Dros y degawd ddiwethaf, mae Llywodraeth Cymru wedi buddsoddi yn yr adeiladau a'r mannau a rennir y mae cymunedau yn eu defnyddio bob dydd.
Ers 2015, mae mwy na £70 miliwn wedi'i fuddsoddi drwy'r Rhaglen Cyfleusterau Cymunedol, gan gefnogi bron i 500 o brosiectau ledled Cymru. Mae'r cyllid wedi helpu sefydliadau a arweinir gan y gymuned, gan gynnwys elusennau, grwpiau gwirfoddol a mentrau cymdeithasol, i wella cyfleusterau lleol, adfer adeiladau hanesyddol a chreu mannau croesawgar, ymarferol i'w defnyddio bob dydd.
Yr wythnos hon, ymwelodd Ysgrifennydd y Cabinet dros Gyfiawnder Cymdeithasol â dau brosiect yn ardal Wrecsam a gefnogir gan y rhaglen.
Derbyniodd Canolfan Hamdden Plas Madoc yn Acrefair £500,000 yn 2016-17 a £250,000 arall yn 2021-22. Pan gaeodd y ganolfan yn 2014, ffurfiodd y trigolion lleol Ymddiriedolaeth Gymunedol Splash i’w gael yn ôl i berchnogaeth gymunedol. Heddiw, mae'n gweithredu fel canolfan gymunedol brysur sy'n cynnig nofio, dosbarthiadau ffitrwydd, cynlluniau atgyfeirio meddygon teulu, adsefydlu cardiaidd, gwasanaethau hwb sy'n cynnwys Banc Bwyd a Chyngor ar Bopeth Wrecsam a chaffi cymunedol. Mae’r hyn a oedd unwaith mewn perygl o gael ei golli bellach yn cefnogi pobl o bob oed i gadw'n egnïol a chysylltiedig.
Meddai Stella Matthews, Cadeirydd Ymddiriedolaeth Gymunedol Splash:
"Roedd cadw Plas Madoc ar agor yn bwysig i bobl leol oherwydd ei fod yn fwy na chanolfan hamdden. Dyma lle mae plant yn dysgu nofio, lle mae pobl yn ailadeiladu eu hiechyd, yn cael mynediad at wasanaethau hanfodol ar garreg y drws a lle mae cymdogion yn cwrdd. Rhoddodd gefnogaeth Llywodraeth Cymru y sefydlogrwydd i ni gynllunio ymlaen llaw a datblygu'r hyn rydyn ni'n ei gynnig. Diolch i Lywodraeth Cymru am ei chefnogaeth barhaus."
Mae Ymddiriedolaeth Treftadaeth Brymbo wedi derbyn £300,000 tuag at adfer y Siop Beiriannau ar hen safle gwaith haearn. Mae'r adeilad yn ganolog i gynlluniau i drawsnewid y safle yn ganolfan gymunedol sy'n adfer y cysylltiadau coll yn y gymuned ac yn atyniad i ymwelwyr sy'n adrodd stori anhygoel 300 miliwn o flynyddoedd o'r mesurau glo a'r goedwig ffosiledig i dreftadaeth ddiwydiannol gwaith haearn a dur Brymbo. Pan fydd yn agor yn ddiweddarach eleni, bydd y gofod wedi'i adfer yn cynnwys tŷ coffi, ardal adwerthu, ystafelloedd digwyddiadau, oriel, canolfan wirfoddoli a chyfleoedd addysg, yn ogystal â phum adeilad sy'n adrodd hanes diwydiannol, naturiol a chymdeithasol yr ardal.
Dywedodd Nicola Eaton Sawford o Ymddiriedolaeth Treftadaeth Brymbo:
"Mae hyn yn ymwneud â rhoi dyfodol i stori Brymbo, yn ogystal â chadw ei gorffennol. Trwy gydol hanes mae'r safle rhyfeddol hwn yn Wrecsam wedi ailddyfeisio ac arloesi a dyma'r trawsnewidiad diweddaraf. Mae'r cyllid wedi ein helpu i droi blynyddoedd o gynllunio yn rhywbeth go iawn y bydd pobl yn gallu ei ddefnyddio a'i fwynhau cyn bo hir."
Dywedodd Jane Hutt, Ysgrifennydd y Cabinet dros Gyfiawnder Cymdeithasol:
"Ers deng mlynedd, mae'r rhaglen hon wedi cefnogi cymunedau ledled Cymru, gan helpu i gadw adeiladau gwerthfawr ar agor, rhoi bywyd newydd i fannau gwag, a rhoi'r modd i grwpiau lleol droi cynlluniau'n realiti.
"Wrth ymweld â Phlas Madoc a Brymbo yr wythnos hon, a phrosiectau o Wynedd i Went dros y misoedd diwethaf, rwyf wedi gweld drosto fy hun beth sy'n digwydd pan fydd angerdd a phenderfyniad lleol yn cael eu cefnogi gan fuddsoddiad go iawn. Mae pobl yn creu rhywbeth anghyffredin, ac rwy'n falch bod Llywodraeth Cymru wedi sefyll ochr yn ochr â bron i 500 o gymunedau ar y daith honno."