Cyfarfod Bwrdd Cyflawni’r Corff Cenedlaethol ar gyfer Gwaith Ieuenctid yng Nghymru: 9 Mehefin 2026

• Ruth Meadows (Cadeirydd), Cyfarwyddwr Addysg Drydyddol, Llywodraeth Cymru (RM)
• Sharon Davies, Pennaeth Addysg, Cymdeithas Llywodraeth Leol Cymru (ShD)
• Steve Davis, Prif Swyddog Ieuenctid, Cyngor Sir Penfro (SD)
• Steve Drowley, Cadeirydd, Safonau Addysg Hyfforddiant Cymru (SDr)
• Paul Glaze, Prif Weithredwr, Cyngor Cymreig y Gwasanaethau Ieuenctid Gwirfoddol (PG)
• Loren Henry, Prif Weithredwr, Cylch Trefol (LH)
• Catherine Taylor, Prif Swyddog Ieuenctid, Cyngor Sir Ddinbych (CT)
• Dyfan Evans, Pennaeth Y Gangen Ymgysylltu ag Ieuenctid, Llywodraeth Cymru (DE)
• Victoria Allen, Uwch-reolwr Strategaeth Gwaith Ieuenctid, Llywodraeth Cymru (VA)
• Bethan Langmay, Rheolwr Strategaeth Gwaith Ieuenctid, Llywodraeth Cymru (BL)

Ymddiheuriadau

• Siân Lewis, Prif Weithredwr, Urdd Gobaith Cymru (SL)
• Jo Trott, Dirprwy Gyfarwyddwr, Llwybrau Dysgwyr, Llywodraeth Cymru (JT)

Croesawyd aelodau’r Bwrdd i'r cyfarfod gan RM. Ni ddatganwyd unrhyw wrthdaro rhwng buddiannau.

Cymeradwywyd y cofnodion a’r camau gweithredu o’r cyfarfod blaenorol gan y Bwrdd Cyflawni.

Cam Gweithredu: Swyddogion i gyhoeddi cofnodion y cyfarfod a gynhaliwyd ar 23 Ebrill 2026 ar wefan Llywodraeth Cymru.

Dywedodd swyddogion nad yw’r amserlen gyffredinol wedi newid rhyw lawer. Nododd aelodau’r Bwrdd Cyflawni yr estyniad bach i’r amserlen er mwyn gallu ymgysylltu â Gweinidogion a chyfathrebu ymhellach â’r sector.

Roedd aelodau’r Bwrdd Cyflawni a oedd yn gweithredu fel cadeiryddion ac is-gadeiryddion ar gyfer dau is-grŵp a sefydlwyd yng ngwanwyn 2026 i ystyried materion sy’n ymwneud â llywodraethu ac atebolrwydd, a chyllid ac adnoddau, yn crynhoi’r prif bwyntiau a godwyd gan aelodau’r is-grwp.

O ran llywodraethu ac atebolrwydd, pwysleisiodd aelodau’r is-grŵp y dylai’r trefniadau adlewyrchu gwerthoedd gwaith ieuenctid. Pwysleisiodd aelodau’r is-grŵp yr angen i’r trefniadau hynny fod yn dryloyw ac yn gynhwysol, gyda llinellau atebolrwydd clir i Lywodraeth Cymru a’r sector ehangach. Pwysleisiodd y cyfranogwyr bwysigrwydd gwreiddio cyfranogiad ystyrlon gan bobl ifanc mewn strwythurau llywodraethu, gan gynnwys ystyried aelodaeth y Bwrdd i bobl ifanc rhwng 18 a 25 oed. 

O ran cyllid ac adnoddau, nodwyd bod aelodau’r is-grwpiau wedi tynnu sylw at werth y Corff Cenedlaethol ar gyfer Gwaith Ieuenctid o ran darparu trosolwg cenedlaethol cliriach o gyllid a darpariaeth. Byddai hyn, yn ei dro, yn cefnogi sefydliadau i gynllunio, darparu a gwerthuso gwasanaethau’n fwy effeithiol, gan alluogi gwell cydgysylltu ac effaith ledled Cymru. Yn ogystal, cynigiodd yr is-grŵp y dylai’r Corff Cenedlaethol ar gyfer Gwaith Ieuenctid chwarae rhan allweddol yn y gwaith o eiriol ar ran y sector, cefnogi ymchwil a datblygu, a hwyluso’r gwaith o rannu arferion gorau.

Diolchodd aelodau a swyddogion y Bwrdd Cyflawni i holl aelodau’r is-grŵp am eu cyfraniadau at y trafodaethau hyn.

Cefnogwyd y strwythur ymgynghori arfaethedig a gyflwynwyd gan swyddogion yn fras gan aelodau’r Bwrdd Cyflawni. Tynnodd yr Aelodau sylw at bwysigrwydd defnyddio iaith glir a hygyrch, a gwreiddio ystyriaethau sy’n ymwneud â’r Gymraeg drwyddi draw. Pwysleisiodd y Bwrdd yr angen i ymgysylltu â’r sector ochr yn ochr ag unrhyw ymgynghoriad.

Cadarnhaodd swyddogion y bydd cyfarfod nesaf y Bwrdd Cyflawni yn cael ei gynnal ar 10 Medi 2026 mewn fformat hybrid, gyda’r dewis o fod yn bresennol naill ai wyneb yn wyneb neu ar-lein.

Nododd y Bwrdd y gofrestr risg a’r deunyddiau briffio.