Crynodeb o Ddata ynghylch Stoc Welyau Cymru: y sefyllfa ym mis Mehefin 2022

Mae gwybodaeth am Stoc Welyau Llety yng Nghymru yn allweddol i gael darlun cywir o gyfansoddiad un o'r rhannau pwysicaf o'r Economi Ymwelwyr yng Nghymru. Mae'r wybodaeth hon yn bwysig at ddibenion cynllunio a buddsoddi, yn arbennig ar lefelau lleol. Gall hefyd fod yn ddefnyddiol wrth gynllunio digwyddiadau mawr ac mae wedi cael ei defnyddio yn yr ymateb i bandemig COVID-19, er enghraifft wrth asesu'r cyflenwad o lety i weithwyr allweddol a phobl agored i niwed yn ystod cyfnodau'r cyfyngiadau symud.

Ers sawl blwyddyn mae arolygon Stoc Welyau Llety yn faes lle ceir cydweithrediad cadarnhaol rhwng Llywodraeth Cymru, Awdurdodau Lleol a Phartneriaethau Twristiaeth Rhanbarthol. Mae'r arolygon wedi'u hariannu ar y cyd ac wedi'u cynnal yn unol â dull safonol (gan ddefnyddio holiaduron a diffiniadau safonol), gyda'r canlyniadau yn cael eu darparu gan Awdurdodau Lleol unigol i'w coladu'n ganolog gan Lywodraeth Cymru. 

Mae'r darlun o ran stoc welyau llety yn newid drwy'r amser wrth i leoliadau newydd agor neu gau, ehangu neu leihau, uwchraddio neu arallgyfeirio. Felly, dim ond y ’ciplun’ gorau sydd ar gael o'r sefyllfa ar adeg benodol y gall y cofnodion ei roi. Ar y cyfan, caiff cofnodion eu diweddaru'n barhaus gan yr Awdurdodau Lleol, gydag arolwg llawn yn cael ei gynnal bob ychydig flynyddoedd, Mae'r cyfanswm cyfansawdd cyfanredol hwn ar gyfer Cymru yn seiliedig ar y wybodaeth orau a oedd ar gael ym mis Mehefin 2022. Ar ryw ystyr mae cofnodion stoc welyau bob amser yn ‘waith sy'n mynd rhagddo’ ond, gyda phob iteriad, gwelir gwelliannau o ran cywirdeb a chysondeb.

Mae'r Adroddiad Interim hwn ar Stoc Welyau Llety yn diweddaru'r ffigurau a gyhoeddwyd yn 2013 ar gyfer 20 o'r 22 o Awdurdodau Lleol.  Mae'r ddau Awdurdod Lleol arall (Sir y Fflint a Wrecsam) yn bwriadu cynnal arolygon stoc welyau llawn a disgwylir i adroddiad wedi'i ddiweddaru'n llawn gael ei gyhoeddi yn ddiweddarach eleni. 

Mae'r tablau yn Adran 3 o'r adroddiad hwn, sy'n ymwneud â lleoliadau llety, a gwelyau llety, yn crynhoi'r prif ffigurau sy'n seiliedig ar ddata a gasglwyd gan 20 o'r 22 o Awdurdodau Lleol rhwng 2017 a 2022. Ar gyfer Sir y Fflint a Wrecsam defnyddiwyd ffigurau 2013.

Roedd pob Awdurdod Lleol yn gyfrifol am gasglu data ar ddarparwyr llety yn eu hardal gan ddefnyddio holiaduron a diffiniadau safonol a choladwyd y data hyn gan Lywodraeth Cymru i'w dadansoddi ymhellach.

Bwriedir i'r ymarfer casglu data roi darlun mor gyflawn â phosibl o'r cyflenwad o lety ymwelwyr yng Nghymru ac, felly, cysylltir â phob darparwr llety a gofynnir iddo gwblhau'r arolwg. Fodd bynnag, nid yw'n ymarferol bosibl nodi a chasglu data gan bob busnes ac, felly, y ffigurau yn yr adroddiad hwn sy'n rhoi'r ‘ciplun’ gorau sydd ar gael o'r cyflenwad o lety ar adeg benodol. Rhoddir y ffigurau a ddangosir yn yr adroddiad hwn yn ddidwyll yn seiliedig ar wybodaeth a ddarparwyd gan Awdurdodau Lleol ond gall fod rhai anghysondebau o ran y ffordd y mae llety wedi'i gategoreiddio.

