Amcangyfrifon aelwydydd: canol-2018

Amcangyfrif o nifer yr aelwydydd yng Nghymru

Ers canol 1991, mae nifer yr aelwydydd wedi cynyddu 22.1% o 1.11 miliwn i 1.36 miliwn yng nghanol 2018.

Rhwng canol 2017 a chanol 2018, mae’r amcangyfrif o nifer yr aelwydydd yng Nghymru wedi cynyddu 8,800 (0.7%) i 1.36 miliwn.

Roedd y cynnydd cyffredinol yn bennaf o ganlyniad i aelwydydd un-person a dau-berson, sy'n parhau i fod y mathau mwyaf cyffredin o aelwyd yng Nghymru, yn seiliedig ar yr amcangyfrifon hyn.

Amcangyfrifon o nifer yr aelwydydd yn ôl awdurdod lleol

Bu cynnydd yn yr amcangyfrif o nifer yr aelwydydd ymhob awdurdod lleol yng Nghymru rhwng canol 2017 a chanol 2018. Gwelwyd y cynnydd mwyaf yng Nghaerdydd, Casnewydd a Rhondda Cynon Taf.

Poblogaeth aelwydydd preifat

Ar lefel Cymru mae amcangyfrif y boblogaeth aelwydydd preifat wedi cynyddu tua 13,200 rhwng canol 2017 a chanol 2018.

Gwelodd Ceredigion a Phowys ostyngiad yn eu poblogaeth aelwydydd preifat.

Amcangyfrifon o faint cyfartalog aelwydydd

Mae amcangyfrifon o faint cyfartalog aelwydydd Cymru wedi bod yn gostwng yn gyson. Yng nghanol 2018 maint cyfartalog aelwyd yng Nghymru oedd 2.27 person o gymharu â 2.52 yng nghanol 1991.

Mae pob awdurdod lleol wedi gweld gostyngiad yn ei hamcangyfrif o faint cyfartalog aelwydydd ers 2011.