Adroddiad y Cynnig Gofal Plant dros Gymru: Medi 2023 ac Awst 2024

Seiliwyd yr adroddiad cyfredol ar y ffynonellau data canlynol:

• gwybodaeth fonitro a gasglwyd gan Lywodraeth Cymru oddi wrth rieni a darparwyr
• arolygon rhieni a darparwyr a gynhaliwyd ym mis Gorffennaf ac Awst 2023 a 2024

Prif ganfyddiadau

• Defnyddiodd cyfanswm o 21,283 o blant oriau gofal plant a ariannwyd drwy'r Cynnig.
• Yn seiliedig ar y meini prawf cymhwysedd cyfredol, rydym yn amcangyfrif bod 58% o blant cymwys wedi manteisio ar y Cynnig yn 2023-24.
• Mae darparwyr gofal plant yn cyflwyno hawliadau am daliad i Lywodraeth Cymru. Roedd tua 28% o'r hawliadau naill ai gan wasanaethau sy'n defnyddio'r Gymraeg (17.6%) neu'r ddwy iaith (10.2%).
• Roedd enillion blynyddol gros canolrifol rhieni a fanteisiodd ar y Cynnig (£30,800) yn is nag enillion blynyddol gros canolrifol oedolion sy'n gweithio'n llawn amser yng Nghymru (£34,303).
• Dywedodd mwyafrif y rhieni a ymatebodd fod y cais yn cymryd llawer o amser, a nododd lleiafrif sylweddol bod darparu'r ddogfennaeth angenrheidiol yn anodd.
• Roedd mwyafrif helaeth y rhieni (89%) eisoes yn defnyddio gofal plant ffurfiol cyn manteisio ar y Cynnig. Roedd dros 40% yn defnyddio mwy na 21 awr yr wythnos.
• Mae ymatebion arolygon y rhieni yn awgrymu mai effaith fwyaf y Cynnig yw lleihau baich ariannol gofal plant, er bod mwyafrif mawr o'r rhieni a holwyd hefyd yn nodi effeithiau cadarnhaol ar eu gallu i weithio ac ar eu lefelau lles.