Mae'r ffigurau ar gyfer y stoc welyau yn rhoi uchafswm nifer y gwelyau sydd ar gael, er y gall rhai lleoliadau fod ar gau neu'n rhannol ar gau ar adegau penodol yn ystod y flwyddyn sy'n golygu nad yw pob ystafell, uned na gwely a gyfrifwyd ar gael bob amser. Yn benodol, mae safleoedd carafannau a gwersylla yn debygol o fod yn gweithredu'n dymhorol ac o fod ar gau neu'n gweithredu gyda llai o welyau yn ystod y gaeaf.

Ni chynhwyswyd nifer yr ystafelloedd gwely yn y dadansoddiad ar gyfer yr adroddiad hwn am na chafodd ei gynnwys yn yr adroddiad stoc welyau a gyhoeddwyd yn 2013. Pan gaiff y data nas darparwyd eto gan yr Awdurdodau Lleol eraill eu cyhoeddi yn ddiweddarach yn y flwyddyn, caiff dadansoddiad o ystafelloedd gwely ei gynnwys.

Os bydd ymatebion i arolygon yn anghyflawn a bod Awdurdodau Lleol wedi methu â chysylltu â lleoliadau, gellir cynnwys amcangyfrifon o unedau, ystafelloedd gwely a gwelyau. Os mai dim ond nifer yr unedau/ystafelloedd neu nifer y gwelyau sy'n hysbys, gellir mewnbynnu'r gwerth coll gan ddefnyddio cymhareb ragnodedig, yn ôl y math o lety. Os na fydd nifer yr unedau/ystafelloedd na nifer y gwelyau yn hysbys, gellir mewnbynnu gwerth amcangyfrifedig yn seiliedig ar gyfartaleddau ar gyfer pob math o lety o ddata arolygon blaenorol, neu wybodaeth leol, os bydd yn awgrymu amcangyfrif mwy cywir. Ceir manylion llawn yn Adran A (MS Excel 26KB).

Gall cartrefi a osodir dros dro neu ystafelloedd preifat unigol mewn cartrefi preifat (h.y. eiddo a osodir ar rent am gyfnodau byr ar wefannau megis Airbnb) gael eu cyfrif yn anghyson yn y data hyn ar y stoc welyau oherwydd natur amrywiadwy'r cyflenwad.

Dylid nodi y gall fod gwahaniaethau yn y ffordd y mae llety amgen yn cael ei gategoreiddio rhwng Awdurdodau Lleol, a all fabwysiadu dulliau gweithredu gwahanol wrth ystyried a ddylid dosbarthu lleoliad yn ‘llety amgen’ neu'n ‘safle carafannau a gwersylla’. Dylai lleoliadau gael eu categoreiddio yn unol â'r canllawiau ac yn seiliedig ar y llety a'r cyfleusterau sydd ar gael ond, am fod y sector yn datblygu drwy'r amser, gall fod rhywfaint o wrthrychedd yn perthyn i'r broses hon.

Defnyddir ymchwil ddesg a chronfeydd data rhestrau eraill i nodi'r holl leoliadau llety mewn ardal a chael manylion cyswllt. Wedyn, anfonwyd holiaduron casglu data drwy e-bost a/neu'r post yn unol â dymuniad y lleoliadau. Cysylltwyd â lleoliadau dros y ffôn a/neu drwy e-bost er mwyn annog cyfranogiad llawn lle roedd hynny'n bosibl ond mae'n anochel na wnaeth rhai busnesau ddarparu data i'w cynnwys.

Os bydd safle yn cynnig mwy nag un math o lety e.e. gwely a brecwast a hunanddarpar, cofnodir pob math o lety ac, felly, byddai safle yn cael ei gyfrif yng nghyfanswm y Lleoliadau ar gyfer llety  Gwasanaeth a llety Hunanddarpar. Felly, gall cyfanswm y lleoliadau fesul categori mewn ardal benodol fod yn fwy na chyfanswm y lleoliadau a gofnodwyd. Caiff ystafelloedd a gwelyau eu categoreiddio'n unigol ac, felly, bydd swm pob ystafell a gwely ar gyfer y categori o lety yn cyfateb i'r cyfanswm cyffredinol.

