Datganiad cenhadaeth ac egwyddorion

Bydd y fforwm yn ffordd i Lywodraeth Cymru, cyflogwyr datganoledig y sector cyhoeddus ac undebau llafur ddatblygu atebion ar y cyd i faterion yn ymwneud â'r gweithlu presennol a gweithlu'r dyfodol. Bydd yn hyrwyddo cyflogaeth deg, gyfartal ac egwyddorol; yn llywio'r gwaith o datblygu polisi; ac yn annog trafodaeth strategol.

Bydd y fforwm yn ymgorffori ein hymrwymiad i Bartneriaeth Gymdeithasol trwy gynrychiolaeth deirochrog, consensws ac ymarfer ar y cyd.

• Bydd Fforwm Gweithlu Dyfodol y Sector Cyhoeddus yn gyfle i  Lywodraeth Cymru, cyflogwyr y sector cyhoeddus datganoledig a'u hundebau llafur cydnabyddedig ddatblygu atebion ar y cyd ar draws y sector i faterion yn ymwneud â'r gweithlu presennol a gweithlu'r dyfodol sy'n hyrwyddo cyflogaeth deg, gyfartal a moesegol ar draws ein gwasanaethau cyhoeddus ac ymatebion a rennir i natur newidiol gwaith.
• Bydd y fforwm yn lle i undebau llafur, cyflogwyr a Llywodraeth Cymru ddylanwadu ar ddatblygiad polisi perthnasol sy'n ymwneud â'r gweithlu ym mhob rhan o'r sector cyhoeddus drwy:
  • Sganio'r gorwel er mwyn deall sefyllfaoedd yn well a nodi tactegau datrys problemau, i fynd i'r afael â materion allweddol sy'n codi o fewn gweithlu'r sector cyhoeddus.
  • Deialog strategol
  • Rhannu gwybodaeth ac arferion da.
  • Tynnu sylw at broblemau cyffredin a gweithio mewn partneriaeth ar draws y sectorau i ddod o hyd i ddatrysiadau.
  • Darparu safbwynt, arweiniad a chyfarwyddyd ar y cyd.
  • Coladu ymchwil berthnasol.
• Mae'r fforwm yn dangos ymrwymiad yr holl randdeiliaid i Bartneriaeth Gymdeithasol trwy:
  • gynrychiolaeth deirochrog, sy'n gweithredu mewn partneriaeth gyfartal
  • consensws wrth bennu'r rhaglen waith, adnoddau, ymchwil yn y dyfodol, a chomisiynu ymchwil o'r fath
  • arferion ar y cyd wrth gyflawni'r rhaglen waith
  • egwyddorion aelodaeth sef bod yn agored, onestrwydd, ymddiriedaeth ac uniondeb mewn trafodaethau a pharchu safbwyntiau partneriaid eraill.
• Bydd y fforwm yn ganolbwynt ar gyfer adnoddau allweddol i sefydliadau yn y sector cyhoeddus datganoledig, eu hundebau llafur cydnabyddedig, a/neu gynrychiolwyr gweithwyr. Bydd yr adnoddau a gedwir yn cael eu cytuno mewn partneriaeth gymdeithasol.
• Bydd y fforwm yn parhau i fod yn annibynnal ar y Cyngor Partneriaeth Gymdeithasol a bydd yn pennu ei gyfeiriad ei hun. Fodd bynnag, gellir ei ddefnyddio fel adnodd ar gyfer cyngor a gwybodaeth gan y Cyngor Partneriaeth Gymdeithasol.
• Nid fforwm ar gyfer cydfargeinio, datrys anghydfodau lleol, na materion sy'n ymwneud â sectorau penodol yw hwn. Parheir i ymdrin â'r rhain drwy drefniadau lleol.
• Ni fydd y fforwm yn torri unrhyw gytundebau lleol presennol neu yn y dyfodol rhwng cyflogwyr, undebau llafur neu gynrychiolwyr gweithwyr.
• Nid yw'r fforwm yn gorff sofran, felly dim ond trwy ddylanwad ac ymrwymiad y tri phartner i weithio gyda'i gilydd y gall y fforwm sicrhau bod arferion da ac arweiniad yn cael eu rhannu a'u rhoi ar waith.