Arolwg Diwydiant Cymru Greadigol: 2025

Mae’r arolwg hwn yn cynnwys sampl o fusnesau a gweithwyr llawrydd o'r sector sgrin, y sector cerddoriaeth, y sector digidol a'r sector cyhoeddi yng Nghymru. Mae'n dilyn 3 o arolygon blaenorol a gynhaliwyd yn 2022, 2023 a 2024, gan ganiatáu i gymariaethau gael eu gwneud rhwng blynyddoedd a helpu i nodi tueddiadau dros amser. Fodd bynnag, nodir bod meintiau'r sampl yn wahanol o ran cynrychiolaeth y sector ac felly dylid ystyried hyn wrth gymharu rhai o'r canlyniadau.

Prif ddarganfyddiadau

Cwblhawyd yr arolwg gan 604 o ymatebwyr ar draws rhanbarthau Cymru o'r sectorau canlynol:

• digidol (31%)
• cerddoriaeth (30%)
• cyhoeddi (22%)
• sgrin (17%)

Pan ofynnwyd iddynt am statws cyflogaeth roedd:

• 48% o'r ymatebwyr wedi'u nodi fel perchnogion busnes neu gyfarwyddwyr
• 24% wedi'u nodi fel hunangyflogedig
• 20% wedi'u nodi fel cyflogeion
• 8% wedi'u nodi fel gweithwyr llawrydd

Mae tueddiadau trosiant busnes yn parhau i fod yn ddigyfnewid i raddau helaeth ers 2024, gyda:

• 25% o fusnesau yn gweld cynnydd mewn trosiant
• 25% yn profi gostyngiad
• 50% yn gweld dim newid

Roedd costau cynyddol yn ffactor a nodwyd yn aml a oedd yn cyfrannu at newidiadau mewn trosiant yn 2025, yn enwedig ymhlith gweithwyr llawrydd a sefydliadau llai.

Roedd ymatebwyr yn fwy hyderus na pheidio am redeg eu busnes yn broffidiol. Dangosodd y sector digidol yr hyder mwyaf o'i gymharu â lefelau is yn y sectorau sgrin a cherddoriaeth.

Dywedodd tua 8 o bob 10 ymatebydd (79%) nad oeddent wedi derbyn unrhyw gyllid allanol yn y flwyddyn ariannol ddiwethaf. Ymhlith y rhai a oedd wedi cael gafael ar gyllid, y ffynonellau mwyaf cyffredin oedd:

• Cymru Greadigol neu Lywodraeth Cymru
• grantiau'r cyngor
• Chyngor Celfyddydau Cymru

Yn 2025, nododd 78% o fusnesau nad oedd unrhyw weithgaredd recriwtio yn y 12 mis blaenorol. Lle digwyddodd recriwtio, roedd yn bennaf ar lafar, ffynonellau ar-lein, a'r cyfryngau cymdeithasol. Ymhlith y rhai oedd yn recriwtio, roedd prinder sgiliau a chyfyngiadau cyflog yn heriau oedd yn cael eu hadrodd yn aml.

Y meysydd mwyaf cyffredin o fylchau sgiliau oedd:

• sgiliau technegol sector-benodol
• sgiliau digidol a thechnoleg
• marchnata a brandio
• rheoli ac arweinyddiaeth

Mae ymwybyddiaeth o Gymru Greadigol yn parhau i fod yn uchel ar 71% yn 2025, yn gyson â'r blynyddoedd blaenorol (67% yn 2024 a 61% yn 2023).

Mae blaenoriaethau cymorth yn y dyfodol yn cynnwys:

• cymorth ariannol (43%)
• cyfleoedd rhwydweithio (20%)
• help gyda marchnata, hyrwyddo a gwelededd (19%)
• chymorth a chyngor busnes (13%)