Roedd cyfraddau ymateb ac, felly, gyfrannau o werthoedd amcangyfrifedig a ddefnyddiwyd yn amrywio rhwng Awdurdodau Lleol ac yn ôl y math o lety. At ei gilydd, roedd 28% o'r gwelyau a gyfrifwyd ledled Cymru yn seiliedig ar werth amcangyfrifedig, naill ai lle roedd nifer yr ystafelloedd/unedau yn hysbys ac y cafodd amcangyfrif o nifer y gwelyau ei gyfrifo gan ddefnyddio cymhareb neu lle y cafodd nifer yr ystafelloedd/unedau a'r gwelyau eu hamcangyfrif yn seiliedig ar fewnbynnau cymedrig categorïau o ddata arolygon blaenorol. Ymhlith llety carafannau a gwersylla roedd cyfran y gwelyau amcangyfrifedig ar ei uchaf ac roedd 35% o'r gwelyau hyn yn seiliedig ar amcangyfrif. Efallai nad yw hyn yn syndod gan yr ystyrir yn aml fod lleiniau pebyll a charafannau yn darparu lle i uchafswm o 4 unigolyn, ar gyfartaledd. Defnyddiodd y ffigurau ar gyfer llety hunanddarpar y gyfradd isaf o welyau amcangyfrifedig, sef dim ond 8%.

Ymchwilir i ddulliau casglu data amgen ar gyfer arolygon stoc welyau yn y dyfodol er mwyn cael darlun mwy cyflawn ac amserol o'r cyflenwad o lety ymwelwyr.

Lleoliadau llety

*Mae'r ffigurau ar gyfer Sir y Fflint a Wrecsam ar gyfer 2013 wedi'u cynnwys fel amcangyfrifon. Bydd ffigurau wedi'u diweddaru ar gael yn ddiweddarach yn 2022.

Image

Nodwyd 16,600 o safleoedd/lleoliadau llety yng Nghymru. Ar 12,145, roedd y mwyafrif (73%) yn lleoliadau hunanddarpar. Roedd 2,582 (16%) yn llety â gwasanaeth ac roedd 1,434 (9%) yn safleoedd gwersylla a/neu garafannau. At hynny, nodwyd 244 o hosteli a 195 o leoliadau llety amgen (sy'n cynnwys strwythurau nomadaidd megis tipis, pebyll crwyn, podiau, bythynnod bugail a charafannau Romani).

Image

De-orllewin Cymru sydd â'r nifer mwyaf o leoliadau llety o blith y pedwar rhanbarth (6,557), sy'n cyfateb i ddau o bob pum lleoliad llety (39%) yng Nghymru. Roedd y mwyafrif, sef 5,615, yn lleoliadau hunanddarpar.

Gogledd Cymru sydd â'r gyfran fwyaf ond un o leoliadau, sef 37% (6,219). Yn debyg i Dde-orllewin Cymru, mae'r mwyafrif, sef 4,482, yn lleoliadau hunanddarpar.

Mae gan Ganolbarth Cymru 2,413 o leoliadau (15% o'r cyfanswm) ac mae gan Dde-Ddwyrain Cymru 1,411 (9%).

Gwelyau

*Mae'r ffigurau ar gyfer Sir y Fflint a Wrecsam ar gyfer 2013 wedi'u cynnwys fel amcangyfrifon. Bydd ffigurau wedi'u diweddaru ar gael yn ddiweddarach yn 2022.

Image

Nodwyd cyfanswm o 605,211 welyau mewn llety ymwelwyr ledled Cymru. Ar 434,286, roedd y mwyafrif o'r gwelyau (72%) mewn lleoliadau carafannau a gwersylla. Roedd 78,510 (13%) mewn llety hunanddarpar ac roedd nifer tebyg, sef 70,585 (12%), mewn llety â gwasanaeth. Roedd hosteli yn cyfrif am ddim ond 3% o welyau (19,413) ac roedd and llety Amgan yn cyfrif am lai nag 1% (2,417).

Image

Gogledd Cymru sydd â'r nifer mwyaf o welyau o blith y pedwar rhanbarth (298,095), sy'n cyfateb i bron hanner (49%) y gwelyau yng Nghymru. Mae mwy na 4 o bob 5 (82%), 243,328, yn welyau mewn lleoliadau carafannau a gwersylla.

