Cael help i dalu eich morgais gyda benthyciad ecwiti a rennir Cymorth i Aros

Gall cynllun Cymorth i Aros - Cymru gynnig cymorth i'r rhai sydd naill ai:

• yn cael anhawster ariannol i dalu eu morgais presennol
• yn wynebu anhawster ariannol i dalu eu morgais presennol

Mae'r cynllun yn cynnig cymorth i berchnogion tai ar ffurf benthyciad ecwiti a rennir. 

Benthyciad ecwiti a rennir yw pan fydd benthyciwr yn cytuno i roi benthyciad i chi ochr yn ochr â'ch benthyciwr morgeisi presennol yn gyfnewid am gyfran o unrhyw elw pan fyddwch yn gwerthu'ch tŷ neu'n ad-dalu'r benthyciad. 

Gall benthyciad ecwiti a rennir helpu i leihau eich taliadau morgais misol presennol i lefel fforddiadwy a chaniatáu i chi barhau i fod yn berchen ar eich cartref a byw ynddo. Bydd hefyd yn rhoi amser i chi ddatrys eich problemau ariannol, gan leihau'r risg o adfeddiannu.

Fel rhan o'r broses ymgeisio, bydd ymgeiswyr cymwys yn cael cynnig cymorth gan Gynghorydd Ariannol Annibynnol a fydd yn cynnal asesiad ariannol. Bydd yr asesiad yn seiliedig ar amgylchiadau penodol eich aelwyd a bydd yn helpu i benderfynu ar yr opsiwn mwyaf priodol sydd ar gael i chi.

Os mai'r opsiwn mwyaf priodol yw benthyciad ecwiti a rennir a'ch bod yn gymwys ar ei gyfer, bydd eich cais yn symud ymlaen o dan y cynllun.

1. Gwirio pwy sy'n gymwys 

Cyn bwrw ymlaen, dylech sicrhau eich bod yn bodloni meini prawf cymhwysedd y cynllun.

2. Siaradwch â'ch benthyciwr presennol

Os ydych yn bodloni'r meini prawf cymhwysedd, dylech gysylltu â'ch benthyciwr morgais presennol i weld a allant eich helpu.

3. Cael cyngor ar ddyledion

Os na all eich benthyciwr morgeisi presennol helpu, yna dylech ofyn am gyngor ar ddyledion gan asiantaeth cyngor ar ddyledion a fydd yn gweithio gyda chi i lunio cynllun datrys dyledion.

4. Cyflwyno cais

Ar ôl cwblhau'r holl gamau yn y rhestr wirio, gallwch wneud cais i'r cynllun.

Nod cynllun Cymorth i Aros - Cymru yw gweithio ochr yn ochr â chymorth a gynigir gan eich benthyciwr morgeisi ac yn unol â Siarter Morgeisi y DU.

I fod yn gymwys am y cynllun, rhaid:

• eich bod yn cael anhawster, neu'n wynebu anhawster i dalu eich morgais 
• eich bod mewn perygl o golli eich cartref
• mai dim ond eich morgais presennol sydd wedi'i sicrhau yn erbyn eich eiddo
• bod gennych gyfanswm incwm cartref o lai na £67,000 y flwyddyn

Yn ogystal, mae'n rhaid i'r eiddo fod:

• yng Nghymru
• yn werth llai na £300,000
• yr unig eiddo rydych chi'n berchen arno

Ni fyddwch yn gymwys ar gyfer y cynllun os:

• oes gennych fwy nag un benthyciad wedi'i sicrhau yn erbyn eich cartref, er enghraifft ail arwystl neu orchymyn arwystl
• nad yw eich cais yn cael ei gwblhau gan holl berchnogion y cartref

Cyn gwneud cais o dan y cynllun, mae'n rhaid i chi gysylltu â'ch benthyciwr morgeisi presennol i drafod eich sefyllfa ariannol ac i weld a all eich helpu.

Os na all eich benthyciwr morgeisi presennol helpu, yna dylech ofyn am gyngor am ddim gan asiantaeth cyngor ar ddyledion a fydd yn adolygu eich sefyllfa ariannol ac yn llunio cynllun datrys dyledion.  Bydd y cynllun hwn yn cynnwys: 

• gwybodaeth am unrhyw ddatrysiadau y maen nhw'n meddwl sy'n iawn i chi a sut y gallwch chi eu rhoi ar waith
• cynllun cyllideb misol fel eich bod yn gwybod beth sydd gennych i'w wario
• cyngor ar sut i ddelio â'r bobl y mae arnoch arian iddynt
• ffyrdd y gallwch gynyddu eich incwm neu leihau eich gwariant
• gwybodaeth am yr hyn fyddai'n digwydd pe na baech yn talu'ch dyledion

Pan fyddwch yn gwneud cais i'r cynllun mae'n rhaid i chi gynnwys eich cynllun datrys dyledion gyda'ch cais. 

Mae Cymorth i Aros – Cymru yn gweithio'n agos gyda'r asiantaeth cyngor ar ddyledion PayPlan, ond gallwch ddefnyddio unrhyw asiantaeth cyngor ar ddyledion am ddim.

Mae gwefan Helpwr Arian yn darparu opsiynau eraill i ddod o hyd i wasanaeth cyngor ar ddyledion am ddim.

I wneud cais, rhaid i chi lenwi a chyflwyno'r ffurflen gais Cymorth i Aros. 

Gellir dod o hyd i wybodaeth am sut i lenwi'r ffurflen gais ar y ffurflen ei hun.

Cyn cyflwyno ffurflen gais, rhaid i ymgeiswyr wneud yn siŵr eu bod:

• wedi darllen a dilyn y canllawiau yn y Cymorth i Aros - Cymru: canllawiau i ymgeiswyr
• wedi derbyn cyngor ar ddyledion gan asiantaeth cyngor ar ddyledion ac wedi derbyn eich cynllun datrys dyledion ganddynt
• sicrhau bod holl berchnogion cofrestredig eich cartref wedi llofnodi'r ffurflen gais

Os oes gennych unrhyw gwestiynau am ganllawiau'r cynllun neu lenwi'r ffurflen gais, cysylltwch â ni drwy applications@helptostay.wales.

Am ragor o wybodaeth ac ymholiadau cyffredinol, cysylltwch â ni yn:

Mae rhagor o wybodaeth am broses ymgeisio'r cynllun a'r cymorth sydd ar gael yn Cymorth i Brynu - Cymru: canllawiau ar gyfer ymgeiswyr.