Pa reolau asesiad effaith amgylcheddol sydd yn gymwys i brosiectau ar dir, yn y môr, neu'r ddau.
Cynnwys
Cyflwyniad
Gall prosiect seilwaith arwyddocaol fod yn ddarostyngedig i'r broses Asesu Effaith Amgylcheddol (AEA).
Amlinellir y gofynion yn:
- Rheoliadau Gwaith Morol (Asesu Effeithiau Amgylcheddol) 2007
- Rheoliadau Cynllunio Gwlad a Thref (Asesu Effeithiau Amgylcheddol) (Cymru) 2017.
Mae'r rheoliadau hyn wedi cael eu diwygio gan Reoliadau Deddf Seilwaith (Cymru) 2024 (Darpariaeth Ganlyniadol) (Cymru) 2025 fel eu bod yn gymwys i'r gyfundrefn newydd.
Mae'r canllawiau hyn yn cynnwys cymhwyso'r ddwy set o reoliadau i brosiectau seilwaith arwyddocaol.
Cymhwyso ar y tir neu ar y môr
Mae'r broses ar gyfer prosiectau seilwaith arwyddocaol yn cymhwyso dwy set o reoliadau sy'n cynnwys dwy ardal. Mae Rheoliadau Gwaith Morol (Asesu Effaith Amgylcheddol) 2007 yn gymwys yn y môr tiriogaethol ac mae Rheoliadau Cynllunio Gwlad a Thref (Asesu Effaith Amgylcheddol) (Cymru) 2017 yn gymwys ar y tir. Pan fydd prosiect wedi'i gyfyngu i un ardal, dylid dilyn y rheoliadau perthnasol.
Bydd cwmpas y prosiect at ddibenion AEA yn nodi'r rheoliadau sy'n berthnasol. Gall yr amgylchedd y mae'n debygol y bydd y datblygiad yn effeithio arno'n sylweddol estyn y tu hwnt i ardal ddaearyddol y rheoliadau. Dylid ymdrin â'r effeithiau hyn yn y datganiad amgylcheddol.
Cymhwyso ar y tir a'r môr
Gall cwmpas y prosiect estyn y tu hwnt i un ardal. Pan fydd hyn yn digwydd, y bwriad yw cymhwyso Rheoliad 10 o Reoliadau Gwaith Morol (Asesu Effaith Amgylcheddol) 2007. Mae'r Rheoliad hwn yn galluogi Rheoliadau Cynllunio Gwlad a Thref (Asesu Effaith Amgylcheddol) (Cymru) 2017 i gynnwys cwmpas cyfan prosiect, gan gynnwys y rhan o'r prosiect sy'n estyn i'r môr tiriogaethol.
Bydd PEDW (Penderfyniadau Cynllunio ac Amgylchedd Cymru) yn nodi ei fod yn defnyddio'r ddarpariaeth hon fel ei bod yn glir bod y prosesau a nodir yn Rheoliadau Cynllunio Gwlad a Thref (Asesu Effaith Amgylcheddol) (Cymru) 2017 yn cael eu dilyn ar gyfer cais. Bydd hyn yn darparu sicrwydd i'r holl randdeiliaid. Bydd angen i'r asesiad gynnwys cwmpas llawn y prosiect a'r amgylchedd y mae'n debygol y bydd y datblygiad yn effeithio arno'n sylweddol.
Pan nad yw'r datganiad amgylcheddol yn darparu ar gyfer cwmpas llawn y prosiect, nid yw Rheoliad 10 yn berthnasol. Byddai hyn yn golygu y byddai'r ddwy set o reoliadau AEA yn berthnasol. Byddai hyn yn golygu y byddai'r gweithdrefnau yn y ddau reoliad yn berthnasol i'r datblygiad.
Cynghorir ymgeiswyr i ymgysylltu'n gynnar lle y gall prosiect estyn y tu hwnt i un ardal ddaearyddol.