Adam Price AS, Gweinidog Cabinet dros Fenter, Cysylltedd ac Ynni
Pan gyhoeddais benodiad Jonathan Lewis yn Gadeirydd y Panel Cynghori Arbenigol ar gyfer asiantaeth ddatblygu newydd Cymru ar 7 Gorffennaf, ymrwymais i roi'r wybodaeth ddiweddaraf i Aelodau'r Senedd am aelodaeth lawn y panel cynghori ar ôl iddo gael ei gadarnhau.
Dros y ddau fis diwethaf, rydym wedi treulio amser yn targedu a sicrhau cefnogaeth tîm talentog o arbenigwyr busnes, pob un ohonynt yn dod â'u profiadau amrywiol unigol, ond i gyd ag angerdd a pharodrwydd i gefnogi Cymru i wneud busnes, i'n cynghori ar ddylunio'r asiantaeth ddatblygu newydd.
Bydd pob un yn dod â'i arbenigedd ei hun i'n helpu i ddatblygu cylch gwaith manwl a swyddogaethau'r asiantaeth, gan ein helpu i ddylunio a chreu sefydliad sy'n cefnogi twf economaidd ein cenedl yn gyflym ac sy'n dod yn sbardun allweddol i'n cenhadaeth cynhyrchiant cenedlaethol; i haneru bwlch cynhyrchiant Cymru gyda'r DU o fewn 10 mlynedd.
Bydd gwella cynhyrchiant yn golygu canlyniad uniongyrchol o greu swyddi gwell i bobl, a thrwy hynny roi mwy o arian yn eu pocedi a chodi safonau byw.
Heddiw, rwy'n falch o gyhoeddi penodiad y panel cynghori craidd hwn, sy'n cynnwys 10 aelod arall. Mae'r grŵp craidd hwn â ffocws yn dod ag ehangder profiad, amrywiol safbwyntiau, arbenigedd Cymreig a her ryngwladol.
Mae ein haelodau panel annibynnol a'u meysydd arbenigedd wedi'u nodi isod:
Sarah Williams-Gardener OBE (Is-gadeirydd) – Aelod sefydlu Banc Starling a Chadeirydd FinTech Wales - arloesi, denu buddsoddiad a datblygu ecosystemau busnes;
John Evans – Cyn Brif Swyddog Gweithredol Subsea7 – sector ynni a phrosiectau seilwaith ar raddfa fawr;
Gerald Holtham – Athro Gwadd yr Economi Ranbarthol ym Mhrifysgol Metropolitan Caerdydd, a Phartner Rheoli yn Cadwyn Capital LLP – economeg ranbarthol, polisi cyhoeddus, cyllid a buddsoddi, gyda gwybodaeth awdurdodol am dirwedd ariannol ac economaidd Cymru;
Beren Kayali - Cyd-sylfaenydd a CTO Deploy Tech - arloesedd dan arweiniad peirianneg, masnacheiddio technoleg carbon isel a datblygu busnesau newydd;
Alison Lea-Wilson MBE – Cyd-sylfaenydd Halen Môn – twristiaeth,cychwyn busnes, datblygu, gwerthu, allforio, datblygu cynnyrch sy'n seiliedig ar le ac adeiladu brand rhyngwladol llwyddiannus;
La-Chun Lindsay OBE – Cyn Reolwr Gyfarwyddwr, GE Aviation Wales – arwain gweithrediadau rhyngwladol cymhleth ar draws diwydiannau;
Nigel Morris – Cyd-sylfaenydd Capital One a Phartner Rheoli QED Investors – cyfalaf menter a busnesau technoleg twf uchel yn fyd-eang;
Gareth Noyes – roedd ganddo amrywiaeth o rolau uwch yn Wind River Systems – strategaeth dechnolegol, arloesi, trawsnewid digidol a graddio busnesau twf uchel;
Oriel Petry – Uwch Is-lywydd Airbus UK – strategaeth ddiwydiannol, buddsoddiad rhyngwladol a gweithgynhyrchu uwch; a
Laura Doel - Ysgrifennydd Cyffredinol TUC Cymru - datblygu'r gweithlu, sgiliau, partneriaeth gymdeithasol, gwaith teg a safbwyntiau gweithwyr.
Mae aelodau’r Panel yn ymgymryd â’r swyddi yn ddi-dâl a hoffwn fanteisio ar y cyfle hwn i ddiolch iddynt am eu brwdfrydedd a'u parodrwydd i gefnogi'r llywodraeth yn yr ymdrech ganolog hon wrth i ni ymdrechu i wneud Cymru y lle gorau yn y Deyrnas Unedig i ddechrau, datblygu a buddsoddi mewn busnes.
Rydym wedi nodi'r brif weledigaeth. Bydd y panel yn ein helpu i wireddu'r weledigaeth honno, gan ein cynghori, rhoi argymhellion inni a'n herio ynglŷn â ffurf a swyddogaethau'r asiantaeth.
Ni fydd y panel yn gweithredu ar ei phen ei hun, yn hytrach bydd yn trafod yn eang a bydd yn edrych tuag allan wrth fwrw ymlaen â'i waith mewn ffordd gydweithredol. Felly, ar y cyd â'r Panel, rydym yn datblygu rhaglen o ymgysylltu â rhanddeiliaid i sicrhau mewnbwn ystod eang o leisiau ar draws tirwedd datblygu economaidd Cymru.
Edrychaf ymlaen at roi'r wybodaeth ddiweddaraf i'r aelodau ddechrau'r flwyddyn nesaf ar ôl derbyn adroddiad interim y Panel.