Datganiad Ysgrifenedig - Cytundeb ar Gyflenwi Tai rhwng Llywodraeth Cymru a’r  Ffederasiwn Adeiladwyr Cartrefi

Cytundeb ar Gyflenwi Tai rhwng Llywodraeth Cymru a’r Ffederasiwn Adeiladwyr Cartrefi

Mae Llywodraeth Cymru yn cydnabod pwysigrwydd adeiladu tai yn y sector preifat, nid dim ond o ran darparu’r cartrefi y mae dirfawr eu hangen, ond hefyd o ran y manteision economaidd ehangach sy’n deillio o adeiladu tai drwy greu swyddi a thrwy’r amryfal effeithiau ar y gadwyn gyflenwi.

Yn ystod y blynyddoedd diwethaf, gwelwyd adferiad cyson yn y diwydiant tai yng Nghymru – bu cynnydd mawr o’r naill flwyddyn i’r llall yn nifer y datblygiadau newydd a ddechreuwyd a hefyd yn nifer y cartrefi newydd a adeiladwyd. Mae hynny’n newyddion da ac yn dangos yr effaith y mae polisi Llywodraeth Cymru yn ei chael drwy gynlluniau fel Cymorth i Brynu – Cymru, sydd eisoes wedi rhoi cymorth i adeiladu a gwerthu bron 1,976 o gartrefi.

Er hynny, mae’r sector ei hun a Llywodraeth Cymru yn sylweddoli bod mwy eto i’w wneud os ydym am sicrhau bod y cyflenwad o dai yn diwallu’r angen cynyddol am dai.

Yn rhinwedd fy swydd fel y Gweinidog sydd â chyfrifoldeb dros Dai, rwyf wedi datgan yn glir mai fy mlaenoriaeth i yw cynyddu’r cyflenwad o dai sydd ar gael a sicrhau bod adeiladu yn arwain at y manteision mwyaf posibl drwy greu swyddi a phrentisiaethau lleol. Bydd y Cytundeb hwn heddiw yn helpu i wireddu’r ymrwymiad hwnnw. Fe’i datblygwyd mewn partneriaeth â’r sector, gan gydweithio’n agos â’r Ffederasiwn Adeiladwyr Cartrefi.

Mae’r Cytundeb yn nodi ymrwymiadau a wnaed gan Lywodraeth Cymru a chan y Ffederasiwn Adeiladwyr Cartrefi.

Mae Llywodraeth Cymru yn ymrwymo i:

• Fynd ati i feithrin cysylltiadau gyda’r diwydiant er mwyn helpu i lywio polisi tai yn y dyfodol. 
• Nodi’r rhwystrau pwysicaf sy’n llesteirio’r gwaith o ddarparu cyflenwad o dai preifat yng Nghymru.
• Estyn cynllun Cymorth i Brynu – Cymru. 
• Bwrw ymlaen â’r agenda cynllunio cadarnhaol.
• Nodi a rhyddhau rhagor o dir sy’n eiddo i’r sector cyhoeddus er mwyn buddsoddi mewn tai preifat. 
• Datblygu polisïau newydd er mwyn annog twf yn nifer yr adeiladwyr bach a chanolig. 
• Rhannu’n canfyddiadau am y prosiectau peilot i osod systemau taenellu ac am newidiadau eraill a wnaed i’r ddeddfwriaeth rheoli adeiladu.   
• Adolygu / lleihau’r baich rheoleiddio lle bo modd er mwyn sicrhau bod Cymru yn parhau i fedru cystadlu â Lloegr.

Mae’r Ffederasiwn Adeiladwyr Cartrefi a’i aelodau yn ymrwymo i:

• Weithio mewn partneriaeth â Llywodraeth Cymru, yr Awdurdodau Lleol ac eraill i gynyddu’r cyflenwad o gartrefi newydd yng Nghymru. 
• Sicrhau’r manteision mwyaf posibl i gymunedau drwy fuddsoddi’n lleol a thrwy gyfleoedd eraill wedi’u targedu, gan gynnwys cynnig rhagor o brentisiaethau a chynlluniau hyfforddiant. 
• Helpu i ddatblygu’r agenda sgiliau adeiladu. 
• Darparu tystiolaeth fanwl a fydd yn sail i bolisi ar dai newydd ac yn ei lywio. 
• Gweithio gyda Chymdeithasau Tai i ddarparu tai fforddiadwy ar ystadau preifat.