Mae Arlwyo a Glanhau NEWydd wedi datgloi mynediad cyflym at gyflenwyr cynaliadwy, gan ysgogi buddion amgylcheddol a gweithredol sylweddol a chyd-fynd â pholisïau Llywodraeth Cymru.
Cyflwyniad
Mae Arlwyo a Glanhau NEWydd wedi gweithio mewn partneriaeth ag Arrow County Supplies drwy fframwaith Cyflawni Masnachol Llywodraeth Cymru i ddatgloi mynediad cyflym at gyflenwyr cynaliadwy, gan ysgogi buddion amgylcheddol a gweithredol sylweddol a chyd-fynd â pholisïau Llywodraeth Cymru.
Mae NEWydd, sy'n rhan o Gyngor Sir y Fflint, yn darparu gwasanaethau arlwyo a glanhau i dros 200 o safleoedd, gan gynnwys ysgolion, cartrefi gofal ac adeiladau cyhoeddus. Fel cwmni masnachu Awdurdod Lleol, mae cynaliadwyedd yn flaenoriaeth allweddol i NEWydd, gan gyd-fynd ag amcanion amgylcheddol a diwastraff Llywodraeth Cymru.
Trwy gaffael cyflenwadau glanhau drwy Fframwaith Cyflawni Masnachol Llywodraeth Cymru, cyrchodd NEWydd gynhyrchion cynaliadwy sy'n arwain y farchnad a chael cefnogaeth arbenigol gan Arrow County Supplies.
Gweithiodd Arrow yn agos gyda NEWydd i asesu eu hanghenion a sicrhau bod eu gweithrediadau yn cyd-fynd ag Agenda Cynaliadwyedd Llywodraeth Cymru - gan ganolbwyntio ar leihau eu heffaith amgylcheddol a chynnal safonau perfformiad uchel ar yr un pryd. Roedd yr heriau allweddol a nodwyd yn cynnwys:
- Defnyddio cemegau tocsig gydag effeithiau negyddol ar fioamrywiaeth ac ailgylchu
- Gorddosio cynhyrchion glanhau, gan arwain at wastraff diangen
- Mae deunydd pacio plastig untro yn mynd yn groes i dargedau diwastraff
Datrysiadau Cynaliadwy wedi'u galluogi gan y Fframwaith
Gan weithio gyda thîm glanhau NEWydd, cyflwynodd Arrow ystod o atebion amgylcheddol arloesol, wedi'u teilwra i ofynion NEWydd:
- Cynhyrchion Cemegol Green Care®: Cynhyrchion Cradle-to-Cradle® sydd ag ardystiad Aur ac sydd wedi eu gwneud o blanhigion yn unig, yn fioddiraddadwy, ac yn gwbl ailgylchadwy.
- System Ddosio Hawdd a Chyflym: Dewis amgen cynaliadwy i chwistrellau plastig untro, gan gael gwared ar orddefnydd a gwastraff.
- Hyfforddiant a Chefnogaeth ar y Safle: Sicrhau y gallai staff glanhau fabwysiadu'r dulliau newydd yn hyderus ac yn effeithlon.
Gweithredu ac effaith
Roedd rhaglen WorkSmarter Arrow, gyda chefnogaeth Fframwaith Cyflawni Masnachol Llywodraeth Cymru, yn cynnwys adolygiad cynhwysfawr o weithrediadau glanhau NEWydd. Ar ôl treial 4 wythnos o gynhyrchion Green Care® mewn dwy ysgol, dangoswyd bod:
- Gwelliant mewn perfformiad glanhau, yn enwedig mewn ardaloedd uchel eu defnydd.
- Lleihad yn y defnydd o gemegion a’r gwastraff cysylltiedig.
- Adborth cadarnhaol gan ddefnyddwyr ar hwylustod a diogelwch cynhyrchion nad ydynt yn rhai tocsig.
Cyflawniadau
O fewn 12 mis o weithredu'n llawn, cyflawnodd NEWydd:
- 275 KG o arbedion CO2
- 39 KG o arbedion plastig
- 88 KG o arbedion olew crai
Mae cynaliadwyedd yn bwysig iawn i ni, yn enwedig gan ein bod yn gweithio mewn ysgolion lle mae myfyrwyr yn ymwybodol iawn o faterion amgylcheddol. Mae Arrow wedi bod yn anhygoel. Maen nhw wedi ein helpu i ailfeddwl am y ffordd rydyn ni'n gweithredu a chreu gwasanaeth glanhau sydd yn wirioneddol ecogyfeillgar.
Rob Lawton, Rheolwr Gweithrediadau
Am ragor o wybodaeth, cysylltwch â CaffaelMasnachol.PoblaChorfforaethol@llyw.cymru