Mae mwy na £800,000 yn cael ei ddarparu i helpu rhieni sy'n mynd drwy brosesau amddiffyn plant. Bydd hyn sicrhau bod eu lleisiau'n cael eu clywed a'u bod yn cael eu cefnogi bob cam o'r ffordd.
Wrth siarad yng Nghynhadledd Rhwydwaith Eiriolaeth Rhieni (PAN) Cymru ym Mhort Talbot, cadarnhaodd y Gweinidog Plant a Gofal Cymdeithasol, Dawn Bowden, y bydd £133,600 o'r cyllid yn cael ei ddarparu i roi'r cynllun Caffi Rhieni poblogaidd ar waith mewn rhagor o ardaloedd.
Mae'r caffis yn cynnig mannau cefnogaeth gan gymheiriaid dan arweiniad rhieni, gan helpu teuluoedd i feithrin hyder a gwytnwch.
Mae ymchwil yn dangos bod eiriolaeth i rieni yn lleihau nifer y plant sy'n mynd i ofal, yn gwella'r berthynas rhwng rhieni a gweithwyr cymdeithasol, ac yn magu hyder rhieni wrth ymgysylltu â gwasanaethau.
Mae'r buddsoddiad o £808,408 yn cynnwys cyllid parhaus ar gyfer darparwyr eiriolaeth proffesiynol y Gwasanaeth Eiriolaeth Ieuenctid Cenedlaethol (NYAS), Tros Gynnal Plant (TGP) Cymru a Mental Health Matters, ochr yn ochr â'r buddsoddiad yn null dan arweiniad cymheiriaid PAN Cymru.
Mae eiriolaeth i rieni wedi'i ymgorffori yn Rhaglen Lywodraethu Llywodraeth Cymru, sy'n cynnwys ymrwymiad clir i atal teuluoedd rhag chwalu drwy ariannu gwasanaethau eiriolaeth i rieni sydd â phlant yn rhan o brosesau amddiffyn plant.
Bydd Fframwaith Cenedlaethol newydd ar gyfer Eiriolaeth i Rieni yn cael ei ddatblygu i sicrhau cefnogaeth gyson ledled Cymru.
Dywedodd y Gweinidog Plant a Gofal Cymdeithasol, Dawn Bowden:
Mae pob un ohonom eisiau gwella'r canlyniadau er lles plant a theuluoedd ledled Cymru.
Mae PAN Cymru wedi gwneud cynnydd aruthrol o ran trawsnewid profiad teuluoedd wrth ymgysylltu â gwasanaethau cymdeithasol plant yng Nghymru.
Pan ymwelais â Chaffi Rhieni haf diwethaf, clywais rieni yn dweud eu bod wedi cael ail wynt a bod eu llesiant wedi gwella. Gall grym cymorth gan gymheiriaid newid bywydau a daeth hynny yn amlwg.
Bydd y cyllid hwn yn helpu rhagor o deuluoedd ledled Cymru i gael cymorth hanfodol, gan helpu cadw plant yn ddiogel gyda'u teuluoedd lle bynnag y bo'n bosibl.
Dywedodd Rheolwr Prosiect Cynghorol PAN Cymru, Fiona MacLeod:
Mae'r cyllid hwn yn nodi adeg arwyddocaol i PAN Cymru ac i deuluoedd ledled Cymru.
Mae'n cydnabod grym cydweithredu dan arweiniad rhieni, gyda chefnogaeth broffesiynol i gryfhau teuluoedd a chymunedau a sicrhau bod teuluoedd yn cael eu clywed o ddifrif gyda thosturi a thegwch.