De-orllewin Cymru sydd â'r gyfran fwyaf ond un (26%), gyda 160,245 o welyau. Mae 2 o bob 3 (107,997) mewn lleoliadau carafannau a gwersylla ond mae mwy nag un o bob pump, sef 35,914, mewn lleoliadau hunanddarpar.

Mae gan Ganolbarth Cymru 87,491 o welyau (14% o'r cyfanswm) ac mae gan Dde-ddwyrain Cymru 59,380 (10%).

Image

Lleoliadau Carafannau a Gwersylla sydd â'r nifer mwyaf o welyau fesul lleoliad, gyda 303 o welyau fesul safle, ar gyfartaledd.

Yn 2013, nifer cyfartalog y gwelyau fesul lleoliad â Gwasanaeth oedd 25 (o gymharu â 27 yn yr adroddiad hwn), roedd gan y sector Hunanddarpar ychydig o dan 9 gwely fesul lleoliad, ar gyfartaledd (o gymharu â 6 yn yr adroddiad hwn). Roedd gan y sector Gwersylla a Charafannau 302 o welyau fesul lleoliad, ar gyfartaledd (o gymharu â 303).

Ar y cyfan, mae'r ffigurau hyn yn awgrymu nad yw maint cyfartalog llety wedi newid er bod y sectorau wedi ehangu (neu leihau, yn achos y sector llety â gwasanaeth).

Mae'n debyg bod y nifer mawr o welyau fesul lleoliad ar gyfer carafannau a gwersylla i'w briodoli i'r unedau lluosog fesul safle.

Amrywiadau rhanbarthol

Image

Gyda'i gilydd, mae De-orllewin Cymru, sydd â 6,557, a Gogledd Cymru, sydd â 6,038, yn cyfrif am dri chwarter y lleoliadau llety ond mae'r dosbarthiad yn amrywio yn ôl categori. Mae lleoliadau amgen wedi'u dosbarthu'n eithaf cyfartal rhwng y rhanbarthau, er y dylid nodi maint bach y bôn (195).

Image

Mae dosbarthiad y mathau o lety ymwelwyr yn amrywio ledled Cymru. Yn Ne-orllewin Cymru, mae cyfran uwch yn lleoliadau hunanddarpar ac yn Ne-ddwyrain Cymru mae cyfran y lleoliadau â gwasanaeth gryn dipyn yn uwch nag ydyw mewn rhanbarthau eraill. Mae safleoedd carafannau a gwersylla yn uwch na'r mynegai yng Nghanolbarth Cymru a Gogledd Cymru.

Image

Mae hanner yr holl welyau mewn llety ymwelwyr yng Ngogledd Cymru (49%) ac mae chwarter (26%) yn Ne-orllewin Cymru. Mae'r dosbarthiad hwn yn wahanol i ddosbarthiad lleoliadau llety yn y ddau ranbarth, sy'n adlewyrchu'r nifer mwy o leoliadau carafannau yng Ngogledd Cymru a'r nifer mwy o leoliadau hunanddarpar yn Ne-orllewin Cymru. Mae mwy na hanner (56%) y gwelyau mewn lleoliadau carafannau a gwersylla yng Nghymru yng Ngogledd Cymru.

Ceir 14% o welyau yng Nghanolbarth Cymru, er ei fod yn cyfrif am chwarter y gwelyau mewn hosteli.

Dim ond 10% o welyau sydd yn Ne-ddwyrain Cymru, er bod mwy na 4 o bob 10 gwely mewn hosteli (43%) a mwy nag 1 o bob tri gwely mewn lleoliadau â Gwasanaeth (35%) i'w cael yno.

Image

Mae cyfansoddiad y cyflenwad o lety yn amrywio rhwng rhanbarthau. Mae De-ddwyrain Cymru yn uwch na'r mynegai mewn perthynas â gwelyau mewn lleoliadau â Gwasanaeth, lle mae 4 o bob 10 yn perthyn i'r categori hwn, ond mae cyfran y gwelyau mewn lleoliadau carafannau a gwersylla gryn dipyn yn is nag ydyw ledled Cymru, ar gyfartaledd. 

Yng Ngogledd Cymru, mae gwelyau mewn lleoliadau carafannau a gwersylla yn cyfrif am 4 o bob 5 o'r stoc welyau, gyda gwelyau mewn lleoliadau â Gwasanaeth a lleoliadau Hunanddarpar yn cyfrif am gyfran is o'r ddarpariaeth o gymharu â rhannau eraill o Gymru.

