Dangosyddion allbynnau tymor-byr: Ionawr i Mawrth 2023

Mae’r amcangyfrifon yma yn cwmpasu’r cyfnod Ionawr i Mawrth 2023 ac amcangyfrifon blynyddol ar gyfer y cyfnod Ebrill 2022 i Mawrth 2023.

Gall amcangyfrifon ar gyfer chwarteri unigol amrywio, ac mae amcangyfrifon ar gyfer Cymru yn tueddu i fod yn fwy cyfnewidiol nag ar gyfer y DU, felly argymhellir ystyriaeth o dueddiadau a chymariaethau tymor hwy.

Ffigur 1: Dangosyddion allbynnau tymor-byr, Ionawr 2001 i Mawrth 2023

Image

Disgrifiad o Ffigur 1: Dengys y siart y gyfres amser ar gyfer mynegai cynhyrchu, adeiladu a gwasanaethau’r farchnad ers 2000. Y tueddiad ar y cyfan yw bod y mynegai gwasanaethau’r farchnad a chynhyrchu wedi cynyddu ers 2000, tra bo’r mynegai adeiladu wedi amrywio dros yr un cyfnod amser. Gwelwyd gostyngiad sylweddol ym mhob mynegai yn Chwarter 2 2020 yn sgil pandemig y coronafeirws, ond maent wedi adfer rhywfaint neu’n llwyr ers hynny.

Ffynhonnell: Dangosyddion allbynnau tymor-byr, Llywodraeth Cymru a Swyddfa Ystadegau Gwladol (SYG)

Prif bwyntiau

Cynyddodd pob un o’r tri mynegai ar gyfer Cymru yn flynyddol; y pedwar chwarter diweddaraf (Ebrill 2022 i Mawrth 2023). Yn chwarterol, dangosodd adeiladu a gwasanaethau marchnata gynnydd tra bod  cynhyrchu yn dangos gostyngiad. Mae hyn yn dilyn cyfnod o newid gyda’r gostyngiadau chwarterol mwyaf ar gofnod ym mis Ebrill i fis Mehefin 2020 (a oedd yn cynnwys rhan o gyfnod cychwynnol y cyfyngiadau symud) a'r cynnydd mwyaf dilynol a gofnodwyd yn ystod gorffennaf i Fedi 2020 (sy'n adlewyrchu llacio'r cyfyngiadau dros fisoedd yr haf).

Mynegai Gwasanaethau Marchnata

• Mae'r duedd tymor-hir yn dangos cynnydd o 1.9% yng Nghymru a chynnydd o 2.9% yn y DU yn y flwyddyn hyd at fis Mawrth 2023, o'i gymharu â'r deuddeg mis blaenorol.
• Yng Nghymru, gwelwyd cynnydd mewn chwech allan o’r naw mynegai diwydiant Gwasanaethau’r Farchnad dros y flwyddyn.
• Mae’r Mynegai Gwasanaethau Marchnata ar gyfer Cymru yn dangos cynyddu o 0.5% wrth gymharu’r chwarter cyfredol a’r un flaenorol. Cynyddodd allbwn y DU 0.5%, dros yr un cyfnod.

Mynegai Cynhyrchu

• Mae'r duedd tymor-hir yn dangos cynnydd o 0.4% ar gyfer Cymru a gostyngiad o 3.0% ar gyfer y DU yn y flwyddyn hyd at fis Mawrth 2023, o'i gymharu â'r deuddeg mis blaenorol.
• Mae’r Mynegai Cynhyrchu ar gyfer Cymru yn dangos gostyngiad o 3.4% o’i gymharu â’r chwarter blaenorol. Cynyddodd allbwn y DU 0.1%, dros yr un cyfnod.

Mynegai Adeiladu

• Mae'r duedd tymor-hir yn dangos cynnydd o 20.5% ar gyfer Cymru a chynnydd o 5.6% ar gyfer y DU yn y flwyddyn hyd at fis Mawrth 2023, o'i gymharu â'r deuddeg mis blaenorol.
• Mae’r Mynegai Adeiladu ar gyfer Cymru yn dangos cynnydd o 8.7% wrth gymharu’r chwarter cyfredol â’r un blaenorol. Cynyddodd allbwn y DU 0.4% dros yr un cyfnod.

Dyfodol y Cyhoeddiad hwn

Ym mis Mai 2023 gwnaethom rannu ein cynlluniau i roi'r gorau i gyhoeddi'r datganiad hwn gan fod y SYG yn cyhoeddi data cynnyrch mewnwladol crynswth chwarterol (GDP) ar gyfer Cymru a rhanbarthau Lloegr. Fodd bynnag, mae'r SYG wedi cyhoeddi ers hynny eu bod wedi oedi eu cyhoeddiad GDP rhanbarthol chwarterol. O ganlyniad, byddwn yn parhau i gyhoeddi‘r dangosyddion allbynnau tymor-byr yma yn ystod y cyfnod hwn, er mwyn sicrhau nad oes bwlch yn argaeledd data economaidd i Gymru. Byddwn yn parhau i roi gwybod i ddefnyddwyr am ein cynlluniau.