Fframwaith profiad pobl (WHC/2024/015)

Statws:

Gwybodaeth er mwyn gweithredu.

Categori:

Ansawdd, diogelwch a phrofiad.

Teitl:

Fframwaith profiad pobl ac arolwg profiad pobl.

Dyddiad dod i ben / dyddiad adolygu:

Bydd y cylchlythyr hwn yn parhau i fod yn berthnasol hyd nes y caiff ei ddisodli gan y fersiwn nesaf yn 2028.

Angen gweithredu erbyn:

Ebrill 2025.

I’w weithredu gan:

• Prif weithredwyr ymddiriedolaethau / byrddau iechyd.
• Cyfarwyddwyr iechyd y cyhoedd ymddiriedolaethau / byrddau iechyd.
• Cyfarwyddwyr meddygol ymddiriedolaethau / byrddau iechyd.
• Cyfarwyddwyr gofal sylfaenol ymddiriedolaethau / byrddau iechyd.
• Cyfarwyddwyr gweithredol nyrsio ymddiriedolaethau / byrddau iechyd.
• Cyfarwyddwyr therapïau a gwyddorau iechyd.
• Ymddiriedolaethau / byrddau iechyd.
• Prif fferyllwyr ymddiriedolaethau / byrddau iechyd.
• Cyfarwyddwr Gweithredol Iechyd y Cyhoedd, Iechyd Cyhoeddus Cymru.
• Ymarferwyr cyffredinol, practisau deintyddol a fferyllfeydd cymunedol.

Er gwybodaeth:

• Cyfarwyddwr Cyffredinol / Prif Weithredwr y Grŵp Iechyd, Gofal Cymdeithasol a’r Blynyddoedd Cynnar.
• Dirprwy Brif Weithredwr GIG Cymru.
• Fforwm Partneriaeth GIG Cymru.
• Cyngor Ymarferwyr Cyffredinol Cymru.
• Coleg Brenhinol yr Ymarferwyr Cyffredinol.
• Y Coleg Nyrsio Brenhinol.
• Coleg Brenhinol y Bydwragedd.
• Coleg Brenhinol Pediatreg ac Iechyd Plant.
• Cymdeithas Ddeintyddol Prydain.
• Y Gymdeithas Fferyllol Frenhinol.
• Fferylliaeth Gymunedol Cymru.
• Arolygiaeth Gofal Cymru.
• Arolygiaeth Gofal Iechyd Cymru.

Anfonir gan:

• Sue Tranka, y Prif Swyddog Nyrsio, Cyfarwyddwr Nyrsio GIG Cymru.
• Richard Desir, Swyddog Nyrsio Profiad y Claf.

Enwau cyswllt yn Llywodraeth Cymru:

Ansawdd a Nyrsio,
Llywodraeth Cymru,
Parc Cathays,
Caerdydd.
CF10 3NQ.
AnsawddaNyrsio@llyw.cymru

Dogfennau amgaeedig:

• Fframwaith Profiad Pobl GIG Cymru.
• Arolwg Profiad Pobl GIG Cymru.

Trosolwg

Mae’r fframwaith cyfredol ar gyfer sicrhau profiad defnyddwyr gwasanaeth, a gyhoeddwyd yn wreiddiol yn 2013 a’i ddiweddaru yn 2015 a 2018, yn rhan o ddull gweithredu cenedlaethol ar gyfer gwella boddhad cleifion a’r ffyrdd y caiff gofal iechyd ei ddarparu. Yn y lle cyntaf, roedd y fframwaith hwn yn cynnwys set ddwyieithog o fesurau profiadau a adroddir gan gleifion a gynlluniwyd i gasglu adborth amser real ynghylch profiadau ym maes gofal iechyd.

Datblygu ac ailenwi profiad pobl

Er mwyn ceisio gwneud y fframwaith yn fwy cynhwysol a dealladwy, mae wedi’i adnewyddu a’i ailenwi yn ‘fframwaith profiad pobl’. Daw’r newid hwn yn sgil gweithgarwch ymgysylltu helaeth â sefydliadau’r trydydd sector, Llais, a chyrff y GIG. Mae’r iaith sydd wedi’i diweddaru bellach yn cydnabod bod pobl yn rhyngweithio â gwasanaethau GIG Cymru y tu hwnt i’r diffiniadau traddodiadol o “glaf” neu “ddefnyddiwr gwasanaeth”.

Elfennau’r fframwaith

Mae fframwaith profiad pobl wedi’i ehangu i gynnwys set gynhwysfawr o adnoddau a mesurau a'u nod yw gwerthuso a gwella ansawdd gwasanaethau iechyd. Mae’r elfennau allweddol yn cynnwys y canlynol:

• cwynion
• canmoliaeth
• straeon
• digwyddiadau
• arolygon profiad pobl cenedlaethol a lleol (hydredol)
• arolwg profiad pobl
• grwpiau pobl / profiad bywyd
• profiadau staff
• cydraddoldeb

Mae’r fframwaith yn hyrwyddo mabwysiadu dull gweithredu ‘ar waith bob amser’ ar gyfer ymdrin â phrofiadau gan ddefnyddio methodolegau gweithredol a goddefol. Mae hyn yn rhoi pobl yn gyntaf gan eu galluogi i rannu profiadau ar adeg a lleoliad sydd fwyaf cyfleus iddynt.