Mae De-orllewin Cymru yn uwch na'r mynegai mewn perthynas â gwelyau mewn lleoliadau Hunanddarpar ac mae gan y rhanbarth hwnnw lai o welyau mewn lleoliadau Carafannau a Gwersylla o gymharu â'r cyfartaledd.

Mae dosbarthiad gwelyau yng Nghanolbarth Cymru yn ôl categori yn debyg iawn i gyfartaledd Cymru.

Amrywiadau rhwng awdurdodau lleol

Mae'r cyflenwad o welyau mewn llety ymwelwyr yn amrywio'n fawr rhwng rhanbarthau ac ardaloedd awdurdod lleol. Gyda'i gilydd, mae Sir Benfro a Gwynedd yn cyfrif am 55% o'r holl leoliadau llety a 41% o'r gwelyau yng Nghymru. Sir Benfro sydd â'r nifer mwyaf o leoliadau llety, sef 5,113, ond Gwynedd sydd â'r nifer mwyaf o welyau, sef 136,556, sydd i'w briodoli i'r gyfran fwy o leoliadau carafannau a gwersylla a geir yn yr olaf, sy'n cyfrif am 79% o'i gwelyau. Yn Sir Benfro mae 90% o'r lleoliadau yn rhai hunanddarpar.

Powys sydd â'r nifer mwyaf o leoliadau â gwasanaeth, sef 415, yna Gwynedd sydd â 346 a Chonwy sydd â 323. Caerdydd sydd â'r nifer mwyaf o welyau mewn lleoliadau â Gwasanaeth, sef 10,767 (a'r maint cyfartalog mwyaf, sef 136 o welyau fesul lleoliad) a Chonwy sydd â'r nifer mwyaf ond un, sef 9,460. Mae gan Wynedd a Phowys fwy na 6,000 o welyau mewn lleoliadau â Gwasanaeth yr un.

Gwynedd sydd â'r nifer mwyaf o safleoedd carafannau a gwersylla (366) a gwelyau (108,482), yna Sir Benfro sydd â 226 o safleoedd a 67,493 o welyau.

Sir Benfro sydd â'r nifer mwyaf o leoliadau hunanddarpar (4,618) a gwelyau (26,963), yna Gwynedd sydd â 3,165 o leoliadau a 18,444 o welyau.

Powys (63) a Gwynedd (52) sydd â'r nifer mwyaf o leoliadau Hostel ond Caerdydd (5,858) a Cheredigion (2,931) sydd â'r nifer mwyaf o welyau mewn Hosteli.

Sir Fynwy (44) a Phowys (28) sydd â'r nifer mwyaf o leoliadau llety Amgen ac, er mai Sir Fynwy sydd â'r nifer mwyaf ond un o welyau (413), yng Ngwynedd y ceir y nifer mwyaf o welyau mewn llety amgen (506) sydd wedi'u rhannu rhwng 24 o leoliadau.

Mae'r dadansoddiad canlynol yn cymharu'r data presennol â gwerthoedd cyfatebol 2013 lle maent wedi'u diweddaru. Felly, nid yw'r adran hon yn cynnwys dadansoddiad o stoc welyau Wrecsam na Sir y Fflint.

Lleoliadau llety

O gymharu â 2013, nodwyd 41% yn fwy o leoliadau llety ymwelwyr yn yr arolygon diweddar.

Roedd hyn i'w briodoli'n bennaf i gynnydd o 72% yn nifer y lleoliadau hunanddarpar yn gyffredinol, o 7,022 yn 2013 i 12,145. Gwelwyd cynnydd hefyd yn nifer y lleoliadau carafannau a gwersylla, lleoliadau Hostel a lleoliadau Amgen.

Yn Sir Benfro y gwelwyd y cynnydd absoliwt mwyaf, lle y gwnaeth nifer y lleoliadau hunanddarpar ddyblu bron o 2,419 yn 2013 i 4,618; ac yng Ngwynedd lle y cynyddodd nifer y lleoliadau 63% o 1,940 i 3,165.

Llety â gwasanaeth yw'r unig gategori lle y bu lleihad yn nifer y lleoliadau, sydd wedi lleihau 20% o 3,110 yn 2013 i 2,582. Er i nifer y lleoliadau llety â gwasanaeth leihau ym mhob rhanbarth, rhanbarth y De-orllewin a gofnododd y lleihad mwyaf, gyda 310 yn llai o leoliadau â gwasanaeth. Daeth y Gogledd yn ail gan golli 230 o leoliadau.

