Cyfarfod Panel Annibynnol Cymru ar Gydnabyddiaeth Ariannol: 1 Medi 2022
Crynodeb o funudau’r cyfarfod a chynhaliwyd ar 1 Medi 2022.
Efallai na fydd y ffeil hon yn gyfan gwbl hygyrch.
Ar y dudalen hon
Mynychwyr
Frances Duffy: Cadeirydd
Saz Willey: Is-gadeirydd
Bev Smith
Leighton Jones: Ysgrifenyddiaeth Panel Annibynnol Cymru ar Gydnabyddiaeth Ariannol
Tom Smithson: swyddog Llywodraeth Cymru (i drafod un eitem ar yr agenda)
Cyflwyniad
Cyfarfu Panel Annibynnol Cymru ar Gydnabyddiaeth Ariannol ddydd Iau 1 Medi.
Roedd y cyfarfod yn canolbwyntio ar drafod a chytuno ar gynllun a chynnwys adroddiad blynyddol drafft 2023, lefelau cyflog cynghorwyr cymuned a thref a'r cynllun ymgysylltu â rhanddeiliaid pan fydd yr adroddiad blynyddol drafft yn cael ei gyhoeddi.
Fe wnaeth y Panel hefyd ystyried ei gyllideb ar gyfer gweddill 2022 i 2023, a chytunwyd ar ymateb i’r ymgynghoriad ar ganllawiau diwygiedig i Brif Swyddogion Tân yr Awdurdodau Tân ac Achub.
Ymunodd un o swyddogion Llywodraeth Cymru, Tom Smithson, â’r cyfarfod am gyfnod byr i drafod ei rôl yn yr adolygiad effeithiolrwydd ar y Panel.
Isod ceir crynodeb o drafodaethau a phenderfyniadau’r Panel.
Adroddiad Blynyddol Drafft 2023: strwythur a chynllun
Ystyriodd y Panel sut y gellir symleiddio'r adroddiad drafft a chanolbwyntio ar y newidiadau a fydd yn cael eu gwneud ar gyfer 2023 i 2024 yn unig. Cytunodd y Panel i gynnwys cwestiynau i randdeiliaid ymateb iddynt fel rhan o'r ymgynghoriad.
Adolygiad Effeithiolrwydd
Trafododd y Panel sut y bydd yr adolygiad effeithiolrwydd yn cael ei gynnal. Bydd yr adolygiad hwn yn helpu'r Panel gyda’i gynllun strategol a’i strategaeth ar gyfer ymgysylltu, ymchwilio a chasglu tystiolaeth. Bydd pob aelod o'r Panel yn cyfarfod yn unigol â Tom cyn cysylltu â rhanddeiliaid.
Adran 143a o Fesur Llywodraeth Leol 201: canllawiau diwygiedig
Nododd a chytunodd y Panel ar ymateb i'r canllawiau diwygiedig sy'n amlinellu nad yw rôl y Prif Swyddog Tân mewn Awdurdod Tân ac Achub o fewn cylch gwaith y Panel.
Cyllideb ar gyfer 2022 i 2023
Cytunodd y Panel i ddiwygio ei ragolwg cyllideb ar gyfer gweddill blwyddyn ariannol 2022 i 2023.
Unrhyw fater arall
Bu'r Panel yn trafod ac yn cytuno ar ymatebion i ddau ymholiad a gafwyd gan Glerc Cyngor Tref ac aelod o'r cyhoedd. Roedd yr ymholiadau hyn yn gofyn i'r Panel am gyngor ac eglurhad am daliadau a wnaed i aelodau etholedig Cynghorau Cymuned a Thref.
Y cyfarfod nesaf
Cynhelir cyfarfod nesaf Panel Annibynnol Cymru ar Gydnabyddiaeth Ariannol ddydd Mawrth 20 Medi.
Os oes gennych unrhyw faterion y dymunwch eu codi gyda'r Panel, mae croeso ichi gysylltu drwy'r Ysgrifenyddiaeth drwy e-bostio IRPMailbox@llyw.cymru.