Cyfarfod Panel Annibynnol Cymru ar Gydnabyddiaeth Ariannol: 10 Chwefror 2023

• Frances Duffy, Cadeirydd
• Saz Willey, Is-gadeirydd
• Bev Smith
• Leighton Jones, Yr ysgrifenyddiaeth

Cynhaliwyd cyfarfod o Banel Annibynnol Cymru ar Gydnabyddiaeth Ariannol (y Panel) ddydd Gwener 10 Chwefror.

Nod y cyfarfod oedd cytuno ar yr adroddiad blynyddol terfynol ar gyfer 2023, ystyried fersiwn ddrafft y strategaeth gyfathrebu ac ymgysylltu, ystyried y cynllun strategol drafft ar gyfer y ddwy flynedd nesaf a dadansoddi’r cynllun tystiolaeth ac ymchwil. Archwiliodd y Panel y ffurflenni cydymffurfiaeth a gyflwynwyd gan awdurdodau lleol hefyd, a thrafod y gyllideb a’r cynllun gwaith ar gyfer 2023 i 2024.

Isod ceir crynodeb o drafodaethau a phenderfyniadau’r Panel

Adolygodd y Panel y diwygiadau a wnaed i’r adroddiad drafft gan gytuno i gymeradwyo’r adroddiad blynyddol ar gyfer 2023. Bydd hwn yn cael ei gyhoeddi erbyn diwedd mis Chwefror. Bydd e-bost yn cael ei anfon at yr holl randdeiliaid a fydd yn cynnwys fersiwn pdf a dolen i wefan ar gyfer yr adroddiad.

Ystyriodd y Panel y strategaeth gyfathrebu ac ymgysylltu ddrafft. Amlinellodd hyn y dull gweithredu ochr yn ochr â’r egwyddorion a’r cyfeiriad ar gyfer datblygu’r strategaeth. Bydd y strategaeth yn cael ei chwblhau ym mis Ebrill.

Bu’r Panel yn trafod y cynllun strategol ar gyfer y ddwy flynedd nesaf. Roedd y cynllun yn crynhoi’r egwyddorion a’r nodau y bydd y panel yn gweithio i’w cyflawni. Bydd hyn yn cael ei gwblhau yn y cyfarfod ym mis Mawrth a bydd yn cael ei gyhoeddi ar y wefan unwaith y bydd pawb yn gytûn.

Adolygodd y Panel bapur ar y cynllun tystiolaeth ac ymchwil. Cyflwynwyd y papur hwn i sicrhau bod penderfyniadau’r Panel yn wybodus ac yn eglur. Ystyriodd y Panel y data, y cymaryddion a’r dystiolaeth a chytunwyd arnynt er mwyn gallu defnyddio hyn i fod o fudd wrth wneud penderfyniadau yn y dyfodol.

Edrychodd y Panel ar y ffurflenni Taliadau ar gyfer 2021 i 2022 a’r Atodlenni Cydnabyddiaeth Ariannol ar gyfer 2022 i 2023. Trafododd y Panel y wybodaeth sydd ei hangen ar gyfer pob un o’r gofynion cydymffurfiaeth.

Ystyriodd y Panel y cynlluniau drafft ar gyfer y gyllideb a’r amserlen waith dros y flwyddyn ariannol nesaf. Bydd y cynllun gwaith yn cael ei gwblhau yn y cyfarfod ym mis Mawrth a bydd yr Ysgrifenyddiaeth yn adrodd arno bob mis, ochr yn ochr â gwariant y gyllideb.

Cytunodd y Panel ar ddyddiadau Panel y dyfodol ar gyfer 2023.

Cynhelir cyfarfod nesaf Panel Annibynnol Cymru ar Gydnabyddiaeth Ariannol ddydd Mawrth 14 Mawrth.

Os oes gennych unrhyw faterion yr hoffech eu codi gyda’r Panel, mae croeso ichi gysylltu drwy’r Ysgrifenyddiaeth drwy anfon e-bost i IRPMailbox@llyw.cymru.