Byrddau cynhwysol ar waith

Mae meithrin diwylliant y bwrdd lle mae pob aelod yn teimlo ei fod yn cael ei weld, ei glywed ac yn gallu gwneud cyfraniad ystyrlon yn hanfodol i lywodraethu teg ac effeithiol. Mae’r canllaw Byrddau Cynhwysol Ar Waith yn darparu canllawiau clir ac ymarferol i helpu byrddau i leihau rhagfarn ddiarwybod a chreu amgylcheddau lle gall talent amrywiol ffynnu go iawn.

Mae’r adnodd, a ddatblygwyd i gefnogi Cynllun Gweithredu Cymru Wrth-hiliol a’r Strategaeth Adlewyrchu Cymru wrth Redeg Cymru, yn nodi’r ymddygiadau a’r penderfyniadau bob dydd sy’n cryfhau cynhwysiant – nid fel arwydd tocynistaidd, ond fel rhan greiddiol o arweinyddiaeth gyfrifol.

Archwiliwch sut y gall eich bwrdd wneud penodiadau teg, croesawu aelodau newydd yn hyderus, a meithrin diwylliant lle mae galluogrwydd yn cael ei gydnabod a phawb yn cael eu grymuso i lwyddo.

Bod yn glir am yr hyn rydych chi’n chwilio amdano

Osgowch ofynion amwys fel “rhaid meddu ar brofiad ar fwrdd” oni bai bod hynny’n hanfodol. Ystyriwch sgiliau trosglwyddadwy a phrofiad bywyd nad ydynt, o bosibl, wedi dod trwy lwybrau traddodiadol. Cydnabyddwch brofiad anweithredol o arweinyddiaeth gymunedol, ymgyrchu, ymgysylltu â’r cyhoedd, neu ymgynghori. 

Ar Waith

Cyflwynodd Epic Games “Reol Bwrw Golwg Arall” fel rhan o’u strategaeth recriwtio. Mae’r rheol yn annog aelodau’r panel recriwtio a rheolwyr cyflogi i oedi cyn diystyru ymgeiswyr nad ydynt yn dod o gefndir tebyg iddynt hwy eu hunain neu nad ydynt yn meddu ar broffil arferol ar gyfer y rôl. Boed hynny wrth ddarllen CV neu mewn cyfweliad, fe’u hanogir i gymryd eiliad a bwrw golwg arall – gan ofyn iddynt hwy eu hunain a allai rhagfarn ddiarwybod fod yn dylanwadu ar eu penderfyniad. 

Mae’r ymyrraeth syml hon yn arafu’r broses ddigon i wneud lle ar gyfer asesiadau tecach, mwy gofalus, a sicrhau ystyriaeth ehangach o ymgeiswyr sy’n meddu ar brofiadau a safbwyntiau gwahanol.

Ysgrifennu disgrifiadau rôl cynhwysol

Defnyddiwch iaith glir, gynhwysol. Osgowch jargon a chymwysterau diangen. Ysgrifennwch yn yr ail berson (“byddwch chi’n meddu ar...”) ac amlinellwch yn glir ymrwymiad y bwrdd i amrywiaeth – nid yn unig mewn troednodyn ond trwy’r hysbyseb yn ei chyfanrwydd.

Ar Waith

Mae Johnson & Johnson yn defnyddio offer ysgrifennu a bwerir gan AI fel Textio i gael gwared ar dermau sy’n allgáu neu sydd â chysylltiad penodol o ran rhywedd, ac i greu swydd-ddisgrifiadau cynhwysol.

Hyrwyddo cyfleoedd yn eang

Hysbysebwch y swydd y tu hwnt i sianeli arferol. Defnyddiwch rwydweithiau amrywiol, sefydliadau cymunedol, a llwyfannau wedi’u targedu at grwpiau sydd wedi’u tangynrychioli. Manteisiwch ar rwydweithiau presennol yn eich sector neu ranbarth.  Trefnwch sesiynau gwybodaeth rhithwir fel y gall pobl ddysgu mwy am y rolau, darganfod sut i wneud cais, a chwrdd ag aelodau presennol y bwrdd.

Ar Waith

Mae Transport for London yn cydweithio ag ysgolion, colegau a phrifysgolion i gyrraedd pobl ifanc a chymunedau sydd wedi’u tangynrychioli trwy ymgyrchoedd wedi’u targedu ac allgymorth STEM.

