Sut mae gwasanaethau adsefydlu COVID hir yn helpu claf uned gofal critigol i adfer o COVID ar ôl cyfnod hir yn yr ysbyty.
Trosolwg o’r claf
Nid oedd gan y claf 55 oed gyflyrau a oedd eisoes yn bodoli cyn dal COVID-19 ym mis Mawrth 2020.
Cafodd ei dderbyn i’r uned gofal critigol yn ei ysbyty lleol. Tra oedd yn ddifrifol wael, dioddefodd strôc. O ganlyniad, roedd ganddo wendid yn ei fraich dde a’i goes dde. Mae hefyd yn cael trafferthion o ran llyncu a chyfathrebu, ac mae’n dioddef blinder difrifol a phoen.
O’r adeg pan gafodd ei dderbyn i’r ysbyty i’r adeg pan gafodd ei ryddhau, treuliodd y claf 59 o ddiwrnodau yn yr ysbyty.
Adsefydlu’r claf
Dechreuwyd y broses adsefydlu tra oedd yn dal i fod yn yr uned gofal critigol i gefnogi ei adferiad.
Parhaodd y broses adsefydlu ar ôl ei symud i ward feddygol acíwt. Cafodd gymorth adsefydlu dwys ar ôl gadael yr uned gofal critigol er mwyn hybu ei symudedd, gwella ei anadlu a’i helpu i wneud gweithgareddau arferol pob dydd.
Cyn ei ryddhau, dysgwyd iddo sut i ddefnyddio technoleg gofal iechyd. Roedd hyn yn golygu ei fod yn gallu cael cymorth adsefydlu drwy gyfuniad o therapi wyneb yn wyneb a therapi o bell.
Ar ôl cael ei ryddhau o’r ysbyty, rhoddodd y Tîm Rhyddhau’n Gynnar ar ôl Strôc a’r Gwasanaeth Adsefydlu Niwro Cymunedol gymorth iddo yn ei gartref.
Cafodd y claf 16 wythnos o gymorth adsefydlu cymunedol dwys, gan gynnwys:
- ystod eang o ymyriadau gan gynnwys adsefydlu defnydd o’i fraich a’i goes
- ailddysgu cerdded
- rheoli ei anadlu
- therapi cyfathrebu
- therapi llyncu
- rheoli blinder
Drwy gydol y broses adsefydlu, fe’i hanogwyd i reoli a gofalu am ei iechyd ei hun er mwyn hybu ei adferiad. Fe’i hanogwyd i ddysgu sgiliau i allu rheoli ei gyflwr yn well yn y tymor hwy.
Mae’n dal i gael cymorth adsefydlu o bell gan y Gwasanaeth Adsefydlu Niwro Cymunedol. Mae hyn yn ei helpu i wella ei gerdded, ei gryfder a’i oddefiant ymarfer corff ymhellach o fewn terfynau ei flinder ôl-COVID.