Gwelyau

I'r gwrthwyneb, mae nifer y gwelyau ond wedi cynyddu 13% ers 2013, o 537,217 i 605,211.

Bu cynnydd o 25% yn nifer y gwelyau hunanddarpar a chynnydd o 72% yn nifer y lleoliadau hunanddarpar ac mae hyn yn golygu bod llai o welyau fesul lleoliad, ar gyfartaledd, o gymharu â 2013. Cynyddodd nifer y gwelyau mewn lleoliadau carafannau a gwersyll 9% gan ychwanegu 35,162 o welyau at y stoc welyau (sef y cynnydd mewn termau absoliwt). Cynyddodd nifer y gwelyau mewn hosteli 12% hefyd, sy'n cyd-fynd â'r cynnydd o 9% yn nifer y lleoliadau hostel.

Unwaith eto, yr unig gategori a gofnododd leihad yn y cyflenwad oedd llety â gwasanaeth. Roedd 11% yn llai o welyau mewn llety â gwasanaeth o gymharu â 2013 (sef 8,313 yn llai o welyau). Yng Nghonwy, Sir Ddinbych, Gwynedd a Sir Benfro y gwelwyd y newidiadau absoliwt mwyaf a chofnodwyd o leiaf 1,500 yn llai o welyau mewn llety â gwasanaeth ym mhob un o'r pedair sir hyn, o gymharu â 2013. Nododd Ynys Môn fod nifer y gwelyau mewn llety â gwasanaeth wedi haneru (49% yn llai) ac yn Nhorfaen y gwelwyd y lleihad mwyaf ar gyfartaledd, sef 42%, er bod hynny o gyflenwad cychwynnol cymharol is.

Er bod y cymysgedd o fathau o lety wedi newid rywfaint ers 2013 ac er bod cynnydd canrannol sylweddol wedi'i gofnodi yn y cyflenwad o lety amgen o 1013 yn 2013 i 2417 yn 2022, mae'r math hwn o lety yn dal i gyfrif am gyfran fach iawn o'r llety ymwelwyr sydd ar gael.

Lleoliad

Safle unigol lle y darperir llety ymwelwyr h.y. gall hyn gynnwys gwestai, safleoedd gwersylla, cyfadeiladau hunanddarpar neu fwthyn hunanddarpar unigol.

Gwely

Capasiti mwyaf uned, llain neu ystafell i oedolion sy'n aros dros nos h.y. mae gwely dwbl yn cyfrif fel dau wely.

Uned

Tŷ, rhandy neu eiddo arall unigol, at ddefnydd y meddianwyr yn unig.

Llain

Lle unigol ar safle carafannau neu wersylla, sy'n addas i unrhyw un o'r canlynol: pebyll, carafannau neu gartrefi modur.

Llety â gwasanaeth

Mae'n cynnwys lleoliadau llety sydd wedi'u categoreiddiofel a ganlyn: Gwesty, Gwely a Brecwast, Ffermdy, Tafarn, Bwyty gydag Ystafelloedd, Llety Gwesteion

Gwesty

Mae ganddo o leiaf 6 ystafell wely i'w gosod, pob un â chyfleusterau en-suite neu gyfleusterau preifat. Darperir prydau bwyd gyda'r nos o leiaf bum diwrnod yr wythnos ac mae bar neu fan eistedd â Thrwydded Alcohol. Rhaid i westy fod ar agor saith diwrnod yr wythnos yn ystod y tymor gweithredu a darparu cyfleuster derbyn sydd wedi'i ddynodi'n glir.

Gwely a brecwast

Llety a ddarperir mewn tŷ preifat, a redir gan y perchennog a lle nad oes mwy na chwe gwestai sy'n talu.

Tŷ llety

Llety a ddarperir ar gyfer mwy na chwe gwestai sy'n talu ac a redir ar sail fwy masnachol na llety gwely a brecwast. Fel arfer, mae mwy o wasanaethau, er enghraifft, cinio, a ddarperir gan staff yn ogystal â'r perchennog.

Ffermdy

Llety gwely a brecwast neu dŷ llety a ddarperir ar fferm weithredol neu dyddyn neu grofft.

