Mae Lesley Griffiths, wedi croesawu bwriad Llywodraeth UDA i gyhoeddi ymgynghoriad ar godi’r cyfyngiadau ar fewnforio cig oen o Brydain.
Cyhoeddwyd y cynnwys hwn dan weinyddiaeth Llywodraeth Cymru 2016 i 2021
Mae’r gwaharddiad ar fewnforio cig oen o Brydain i UDA yn dyddio o 1996 yn sgil y clefyd Enseffalopathi Sbyngffurf Buchol (BSE). Cafodd y gwaharddiad ei estyn mewn rhai gwledydd i gig dafad gan fod clefyd o’r un teulu – Enseffalopathïau Sbyngffurf Trosglwyddadwy (TSE) - yn effeithio ar ddefaid.
Amcan yr ymgynghoriad yw gwneud deddfwriaeth UDA yn gyson â chyngor corff iechyd y byd ar iechyd anifeiliaid nad yw TSE yn berygl i iechyd pobl.
Mae’r ymgynghoriad yn gam o’r ffordd at godi’r gwaharddiad ar allforio cig oen o Gymru i UDA. Mae’n dilyn trafodaethau maith rhwng gweinidogion Llywodraethau Cymru a’r Deyrnas Unedig a swyddogion o Adran Amaeth UDA (USDA). Wythnos ddiwethaf, croesawodd Ysgrifennydd y Cabinet counselor amaeth USDA, Stan Phillips i’r Sioe Fawr.
Meddai Ysgrifennydd y Cabinet:
“Rwy’n llwyr gefnogi’r datblygiad hwn, sy’n paratoi’r ffordd ar gyfer codi’r gwaharddiad ar allforio cig oen o Gymru i UDA. Rydyn ni wedi gweithio’n ddiflino’n ddiweddar i argyhoeddi Llywodraeth UDA fod ein cig oen o’r safon uchaf ac ar ben hynny, yn ddiogel i’w fwyta. Pwysleisiais y pwynt hwnnw wrth Stan Phillips prin wythnos yn ôl yn y Sioe Fawr. Byddwn yn para i drafod y pwnc dros yr wythnosau a’r misoedd nesaf i sicrhau ein bod yn dod i gasgliad llwyddiannus.
“Yn dilyn penderfyniad y DU i adael yr Undeb Ewropeaidd, rhaid chwilio am fargeinion newydd gyda marchnadoedd ym mhob cwr o’r byd. Mae UDA yn farchnad anferth gyda 300 miliwn o gwsmeriaid posibl. Gallai’r datblygiad hwn fod yn gyfle euraid inni ddangos ein cig oen o safon byd i gynulleidfa newydd gan roi hwb anferth yr un pryd i ddiwydiant cig coch Cymru.”