Cyfarfod Fforwm Hawliau a Chyfrifoldebau yn y Gweithle: 4 Tachwedd 2024
Crynodeb o'r drafodaeth o'r cyfarfod.
Efallai na fydd y ffeil hon yn gyfan gwbl hygyrch.
Eitem 1: Nodiadau a chamau gweithredu ers y cyfarfod blaenorol
Cymeradwywyd cofnodion y cyfarfod blaenorol.
Eitem 2: Y Bil Hawliau Cyflogaeth
Cafodd y Fforwm gyflwyniad gan uwch swyddog o Adran Busnes a Masnach y DU. Roedd hyn yn rhoi trosolwg o'r mesurau yn y Bil a'r dull o ymgynghori ac ymgysylltu. Nododd y Fforwm yr ymgysylltiad adeiladol rhwng Llywodraeth Cymru a Llywodraeth y DU ar y Bil.
Eitem 3: Canllawiau'r Comisiwn Cydraddoldeb a Hawliau Dynol: gweithio hybrid, menopos ac aflonyddu
Cafodd y Fforwm yr wybodaeth ddiweddaraf am ganllawiau'r Comisiwn ar fynd i'r afael ag aflonyddu yn y gweithle, menopos, a chefnogi gweithwyr anabl gyda gweithio hybrid. Rhoddwyd gwybod i'r Fforwm am yr wybodaeth, yr offer a'r adnoddau sydd ar gael ar wefan y Comisiwn, sydd wedi'u cynllunio i helpu cyflogwyr i ddeall eu rhwymedigaethau a'u cefnogi i wneud addasiadau rhesymol.
Eitem 4: Mynd i'r afael â hiliaeth a thrais yn y gweithle
Cafodd y Fforwm grynodeb o becyn cymorth TUC Cymru i fynd i'r afael â hiliaeth yn y gweithle. Esboniodd hyn sut mae'r pecyn cymorth yn ddefnyddiol i gefnogi gweithwyr a chynrychiolwyr undebau llafur, yn ogystal â darparu gwybodaeth i gyflogwyr. Nododd y Fforwm fod gan gyflogwyr, undebau llafur, y Llywodraeth a rheoleiddwyr i gyd ran i'w chwarae wrth fynd i'r afael â'r mater hwn.