Vaughan Gething, Ysgrifennydd y Cabinet dros Iechyd, Llesiant a Chwaraeon
Cyhoeddwyd y cynnwys hwn dan weinyddiaeth Llywodraeth Cymru 2016 i 2021
Mae’n ofynnol i fyrddau iechyd ac ymddiriedolaethau gynhyrchu'r cynlluniau tymor canolig integredig yn flynyddol.
Mae datblygiad Fframwaith Cynllunio'r GIG ar gyfer 2018/21 yn rhoi cyfarwyddyd pellach ynghylch cynhyrchu cynlluniau tymor canolig integredig clir y mae modd eu cyflawni. Eleni, mae'n hanfodol ein bod yn adeiladu ar y cynnydd a wnaed yn y blynyddoedd blaenorol a sicrhau twf pellach i aeddfedrwydd y system gynllunio yng Nghymru.
Mae’r strategaeth genedlaethol, Ffyniant i Bawb, a'r Adolygiad Seneddol interim yn dangos pa mor bwysig yw sefydliadau iechyd poblogaeth sy’n canolbwyntio ar atal, lleihau anghydraddoldebau iechyd a gweithio gyda rhanddeiliaid i fynd i'r afael ag anghenion y boblogaeth.
Mae gofynion y Fframwaith Cynllunio yn cynnwys
- Gwreiddio Deddf Llesiant Cenedlaethau'r Dyfodol (2015) ymhellach, a mabwysiadu'r egwyddorion datblygu cynaliadwy a chyfrannu at y nodau llesiant
- Ansawdd a Diogelwch – ysgogi gwelliant o ran diogelwch, canlyniadau, effeithlonrwydd a bodlonrwydd defnyddwyr gwasanaethau
- Gofal iechyd darbodus sy'n seiliedig ar werth – gofal iechyd sy'n addas ar gyfer anghenion ac amgylchiadau cleifion
- Mynediad amserol at ofal
- Integreiddio a newidiadau i systemau – osgoi gweithio heb ymwneud ag eraill a galluogi gwasanaethau ysbyty (gwasanaethau gofal eilaidd) i gael eu symud i wasanaethau lleol (gofal sylfaenol a chymunedol)
- Iechyd meddwl
- Cydweithio – hyrwyddo partneriaethau ffyniannus i sicrhau cynaliadwyedd yn y dyfodol ar lefel ranbarthol, is-ranbarthol ac ar draws y sector cyhoeddus a ffiniau eraill.
Mae’r fframwaith ar gael ar wefan Llywodraeth Cymru yn: llyw.cymru