Rebecca Evans AS, y Gweinidog Cyllid a Llywodraeth Leol
Heddiw, rwyf wedi cyflwyno Cyllideb derfynol Llywodraeth Cymru ar gyfer 2023-24. Mae’r gyllideb hon yn sicrhau ein hymrwymiad i flaenoriaethu’r bobl fwyaf agored i niwed a diogelu gwasanaethau cyhoeddus, gan barhau i greu Cymru gryfach, decach a gwyrddach i bawb.
Yn ogystal â’r dyraniadau rydym eisoes wedi’u nodi yn y Gyllideb Ddrafft, mae Cyllideb Derfynol 2023-24 yn cynnwys dyraniadau cyfalaf Trafodiadau Ariannol a nifer o newidiadau gweinyddol.
Mae dogfennau’r Gyllideb derfynol ar gael yn Gymraeg ac yn Saesneg ar wefan Llywodraeth Cymru:
- Cynnig y Gyllideb Flynyddol;
- Llinellau Gwariant yn y Gyllideb (tablau BEL);
- Nodyn Esboniadol y Gyllideb Derfynol; a
- Tablau sy’n ategu’r cynlluniau gwario.
Mae’r ddogfen ganlynol, sy’n rhan o’r gyfres o ddogfennau a gyhoeddir heddiw, ar gael hefyd:
- Y Swyddfa Cyfrifoldeb Cyllidebol - asesiad annibynnol o'n cynigion trethi - Rhagolwg Trethi Cymreig, diweddariad Chwefror 2023.
Mae Llywodraeth y DU wedi nodi ei bwriad i gyhoeddi Datganiad y Gwanwyn ar 15 Mawrth. Rwyf yn bwriadu gwneud datganiad mor gynnar â phosibl yn dilyn hyn i roi'r wybodaeth ddiweddaraf am ragolygon a manylion unrhyw symiau canlyniadol i Gymru.
Cynhelir dadl a phleidlais ar y Gyllideb derfynol yn y Senedd ar 7 Mawrth.