Defnyddio paneli amrywiol a hyfforddedig

Rhaid i baneli penodiadau cyhoeddus adlewyrchu cymysgedd o gefndiroedd a safbwyntiau, a bod wedi’u hyfforddi ar ragfarn ddiarwybod ac i ddeall hiliaeth, gwrth-hiliaeth a sut y gall anghydraddoldebau strwythurol ddod i’r amlwg yn ystod y broses benodi. 

Er mwyn cefnogi hyn, mae’r Tîm Penodiadau Cyhoeddus wedi ymrwymo i adolygu a chryfhau ei ganllawiau a’i brosesau panel ar gyfer penodiadau cyhoeddus gan sicrhau eglurder, tryloywder a chynhwysiant ar bob cam. Mae hyn yn cynnwys datblygu offer fel fframweithiau sgorio strwythuredig, disgwyliadau cliriach ar gyfer ymddygiad y panel, ystyried dulliau asesu amgen a chanllawiau i leihau rhagfarn mewn asesiadau a thrafodaethau.

Herio barn ar ba mor “addas” yw unigolyn

Osgowch lunio barn oddrychol ar ba mor “addas” yw unigolyn. Gallai hyn adlewyrchu rhagfarn ddiarwybod ac allgáu ymgeiswyr sy’n cynnig ffyrdd amrywiol a gwerthfawr o feddwl. Yn hytrach, gofynnwch: “Pa werth unigryw mae’r person hwn yn ei ychwanegu at ein bwrdd?”

Ar Waith

Mae Google yn hyfforddi paneli i werthuso ymgeiswyr ar sail gwerthoedd a’u gallu i ddatrys problemau, yn hytrach na chydymffurfiaeth ddiwylliannol.

Cynnig cefnogaeth drwy gydol y broses

Gwnewch addasiadau gweladwy a hygyrch ar bob cam. Cynigiwch ddogfennau mewn iaith glir, galwadau arweiniad, a fformatau amgen ar gyfer cyfweliadau.

Ar Waith

Mae HSBC yn defnyddio offer cymorth a llinellau cymorth a yrrir gan AI i helpu ymgeiswyr – yn enwedig ymgeiswyr niwrowahanol – i lywio’r broses recriwtio gyda mwy o hyder.

Gweithredu’n gadarnhaol lle caniateir hynny

Pan fo ymgeiswyr yn gyfartal o ran teilyngdod, penodwch yr unigolyn o’r grŵp sydd wedi’i dangynrychioli. Mae hyn yn gyfreithlon a gall helpu i adeiladu byrddau amrywiol wrth gynnal tegwch.

Mae’n hanfodol bod paneli yn derbyn hyfforddiant ar y defnydd cyfreithlon o weithredu cadarnhaol o dan Ddeddf Cydraddoldeb 2010 a’u bod yn deall y gwahaniaeth rhwng gweithredu cadarnhaol (cam rhagweithiol ond cyfreithlon) a gwahaniaethu cadarnhaol (sy’n parhau i fod yn anghyfreithlon). Mae’r wybodaeth hon yn galluogi penderfyniadau hyderus, moesegol ac effeithiol.

Ar Waith

Mae Bwrdd y BBC wedi defnyddio camau gweithredu cadarnhaol yn agored a thryloyw, gyda negeseuon clir i leihau stigma a chamddealltwriaeth.

Cael cynefino yn iawn

Sicrhewch eich bod yn teilwra darpariaeth gynefino i anghenion unigol. Cynigiwch ‘gyfeillion’ bwrdd, trefniadau ymsefydlu hyblyg a deunyddiau hygyrch. Anogwch sgyrsiau o’r dechrau i feithrin ymdeimlad o berthyn.

Ar Waith

Mae Asiantaeth yr Amgylchedd yn defnyddio proffiliau ymddygiadol opsiynol a sgyrsiau cynefino wedi’u teilwra i gefnogi aelodau’r bwrdd o’r diwrnod cyntaf. Mae hyn yn arbennig o ddefnyddiol i’r rheini y mae rolau bwrdd yn newydd iddynt ac unigolion niwrowahanol.

Hyrwyddo amrywiaeth meddwl

Anogwch wahanol ffyrdd o gyfathrebu, meddwl a chyfrannu. Crëwch le i fyfyrio a chynhwyswch ystod o leisiau wrth wneud penderfyniadau allweddol.

Ar Waith

Fe wnaeth “Project Aristotle” Google  ganfod mai diogelwch seicolegol yw prif ragfynegydd llwyddiant tîm – lle mae unigolion yn teimlo’n ddigon diogel i leisio barn, cymryd risgiau a rhannu syniadau heb fod ofn embaras na chael eu gwrthod. Mae hyn yn arbennig o bwysig ar gyfer meithrin amrywiaeth meddwl.

