Cynnyrch domestig gros rhanbarthol (prisiau cyfredol): Gorffennaf i Fedi 2025
Amcangyfrifon o weithgarwch economaidd o fewn gwledydd y DU a naw rhanbarth Lloegr ar gyfer Gorffennaf i Fedi 2025.
Ar y dudalen hon
Cyflwyniad
Mae Cynnyrch Domestig Gros (CDG) yn mesur gwerth y nwyddau a'r gwasanaethau a gynhyrchir yn y DU. Mae'n amcangyfrif maint a thwf yr economi.
Diweddariad am y cyhoeddiad
Ym mis Gorffennaf 2023, cyhoeddodd y Swyddfa Ystadegau Gwladol (SYG) eu bod wedi oedi eu cyhoeddiad CDG rhanbarthol chwarterol ar ôl nodi lefelau uchel o ddiwygiadau oherwydd problemau ansawdd data a dulliau ar gyfer meincnodi.
Cyhoeddodd y SYG ddiweddariad yn amlinellu newidiadau methodolegol diweddar a weithredwyd i gynhyrchu amcangyfrifon prisiau cyfredol wedi'u haddasu'n dymhorol. Mae angen gwaith pellach i wella'r dulliau hyn ac i gwblhau dulliau ar gyfer mesuriadau cyfaint cadwynog i ganiatáu amcangyfrifon mewn termau real. Mae'r SYG yn bwriadu darparu diweddariadau ddwywaith y flwyddyn cyn ailgychwyn y cyhoeddiad chwarterol hwn yn llawn.
Noder, mae cyhoeddiadau CDG rhanbarthol chwarterol blaenorol wedi defnyddio mesuriadau cyfaint cadwynog. Fodd bynnag, mae’r cyhoeddiad hwn yn defnyddio data prisiau cyfredol wedi'u haddasu'n dymhorol ac mae hwn, yn ogystal â newid yn y fethodoleg, yn meddwl nid yw’n gymaradwy â chyhoeddiadau blaenorol. Gweler cyhoeddiad y SYG am ragor o wybodaeth am y newid yn y fethodoleg.
Ystadegau swyddogol o dan ddatblygiad yw'r rhain a dylid eu trin yn ofalus. Gall y data fod yn gyfnewidiol, a dylid ystyried symudiadau chwarterol ochr yn ochr â'r duedd hirdymor.
Hyd at 28 Gorffennaf 2026, fe wnaethom barhau i gyhoeddi ein dangosyddion allbwn tymor-byr. Fodd bynnag, gan fod hyn yn debyg yn gysyniadol i CDG rhanbarthol chwarterol, dangosyddion allbynnau tymor-byr: Ionawr i Fawrth 2026 oedd ein cyhoeddiad olaf yn y gyfres hon. Yn y dyfodol, byddem yn cynghori defnyddio'r cyhoeddiad hwn i fesur newidiadau tymor-byr yn economi Cymru.
Mae'r data CDG diweddaraf yn yr adroddiad hwn ar gyfer chwarter 3 (Gorffennaf i Fedi) 2025.
Prif bwyntiau
- Amcangyfrifwyd mai cyfanswm CDG yng Nghymru oedd £22.1 biliwn.
- Y sector gweithgynhyrchu oedd y cyfrannwr mwyaf at CDG Cymru, gan gyfrannu £3.3 biliwn (15%).
- Cyfrannodd cyfanswm y diwydiannau cynhyrchu (sy'n cynnwys y sector gweithgynhyrchu) £4.4 biliwn (20%) at economi Cymru.
- Cyfrannodd cyfanswm y diwydiannau gwasanaeth £16.4 biliwn (74%).
- Roedd Adeiladu yn cyfrif am £948 miliwn (4%) ac Amaethyddiaeth, coedwigaeth a physgota yn cyfrif am £341 miliwn (2%).
