Bydd y Prif Weinidog yn cynnull Uwchgynhadledd Newid yn yr Hinsawdd a Gwydnwch Cymru fore heddiw, gan ddod â phartneriaid allweddol ynghyd i ddatblygu camau gweithredu ar gyfer y dyfodol yn sgil y tanau gwyllt a welwyd yng Nghymru dros yr haf.
Bydd yr Uwchgynhadledd yn canolbwyntio ar wella dealltwriaeth o effaith tanau gwyllt a chryfhau cydweithrediad a chynlluniau i ymateb i'w bygythiad yn y blynyddoedd i ddod, gyda phwyslais ar atal.
Ymhlith y sefydliadau fydd yn cael eu cynrychioli fydd y gwasanaethau tân a'r heddlu, llywodraeth leol, ffermwyr a sefydliadau newid hinsawdd. Bydd arbenigwyr asiantaethau o'r DU ac asiantaethau rhyngwladol hefyd yn cymryd rhan yn yr Uwchgynhadledd heddiw, a chynrychiolwyr o Swyddfa'r Cenhedloedd Unedig dros Leihau Risg Trychinebau a Phwyllgor Newid Hinsawdd y DU.
Cyn yr uwchgynhadledd, dywedodd y Prif Weinidog Rhun ap Iorwerth:
“Roedd y tanau gwyllt welsom ni ym mis Gorffennaf a mis Awst yn ddinistriol i lawer o gymunedau yng Nghymru. Diolch i'n gwasanaethau tân ac achub, sefydliadau partner a chymunedau lleol, cafodd y tanau eu diffodd yn llwyddiannus gydag ychydig iawn o anafiadau.
“Ond roedd y tanau yn rhybudd difrifol o'r hyn sydd o'n blaenau ni oni bai ein bod ni'n gweithredu rŵan. Mae angen yr un ysbryd cydweithio a welsom ni dros yr haf wrth inni edrych ar y risgiau sy'n ein hwynebu ni yn y dyfodol.
“Roedd tanau’r haf hwn yn llawer mwy peryglus na'r tanau yn y gorffennol. Mi wnaeth y tonnau gwres greu toreth o danwydd sych a llosgadwy ar ein bryniau ni. A mi ddigwyddodd hynny ar frig y tymor twristiaeth a hamdden awyr agored, gan gynyddu a chynnal y risg o danau damweiniol, a thanau oherwydd diofalwch neu oherwydd camau troseddol bwriadol.
“Er na allwn ni wrthdroi'r newid yn yr hinsawdd, gallwn ni gymryd camau ymarferol i gadw'r risg o danau gwyllt mor isel â phosibl ac i sicrhau ymateb cyflym ac effeithiol i unrhyw ddigwyddiadau. Dyna pam rydyn ni wedi dod at ein gilydd ar gyfer yr Uwchgynhadledd heddiw – mae angen inni ddysgu o ddigwyddiadau'r haf yma, ac mae angen inni weithredu gyda'n gilydd.
“Nid heddiw ydy dechrau na diwedd y camau y bydd angen i ni eu cymryd, ond mi allwn ni, ac mae'n rhaid i ni, ddod i gonsensws o ran sut y byddwn ni'n cydweithio i fynd i'r afael â'r her gynyddol hon dros y blynyddoedd nesaf.”