Workplace recycling

Mae ailgylchu yn y gweithle yn newid

Mae'n gyfraith i bob busnes, elusen a sefydliad sector cyhoeddus i sortio eu gwastraff er mwyn ei ailgylchu.

Mae'n berthnasol i'r holl gasglwyr a phroseswyr gwastraff a deunydd ailgylchu sy'n rheoli gwastraff gweithleoedd sy'n debyg i wastraff cartrefi.

Cyflwynodd Llywodraeth Cymru y gyfraith hon i wella ansawdd y ffordd rydym yn casglu a gwahanu gwastraff a chynyddu'r gwaith hwn.

Pa wastraff sydd angen ei wahanu

Mae angen gwahanu'r deunyddiau canlynol i'w casglu ar wahân:

• Bwyd
• Papur a cherdyn
• Gwydr
• Metelau, plastig a chartonau
• Tecstilau sydd heb eu gwerthu
• Cyfarpar trydanol ac electronig gwastraff bach sydd heb eu gwerthu (sWEEE)

Mae hefyd gwaharddiad ar:

• Anfon unrhyw wastraff bwyd (o ba faint bynnag) i garthffosydd
• Gwastraff a gesglir ar wahân sy'n mynd i beiriannau llosgi a safleoedd tirlenwi
• Pob gwastraff pren sy'n mynd i safleoedd tirlenwi

I bwy mae'r gyfraith yn berthnasol

Mae angen i bob busnes, elusen a sefydliad sector cyhoeddus wahanu eu gwastraff.

Mae’r rhain yn cynnwys:

• Safleoedd amaethyddol
• Lletygarwch a thwristiaeth - bwytai, bariau, tafarndai, gwasanaethau gwely a brecwast, gwestai, gwersylloedd a pharciau carafanau, llety gwyliau, a safleoedd trwyddedig
• Meysydd sioe
• Gorsafoedd gwasanaeth a gorsafoedd petrol
• Lleoliadau adloniant a chwaraeon gan gynnwys canolfannau hamdden
• Trafnidiaeth - gorsafoedd bysiau, gorsafoedd rheilffordd, porthladdoedd, meysydd awyr a hofrenfeydd
• Cartrefi gofal a nyrsio
• Fferyllfeydd, meddygfeydd, deintyddfeydd, a lleoliadau gofal sylfaenol eraill
• Safleoedd adeiladu
• Ffatrïoedd a warysau
• Garejis ceir
• Addysg - prifysgolion, colegau ac ysgolion
• Canolfannau garddio
• Adeiladau treftadaeth
• Llyfrgelloedd ac amgueddfeydd
• Swyddfeydd a gweithdai
• Mannau addoli
• Carchardai
• Marchnadoedd a gwyliau yn yr awyr agored
• Manwerthu

Ysbytai GIG ac ysbytai preifat yw'r unig weithleoedd fydd yn cydymffurfio o fis Ebrill 2026 ymlaen.

Mae'r Cod Ymarfer yn rhoi gwybodaeth fanylach i chi am y gyfraith ailgylchu newydd yn y gweithle a sut y dylid cydymffurfio. Mae'n bwysig eich bod yn darllen hyn ochr yn ochr â'r canllawiau.

Mae gan wefan Busnes Ailgylchu WRAP ganllawiau ac adnoddau cyfathrebu y gellir eu lawrlwytho am ddim ar gyfer eich gweithle.

Pam mae'r gyfraith wedi newid 

Rydym am wella ansawdd y gwaith ailgylchu a chynyddu faint sy’n cael ei ailgylchu o weithleoedd. Mae hwn yn gam pwysig arall tuag at fod yn ddiwastraff, lleihau ein hallyriadau carbon a mynd i’r afael â’r argyfwng hinsawdd.

Rydym am barhau i ddefnyddio deunyddiau cyhyd ag y bo modd. Gyda chostau deunyddiau yn codi, bydd parhau i ddefnyddio deunyddiau o ansawdd uchel yn helpu ein heconomi ac yn cefnogi ein cadwyni cyflenwi. Er enghraifft, drwy osgoi treth tirlenwi a chreu cyfleoedd gwaith.

Ni yw'r gorau eisoes yn y DU ar gyfer ailgylchu domestig a'r trydydd gorau yn y byd.

Mae'r rheoliadau yn cefnogi'r camau gweithredu o strategaeth economi gylchol Llywodraeth Cymru Mwy nag ailgylchu.