Mae PwC yn cefnogi diogelwch seicolegol a chynhwysiant trwy annog sgyrsiau agored rheolaidd am amrywiaeth a chynhwysiant trwy fforymau staff, arolygon a thrafodaethau pwrpasol. Mae’r rhain yn helpu wrth fynd i’r afael â heriau, olrhain cynnydd a meithrin diwylliant lle y cymerir camau gweithredol i annog a gwerthfawrogi safbwyntiau amrywiol.

Ymgorffori ymddygiadau cynhwysol

Sylwch ar ficroymosodiadau a rhagdybiaethau, a’u herio. Sicrhewch eich bod yn cylchdroi rolau mewn cyfarfodydd. Gofynnwch: “Llais pwy sydd ar goll?”

Ar Waith

Mae GoDaddy yn hyfforddi ei arweinwyr i nodi ymddygiadau sy’n allgáu ac yn cynnal sgyrsiau rheolaidd ar feithrin ymdeimlad o berthyn.

Normaleiddio mentora o chwith a sgyrsiau diogel

Galluogwch uwch-aelodau’r bwrdd i gael eu mentora gan unigolion o gefndiroedd sydd wedi’u tangynrychioli. Cynigwch leoedd anffurfiol i drafod hil, anabledd, rhywedd a phrofiad bywyd.

Ar Waith

Fe wnaeth Bank of America ddechrau trefnu “Sgyrsiau Dewr” rheolaidd er mwyn meithrin deialog agored i bontio gwahaniaethau a chynyddu empathi ar draws y sefydliad. Mae’r sgyrsiau yn darparu man diogel lle nad oes rhaid i aelodau fod ofn defnyddio’r derminoleg anghywir.

Gosod amcanion a dangosyddion perfformiad allweddol cynhwysol

Sicrhewch eich bod yn cynnwys amcanion mesuradwy ar gyfer cynhwysiant – megis mentora, allgymorth neu recriwtio cynhwysol – yn nisgwyliadau perfformiad aelodau’r bwrdd. Lle bo’n amlwg bod grwpiau ethnig wedi’u tangynrychioli, dylai byrddau ystyried gosod targedau clir â therfyn amser i fynd i’r afael â hyn. Mae Llywodraeth Cymru wedi defnyddio’r dull hwn yn llwyddiannus i ysgogi cynnydd mewn meysydd lle gwelir anghydraddoldeb parhaus.

Ar Waith

Mae Channel 4 yn dal ei uwch-arweinwyr a’r bwrdd yn atebol am ymddygiad cynhwysol ac yn cyhoeddi diweddariadau rheolaidd ar gynnydd.

Mae’r Admiral Group, sydd â’i bencadlys yng Nghaerdydd, wedi sefydlu gweithgorau mewnol ar amrywiaeth a chynhwysiant sy’n dylanwadu’n uniongyrchol ar bolisïau, mentrau a phrofiadau gweithwyr. Mae’r grwpiau hyn yn helpu i sicrhau bod penderfyniadau ar bob lefel yn cael eu gwneud ar sail gwerthoedd cynhwysol. Mae Admiral hefyd yn olrhain cynnydd yn erbyn ei ymrwymiadau amrywiaeth a chynhwysiant, ac yn cynnwys gweithwyr yn y broses o lunio’r camau nesaf.

Dathlu a gwerthfawrogi talent amrywiol

Cyflwynwch a disgrifiwch aelodau’r bwrdd ar sail eu cryfderau a’u harbenigedd – nid eu hamrywiaeth yn unig. Crëwch lwybrau i aelodau amrywiol arwain is-bwyllgorau neu gynrychioli’r bwrdd yn gyhoeddus.

Ar Waith

Mae Awdurdod Llundain Fwyaf yn tynnu sylw yn eu gwaith cyfathrebu at gefndir proffesiynol a chyflawniadau unigolion sydd newydd eu penodi er mwyn symud y naratif o gynrychiolaeth i gyfraniad.

Mae Moneypenny, cwmni o Ogledd Cymru sy’n cael ei gydnabod am ei ddiwylliant gweithle blaengar, yn rhoi pwyslais cryf ar lesiant gweithwyr ac arweinyddiaeth gynhwysol. Mae ffocws y cwmni ar gymorth personol, cyfathrebu agored a dathlu cryfderau amrywiol wedi helpu i greu gweithle lle mae pobl yn teimlo eu bod yn cael eu parchu, eu gwerthfawrogi ac yn gallu ffynnu.