Bydd unrhyw dreuliau teithio a chynhaliaeth yr eir iddynt gan aelodau annibynnol a defnyddwyr gwasanaeth y Bwrdd yn cael eu had-dalu gan yr Is-adran Polisi Tai.
• Defnyddir fideo gynadledda a/neu gynadledda sain i hwyluso gwell presenoldeb a lleihau amser teithio. Byddwn yn sicrhau y byddwn yn cyd-fynd â gofynion Safonau'r Gymraeg ac yn sefydlu dewis iaith ar gyfer cyfrannu.

Bydd y bwrdd yn cyfarfod o leiaf bedair gwaith y flwyddyn, gan gynnwys diwrnod cynllunio ar ddechrau'r flwyddyn i gytuno ar raglen waith y Bwrdd. Cynhelir cyfarfodydd ychwanegol yn ôl yr angen.

Bydd yr Is-adran Polisi Tai yn Llywodraeth Cymru yn darparu cymorth gweinyddol ac ysgrifenyddol i'r Bwrdd a bydd yn gweithredu fel pwynt cydgysylltu canolog ar gyfer rhaeadru a dosbarthu deunyddiau ar gyfer cyfarfodydd a dogfennau eraill. Bydd y Cadeirydd yn pennu'r agenda, gan gynnwys y papurau sy'n ofynnol, ar gyfer pob cyfarfod, gan ystyried unrhyw awgrymiadau neu geisiadau gan aelodau unigol.