Mae Diwrnod Chwarae Cenedlaethol yn dathlu pwysigrwydd chwarae ym mywydau plant, ac yn tynnu sylw at werth mannau chwarae hygyrch a chynhwysol i bob plentyn a pherson ifanc.
Thema eleni yw 'mannau chwarae', ac ymwelodd Ysgrifennydd y Cabinet dros Lywodraeth Leol a Thai, Jayne Bryant, ag ardal Pentref Plant ar faes yr Eisteddfod Genedlaethol yn Wrecsam.
Yn ystod ei hymweliad, gwelodd Ysgrifennydd y Cabinet drosti ei hun y gweithgareddau a'r profiadau sydd ar gael i blant yn yr Eisteddfod, gan gynnwys y cyfle i gymryd rhan mewn gweithdai, gweithgareddau creadigol a pherfformiadau.
Dywedodd Ysgrifennydd y Cabinet:
"Mae chwarae yn hanfodol i ddatblygiad, lles a hapusrwydd plant. Roedd ymweld ag ardal Pentref Plant yn yr Eisteddfod yn gyfle gwych i weld sut y gall chwarae a diwylliant ddod at ei gilydd i greu profiadau ystyrlon i blant.
"Ar Ddiwrnod Chwarae Cenedlaethol y flwyddyn hon, mae'n bwysig cydnabod y rôl hanfodol sydd gan fannau chwarae o safon yn ein cymunedau. Mae Llywodraeth Cymru yn darparu cyllid ychwanegol i awdurdodau lleol i wella meysydd chwarae oherwydd ein bod wedi ymrwymo i sicrhau, waeth beth fo'u cefndir, fod gan bob plentyn yng Nghymru fynediad at gyfleusterau chwarae rhagorol."
Dywedodd y Gweinidog Plant a Gofal Cymdeithasol, Dawn Bowden:
"Mae'n dda clywed am y gweithgareddau chwarae gwych sy'n digwydd ledled Cymru heddiw i ddathlu Diwrnod Chwarae'r DU.
"Y thema eleni yw 'mannau chwarae', ac rwy'n falch iawn ein bod wedi buddsoddi £5m y flwyddyn ariannol hon i wella ansawdd mannau chwarae a meysydd chwarae ledled Cymru.
"Mae gan blant hawl i chwarae – ac mae chwarae nid yn unig yn hwyl ond hefyd yn bwerus, ac yn cyfrannu at iechyd, hapusrwydd a datblygiad plant. Rydyn ni eisiau Cymru lle mae gan bob plentyn ddigon o gyfleoedd cyfoethog i chwarae."