Rebecca Evans AS, Ysgrifennydd y Cabinet dros yr Economi, Ynni a Chynllunio
Heddiw, rwyf wedi cyhoeddi'r argraffiad cyfunol cyntaf o adroddiad Cynhyrchu Ynni a Defnydd Ynni yng Nghymru, sef yr adroddiad blynyddol diweddaraf yn ein cyfres o adroddiadau Cynhyrchu / Defnyddio Ynni yng Nghymru, ac rwy'n falch o'r cynnydd sy'n cael ei wneud yng Nghymru ar draws yr holl dechnolegau ynni adnewyddadwy.
Ein targed yw bod cynhyrchu trydan adnewyddadwy yn cwrdd â 70% o'n defnydd erbyn 2030 a 100% erbyn 2035. Yn 2024, roedd cynhyrchu adnewyddadwy yn cyfateb i 54% o'r defnydd o drydan.
Yn 2024 gosodwyd 4.3GW o gapasiti ynni adnewyddadwy yng Nghymru a chynhyrchodd gosodiadau 10GWh o drydan yn 2024, digon i bweru miloedd o gartrefi am flwyddyn. Mae'r capasiti hwn, ochr yn ochr â'r llwyddiannau diweddar ar draws technolegau yn Rownd 7 Ocsiwn Contractau ar gyfer Gwahaniaeth Llywodraeth y DU yn dangos bod ein dull yn gweithio. Bydd y llwyddiannau hyn yn denu mwy o ynni gwyrdd i Gymru a gall y swyddi, y sgiliau a'r cyfleoedd cadwyni cyflenwi sy'n gysylltiedig â hyn hefyd fod o fudd i Gymru ar lefelau lleol.
Mae'r Llywodraeth Cymru wedi ymrwymo i gefnogi cynhyrchu ynni lleol sy'n eiddo i gymunedau lleol. Yn 2023 cododd Llywodraeth Cymru ei tharged perchnogaeth leol ar gyfer ynni adnewyddadwy i 1.5 GW erbyn 2035. Ar 0.99 GW ar ddiwedd 2024, mae Cymru eisoes 66% o'r ffordd tuag at ei tharged newydd ac mae ein grant Ynni Cymru llwyddiannus yn darparu cyllid i gadw'r momentwm tuag at ein targed.
Mae ein nodau yn uchelgeisiol, gyda gweledigaeth i Gymru gynhyrchu 100% o ynni adnewyddadwy a fydd yn diwallu ein hanghenion yn llawn erbyn 2035. Er bod cyfanswm y defnydd o ynni wedi gostwng i 83.2 TWh yn 2023, rhagwelir y bydd y galw am drydan yn cynyddu ac rydym yn gweithio'n galed i osod sylfaen gadarn i Gymru gael cymysgedd ynni gwydn sy'n sicrhau bod y manteision yn cael eu cadw yng Nghymru.
Mae'r adroddiad hwn yn tynnu sylw at y gwaith rhagorol sy'n digwydd ledled Cymru, nid yn unig gan Lywodraeth Cymru, ond gan bobl a busnesau Cymru sy'n gwneud eu rhan i sicrhau dyfodol mwy gwydn.