Tafarn

Llety a ddarperir mewn mangre â thrwydded lawn. Bydd y bar ar agor i unigolion nad ydynt yn breswylwyr ac yn darparu bwyd gyda'r nos (nid 7 noson yr wythnos o reidrwydd).

Bwyty gydag ystafelloedd

Bwyty sy'n gyrchfan sy'n cynnig llety dros nos, ond y bwyty yw'r prif fusnes, sydd ar agor i unigolion nad ydynt yn breswylwyr. Dylai'r bwyty gynnig bwyd o safon uchel a gwasanaeth bwyty o leiaf bum noson yr wythnos. Mae angen trwydded alcohol a hyd at 12 o ystafelloedd gwely.

Llety gwesteion

Mae unrhyw leoliad sy'n bodloni'r gofyniad mynediad sylfaenol yn gymwys i fod yn yr isgategori cyffredinol hwn.

Llety hunanddarpar

Math o lety heb wasanaeth, gan gynnwys bythynnod, tai, byngalos, fflatiau a chaban gwyliau.

Llety gwersylla/carafannau

Parciau gwyliau, safleoedd carafannau sefydlog, carafannau teithio neu wersylla.

Parc gwyliau

Parciau y mae eu prif fusnes yn ymwneud â gosod carafannau gwyliau, er y gallant gynnig rhai lleiniau i garafannau teithio.

Parc teithio

Parciau â lleiniau i garafannau teithio, cartrefi modur a phebyll yn unig.

Parc gwersylla

Parciau sydd ond yn darparu ar gyfer pebyll.

Parc gwyliau a theithio

Parciau lle y ceir yr un faint o leiniau e.e. ar gyfer carafannau sefydlog a charafannau teithio.

Parc gwyliau a gwersylla

Pan fydd yr un faint o leiniau e.e. ar gyfer carafannau sefydlog a phebyll.

Parc teithio a gwersylla

Parciau lle y ceir yr un faint o leiniau e.e. ar gyfer pebyll a charafannau teithio.

Parc gwyliau, teithio a gwersylla

Parciau lle y ceir yr un faint o leiniau e.e. ar gyfer carafannau sefydlog, carafannau teithio a phebyll.

Hostel / llety grwpiau

Mae lleoliadau yn cynnwys: Hostel, Llety Grwpiau, Llety Gweithgaredd, Llety Heicwyr, Tŷ Bynciau, Ysguboriau Gwersylla, Llety ar Gampws

Hostel

Llety â gradd sêr mewn ystafelloedd a rennir gyda gwelyau bync yn aml, gall ystafelloedd i deuluoedd hefyd fod ar gael.

Llety grwpiau

Llety â gradd sêr mewn ystafelloedd a rennir gyda gwelyau bync yn aml.

Llety gweithgaredd

Llety â gradd sêr a ddarperir ar sail grŵp fel arfer. Bydd y lleoliad hefyd yn cynnig gweithgareddau wedi'u hachredu'n llawn neu wedi'u trwyddedu gan A.A.L.A.

Llety heicwyr

Yn debyg iawn i hostel, ond gall gael ei redeg mewn ffordd lai ffurfiol megis mynediad 24 awr.

Tŷ bynciau

Llety â gradd sêr yng nghefn gwlad. Gall gwasanaethau a chyfleusterau fod yn gyfyngedig, ond byddant yn cynnwys cyfleuster hunanddarpar.

Ysguboriau gwersylla

Llety dros nos syml mewn lleoliad gwledig y cyfeirir ato'n aml fel “pebyll cerrig”.

Llety ar gampws

Preswylfa i fyfyrwyr a godwyd i'r pwrpas sy'n cynnig llety ac sydd ar gael yn ystod y gwyliau yn bennaf

Llety amgen

Llety anarferol neu unigryw gan gynnwys carafannau Romani, carafannau llif aer, eco-bodiau/eco-gabanau neu bodiau neu gabanau glampio, bythynnod bugail, tai pen coed, cychod/bysiau wedi'u haddasu, goleudai ac ati, a strwythurau nomadaidd megis tipis/pebyll crwyn/pebyll saffari.

Am ragor o wybodaeth, cysylltwch â:
Phil Nelson
E-bost: ymchwiltwristiaeth@llyw.cymru

Rhif Ymchwil Gymdeithasol: 58/2022
ISBN digidol 978-1-80364-675-6

Image