Mae’r canllaw hwn yn adlewyrchu darpariaethau Rhan 6 o Ddeddf Casglu a Rheoli Trethi (Cymru) 2016 (‘DCRhT’) (Penodau 1 - 7).
Cynnwys
Mae’r canllaw yn ymdrin â llog ar dreth a chosbau delir yn hwyr a threth sy’n cael ei had-dalu gan Awdurdod Cyllid Cymru (ACC).
DCRhT/4010 Llog taliadau hwyr
Bydd ACC yn codi llog ar unrhyw swm o dreth nas talwyd, gan ddechrau ar y dyddiad dechrau llog taliadau hwyr a dod i ben ar y dyddiad y caiff y swm ei dalu.
Nodir dyddiad dechrau llog taliadau hwyr ar gyfer symiau penodol o dreth yn y tabl isod:
| Swm y dreth nas talwyd | Dyddiad dechrau llog taliadau hwyr |
|---|---|
| Swm a ddatgenir mewn ffurflen dreth | Y diwrnod ar ôl dyddiad ffeilio’r ffurflen dreth |
| Swm a ddatgenir mewn ffurflen dreth sy’n cael ei diwygio gan y trethdalwr (a41, DCRhT) | Y diwrnod ar ôl dyddiad ffeilio’r ffurflen dreth |
| Swm a ddatgenir mewn hysbysiad cywiro gan ACC (a42, DCRhT) | Y diwrnod ar ôl dyddiad ffeilio’r ffurflen dreth |
| Swm a ddatgenir mewn diwygiad i ffurflen dreth gan ACC (a45 neu a50 DCRhT) | Y diwrnod ar ôl dyddiad ffeilio’r ffurflen dreth |
| Swm a ddatgenir mewn asesiad ACC (a54 neu a55 DCRhT) | Y diwrnod ar ôl dyddiad ffeilio’r ffurflen dreth |
| Swm a ddatgenir mewn dyfarniad ACC (a52 DCRhT) | Y diwrnod ar ôl y dyddiad ffeilio pan oedd yn ofynnol dychwelyd y ffurflen dreth |
| Swm a ddatgenir mewn asesiad ACC lle nad oes ffurflen dreth (a54 neu a55 DCRhT) | Y diwrnod ar ôl y dyddiad ffeilio pan oedd yn ofynnol dychwelyd y ffurflen dreth |
Gall dyddiad dechrau llog taliadau hwyr fod yn ddiwrnod nad yw’n ddiwrnod busnes. Mae’r dyddiad talu yn cynnwys y dyddiad y caiff y swm ei osod yn erbyn swm arall sy’n daladwy gan ACC.
Llog syml sy’n cael ei godi, nid adlog. Mae hyn yn golygu mai dim ond ar swm y dreth nas talwyd y bydd llog taliadau hwyr yn cael ei godi, ac nid ar log taliadau hwyr sydd eisoes wedi’i godi neu wedi cronni. Mae Rheoliadau Casglu a Rheoli Trethi (Gweinyddu) (Cymru) 2018 yn nodi cyfraddau llog taliadau hwyr. Canran y gyfradd llog a godir bob blwyddyn am dalu treth yn hwyr yw cyfradd Banc Lloegr +2.5%.
Pan delir swm i ACC, rhaid iddo roi derbynneb os gofynnir iddo wneud hynny.
Os bydd trethdalwr yn marw cyn y daw swm yn ddyledus ac yn daladwy, ac os nad yw ysgutor y trethdalwr sydd wedi marw yn gallu talu’r swm cyn cael profiant neu lythyrau gweinyddu, y dyddiad dechrau llog taliadau hwyr yw’r hwyraf o’r rhain:
- y dyddiad y byddai’r llog taliadau hwyr wedi dechrau pe na fyddai’r trethdalwr wedi marw, ac
- y diwrnod ar ôl diwedd y cyfnod o 30 o ddiwrnodau sy’n dechrau â grant profiant neu lythyrau gweinyddu.
DCRhT/4020 Llog taliadau hwyr ar gosbau
Bydd ACC yn codi llog ar swm cosb nas talwyd o’r dyddiad yr oedd yn rhaid talu’r gosb, a hynny nes y diwrnod y mae’r swm yn cael ei dalu (mae hyn yn cynnwys diwrnodau nad ydynt yn ddiwrnodau busnes). Gweler DCRhT/3040 am ragor o wybodaeth am ddyddiadau talu cosbau.
Mae ‘cosb nas talwyd’ yn golygu cosb nad yw wedi’i thalu’n llawn erbyn y dyddiad y mae’n ddyledus.
Canran y gyfradd llog a godir bob blwyddyn am dalu cosb yn hwyr yw ffigur canran y flwyddyn cyfradd Banc Lloegr + 2.5%.
DCRhT/4030 Llog ad-daliadau
Bydd ACC yn talu llog ar unrhyw ad-daliadau:
- treth
- cosbau, a
- llog (y gall fod y trethdalwr fod wedi’i dalu’n flaenorol ar y dreth neu’r cosbau).
Ym mhob achos, rhaid i unrhyw ad-daliad ymwneud â swm o drethi datganoledig neu gosbau; ni fydd ACC yn ad-dalu unrhyw symiau a dalwyd i ACC mewn camgymeriad.
Bydd llog ad-daliadau yn dechrau ar:
- y dyddiad y gwnaeth y trethdalwr y taliad, neu
- y dyddiad yr oedd y swm yn daladwy i ACC
pa bynnag sy’n hwyraf.
Gall yr dyddiad dechrau bod yn ddiwrnod nad yw’n ddiwrnod busnes
Mae llog ad-daliadau yn dod i ben ar y dyddiad y mae ACC yn gwneud yr ad-daliad.
Mae Rheoliadau Casglu a Rheoli Trethi (Gweinyddu) (Cymru) 2018 yn nodi’r cyfraddau llog ad-daliadau hwyr. Canran y gyfradd llog a ddefnyddir yw’r uchaf o:
- 0.5% y flwyddyn, neu
- gyfradd Banc Lloegr.
Llog syml sy’n cael ei dalu, nid adlog. Mae hyn yn golygu mai dim ond ar swm y dreth, y cosbau neu’r llog (ar dreth neu gosbau) y mae llog ad-daliadau’n cael ei gyfrifo, ac nid ar log ad-daliadau sydd eisoes wedi cronni.