Newidiadau i ragnodi triniaethau gwrthfeirysol a gwrthgyrff ar gyfer COVID-19 (WHC/2025/010)

Statws:

Cam gweithredu.

Categori:

Iechyd y cyhoedd.

Teitl:

Trefniadau ar gyfer rhagnodi triniaethau gwrthfeirysol a niwtraleiddio gwrthgyrff monoclonaidd ar gyfer COVID-19.

Dyddiad dod i ben / dyddiad yr adolygiad:

Amherthnasol.

I’w weithredu gan:

• Ymarferwyr cyffredinol.
• Fferyllfeydd cymunedol.
• Prif weithredwyr byrddau/ymddiriedolaethau iechyd.
• Cyfarwyddwyr meddygol byrddau/ymddiriedolaethau iechyd.
• Cyfarwyddwyr gofal sylfaenol byrddau/ymddiriedolaethau iechyd.
• Cyfarwyddwyr gweithredol nyrsio.
• Byrddau/ymddiriedolaethau iechyd.
• Cyfarwyddwyr gweithredol therapïau a gwyddor iechyd.
• Cyfarwyddwyr iechyd y cyhoedd.
• Byrddau/ymddiriedolaethau iechyd.
• Cyfarwyddwyr fferylliaeth/prif fferyllwyr, byrddau iechyd/ymddiriedolaethau.
• Pwyllgor Ymarferwyr Cyffredinol Cymru.
• Fferylliaeth Gymunedol Cymru.

Angen gweithredu erbyn:

Amherthnasol.

Anfonwyd gan:

Y Prif Swyddog Fferyllol,
Grŵp Iechyd, Gwasanaethau Cymdeithasol a Blynyddoedd Cynnar,
Llywodraeth Cymru.

Enwau cyswllt Llywodraeth Cymru:

Y Gangen Fferylliaeth a Rhagnodi,
Llywodraeth Cymru,
Parc Cathays,
Caerdydd.
CF10 3NQ.
E-bost: Pharmacyand.PrescribingBranch@llwy.cymru

Dogfennau amgaeedig:

Atodiad: trefniadau ar gyfer rhagnodi triniaethau gwrthfeirysol a niwtraleiddio gwrthgyrff monoclonaidd ar gyfer COVID-19.

Annwyl Gydweithwyr,

Trefniadau ar gyfer rhagnodi triniaethau gwrthfeirysol a niwtraleiddio gwrthgyrff monoclonaidd ar gyfer COVID-19.

Mae'r Sefydliad Cenedlaethol dros Ragoriaeth mewn Iechyd a Gofal (NICE) yn argymell defnyddio'r feddyginiaeth wrthfeirysol nirmatrelvir a ritonavir (Paxlovid®) a'r driniaeth niwtraleiddio gwrthgyrff monoclonaidd sotrovimab fel opsiynau ar gyfer trin COVID-19 mewn oedolion sydd â risg uchel o ddioddef salwch COVID-19 difrifol, fel y'i diffinnir yng nghanllawiau gwerthuso technoleg TA878 Nirmatrelvir â ritonavir, sotrovimab a tocilizumab ar gyfer trin COVID-19.

Mae canllawiau drafft NICE yn argymell defnyddio'r feddyginiaeth wrthfeirysol molnupiravir (Lagevrio®) i drin COVID-19 ysgafn i gymedrol mewn cleifion yn y garfan hon y mae nirmatrelvir a ritonavir, a sotrovimab yn anaddas iddynt neu mae'r feddyginiaeth yn achosi gwrtharwyddion.

Ers mis Tachwedd 2021, mae triniaeth wrthfeirysol COVID-19 ar gyfer y grŵp clinigol hynod agored i niwed hwn wedi bod ar gael trwy lwybrau triniaeth a weithredir gan fyrddau iechyd lleol, gyda meddyginiaethau gwrthfeirysol ar gael trwy gyflenwad a gafaelir yn ganolog yn unig.

Buom yn gweithio gyda gweithgynhyrchwyr ac Adran Iechyd a Gofal Cymdeithasol Llywodraeth y DU i gwblhau trefniadau ar gyfer cyflenwadau cynaliadwy hirdymor o nirmatrelvir a ritonavir a molnupiravir, a rhagwelir y bydd y ddau ar gael i fferyllfeydd cymunedol a meddygon fferyllol, yn ogystal ag ysbytai, i'w harchebu trwy gadwyni cyflenwi arferol yn ystod y misoedd nesaf.

Wrth baratoi ar gyfer argaeledd rheolaidd o feddyginiaethau gwrthfeirysol, rydym wedi cytuno gyda Phwyllgor Ymarferwyr Cyffredinol Cymru i wneud newidiadau i'r llwybr triniaeth ar gyfer y rheini sy'n gymwys i gael meddyginiaethau gwrthfeirysol COVID-19. Bydd y newidiadau'n dod yn weithredol yn nes ymlaen y gwanwyn hwn, a byddant yn golygu y bydd unrhyw un mewn grŵp cymwys (gweler yr Atodiad) yn gallu cysylltu â'u practis meddyg teulu, neu wasanaeth y tu allan i oriau os byddant yn profi'n bositif am COVID-19, er mwyn iddynt gael eu hasesu'n glinigol ar gyfer presgripsiwn meddyginiaeth wrthfeirysol. Bydd presgripsiynau yn cael eu gweinyddu gan fferyllfeydd cymunedol a meddygon fferyllol.

Bydd rhagor o wybodaeth, gan gynnwys canllawiau triniaeth a chadarnhad o'r dyddiad y bydd cyflenwadau ar gael i'w harchebu gan gyfanwerthwyr, ar gael cyn bo hir. Yn y cyfamser, mae'n ofynnol i fyrddau iechyd weithio gyda chontractwyr gofal sylfaenol yn eu hardal i roi llwybrau triniaeth lleol ar waith sy'n darparu mynediad parhaus at driniaethau gwrthfeirysol a systemau ar gyfer atgyfeirio cleifion cymwys, y mae nirmatrelvir a ritonavir yn anaddas iddynt neu maent yn achosi gwrtharwyddion, ar gyfer rhoi sotrovimab yn fewnwythiennol.

Atgoffir presgripsiynwyr y dylid cynnig triniaeth ar gyfer COVID-19 yn y gymuned dim ond lle mae haint SARS-COV-2 wedi'i gadarnhau gan brawf llif unffordd (LFD) neu brawf adwaith cadwynol polymerasau (PCR), a lle y gellir dechrau triniaeth o fewn pum diwrnod ar ôl i'r symptomau ymddangos. Nid yw meddyginiaethau gwrthfeirysol wedi'u trwyddedu, ac nid ydynt yn effeithiol ar gyfer proffylacsis COVID-19.

Mae pecynnau prawf LFD ar gael am ddim i bobl sy'n gymwys i gael triniaeth wrthfeirysol COVID-19, a gellir eu casglu o'r rhan fwyaf o fferyllfeydd cymunedol yng Nghymru. Gellir dod o hyd i fanylion fferyllfeydd cymunedol sy'n darparu pecynnau prawf LFD am ddim drwy wefan 111 GIG Cymru a chwilio am wasanaethau yn eich ardal chi.

Gofynnir i glinigwyr a fferyllwyr atgoffa pobl sydd eisoes yn gymwys, yn ogystal â'r rheini sydd newydd ddod yn gymwys, o argaeledd pecynnau prawf LFD am ddim a sut i gael gafael arnynt.

Yn gywir,

Andrew Evans,
Prif Swyddog Fferyllol,
Llywodraeth Cymru.