Y Prif Weinidog yn arwain cyfarfod cyntaf y Grŵp Cynghori ar Ewrop

Bydd y grŵp, dan gadeiryddiaeth Ysgrifennydd y Cabinet dros Gyllid a Llywodraeth Leol, Mark Drakeford, yn darparu cyngor i Lywodraeth Cymru ar yr heriau a’r cyfleoedd sy’n codi yn sgil ymadawiad y DU o’r UE. Bydd hefyd yn ystyried sut y gall Cymru barhau i weithio’n gadarnhaol gydag Ewrop.

Mae’r Grŵp Cynghori yn gyfuniad o bobl â phrofiad a dealltwriaeth fanwl o faterion Ewropeaidd, gan gynnwys Aelodau o Senedd Ewrop, arweinwyr busnes a chynrychiolwyr o brifysgolion, colegau, undebau llafur, y byd amaeth, gwasanaethau cyhoeddus a’r trydydd sector.

Wrth siarad cyn y cyfarfod, dywedodd y Prif Weinidog: 

“Rhaid i Gymru, ynghyd â phob un o’r gwledydd datganoledig, chwarae rhan lawn, weithredol yn y trafodaethau ar ymadawiad y Deyrnas Unedig o’r Undeb Ewropeaidd er mwyn sicrhau bod ein buddiannau yn cael eu gwarchod yn llawn. Mae hyn yn cynnwys diogelu mynediad llawn a dilyffethair at y Farchnad Sengl er mwyn diogelu ein heconomi, a sicrhau ar yr un pryd nad yw gadael yr Undeb Ewropeaidd yn cael ei ddefnyddio fel cyfle i gymryd cam yn ôl ar faterion pwysig fel gwarchod hawliau gweithwyr.  

“Mae gadael yr Undeb Ewropeaidd yn fenter gwbl newydd i’r Deyrnas Unedig ac mae’n hanfodol i ni ystyried amrywiol safbwyntiau ynghylch ffyrdd o sicrhau’r canlyniad gorau posibl i Gymru.”

Dywedodd Mark Drakeford: 

“Mae gan y Grŵp Cynghori gyfoeth o brofiad ac arbenigedd a fydd yn ein helpu i lunio dyfodol cadarnhaol i Gymru y tu allan i’r Undeb Ewropeaidd, ond yn gadarn o fewn Ewrop.

“Mae ffyniant a chyfeiriad Cymru yn y dyfodol yn y fantol. Mae’r materion hyn yn llawer dyfnach na buddiannau unrhyw blaid neu Lywodraeth benodol. Does dim modd i unrhyw unigolyn neu grŵp hawlio monopoli ar syniadau da, ac rydyn ni’n croesawu’r cyfle hwn i fanteisio ar gyngor y grŵp.”

Aelodau’r Grŵp Cynghori ar Ewrop:

• Y Cynghorydd Phil Bale, Arweinydd Cyngor Dinas Caerdydd
• Kevin Crofton, Llywydd, SPTS Technologies Ltd 
• Yr Athro Richard B. Davies, Is-ganghellor, Prifysgol Abertawe 
• Jill Evans ASE, Aelod o Senedd Ewrop
• Nathan Gill ASE, Aelod o Senedd Ewrop
• David Jones OBE, Pennaeth a Phrif Weithredwr, Coleg Cambria
• Syr Emyr Jones Parry, Llywydd, Prifysgol Aberystwyth 
• Dr Hywel Ceri Jones, Cyn-lysgennad cyllid yr UE yng Nghymru
• Tom Jones OBE, Pwyllgor Economaidd a Chymdeithasol Ewrop 
• Y Gwir Anrhydeddus Arglwydd Kinnock, Cyn is-lywydd y Comisiwn Ewropeaidd
• Martin Mansfield, Ysgrifennydd Cyffredinol, TUC Cymru
• Ruth Marks MBE, Prif Weithredwr, CGGC
• Y Farwnes Eluned Morgan AC, Cyn-aelod o Senedd Ewrop 
• William Powell, Cadeirydd y Grŵp Trawsbleidiol ar Ewrop yn ystod y pedwerydd Cynulliad
• Yr Athro Colin Riordan, Llywydd ac Is-ganghellor, Prifysgol Caerdydd
• Kevin Roberts, Cadeirydd y Bwrdd Partneriaeth Amaeth
• Dr Kay Swinburne ASE, Aelod o Senedd Ewrop
• Derek Vaughan ASE, Aelod o Senedd Ewrop
• Emma Watkins, Cyfarwyddwr, CBI Cymru