Yr offeryn hunanasesu lleol

Gwelliant pwysig i’r fframwaith yw’r ‘offeryn hunanasesu lleol’, sy’n galluogi sefydliadau i asesu eu haeddfedrwydd a’u statws unigol, creu strategaethau a chynlluniau gwella uchelgeisiol, a sicrhau dysgu parhaus. Mae’r offeryn hwn yn sicrhau bod pob agwedd ar ymbarél profiad pobl yn cael ei chynnwys mewn modd cynhwysfawr.

Addasiadau wedi COVID-19 a newidiadau deddfwriaethol

Mae’r fframwaith wedi’i ddiweddaru i adlewyrchu newidiadau mewn gwasanaethau a ddarperir wedi pandemig COVID-19 a newidiadau deddfwriaethol diweddar. Mae’n cyd-fynd yn glir â pharthau safonau ansawdd iechyd a gofal 2023 | LLYW. CYMRU, gan sicrhau ei fod yn parhau i fod yn berthnasol ac yn effeithiol.

Arolwg profiad pobl a’r broses ailenwi

Mae’r set genedlaethol o gwestiynau a mesurau craidd dwyieithog a ddilyswyd, a elwid gynt yn fesurau profiadau a adroddir gan gleifion, hefyd wedi’i hadnewyddu a’i hailenwi yn arolwg profiad pobl. Mae’r arolwg newydd hwn wedi’i brofi a’i ddilysu’n drylwyr ar draws pob lleoliad iechyd.

Mae pandemig COVID-19 wedi sbarduno newidiadau mawr yn y ffordd y caiff gwasanaethau gofal iechyd eu darparu ledled Cymru. Mae Llywodraeth Cymru a chyrff y GIG wedi cydnabod bod y newidiadau hyn wedi effeithio’n sylweddol ar sut y mae pobl yn cael gafael ar wasanaethau iechyd a’u defnyddio, sydd yn ei dro, yn effeithio ar eu profiadau. O ganlyniad, daeth yn hanfodol sicrhau bod set genedlaethol o gwestiynau craidd yn parhau i gynnwys y cwestiynau mwyaf perthnasol ar draws yr ystod amrywiol o leoliadau iechyd a'r gwahanol grwpiau poblogaeth. Mae hyn yn cynnwys nid yn unig gofal a gynlluniwyd a gofal mewn argyfwng ond hefyd, am y tro cyntaf, lleoliadau gofal sylfaenol, mamolaeth, iechyd meddwl ac anabledd dysgu.

Y camau nesaf

Ers yr hydref yn 2024, mae Gweithrediaeth y GIG a’r Tîm Unwaith i Gymru wedi sefydlu Grŵp Gorchwyl a Gorffen Cenedlaethol ar gyfer Profiad y Claf. Nod y grŵp yw arwain a helpu GIG Cymru a gweithwyr proffesiynol i gynorthwyo â’r gwaith paratoi a’r pontio cyn lansiad ffurfiol fframwaith profiad pobl ac arolwg profiad pobl ym mis Ebrill 2025. Mae’r fenter hon yn gam sylweddol ymlaen o ran gwella gofal ac ymwneud â phobl ledled GIG Cymru.

Cymorth i sefydliadau

Bydd sefydliadau ar draws GIG Cymru yn parhau i gael cymorth yn ystod y cyfnod pontio hwn. Y nod yw sicrhau bod rhanddeiliaid wedi’u paratoi’n dda ac yn hyderus i weithredu’r fframwaith a’r arolwg newydd yn effeithiol. Mae hyn yn cynnwys manteisio ar adnoddau, gan gynnwys adnoddau mewn ieithoedd heblaw y Gymraeg a Saesneg, er enghraifft, fersiynau hawdd eu deall ac Iaith Arwyddion Prydain, yn ogystal â chanllawiau i fynd i’r afael ag unrhyw bryderon neu heriau a allai godi.

Parodrwydd pobl

Bydd Gweithrediaeth y GIG yn cydweithio â Llais i hwyluso gweithgarwch rhyngweithio ac ymgysylltu â’r cyhoedd. Mae’n hanfodol cynnwys parodrwydd y cyhoedd ac addasu cymdeithasol yn y dull gweithredu newydd hwn.

Casgliad

Ers amser maith, mae GIG Cymru wedi cydnabod bod profiadau yn fesur ansawdd a diogelwch fel yr adlewyrchir yn y fframwaith sicrhau profiad defnyddwyr gwasanaeth a’r mesurau profiadau a adroddir gan gleifion a lansiwyd yn wreiddiol yn 2013. Mae’r diweddariadau a’r ailenwi diweddar i fframwaith profiad pobl ac arolwg profiad pobl yn nodi cam pwysig tuag at ddull gweithredu mwy cynhwysol, a hynny i gydnabod amrywiaeth y boblogaeth, gan sicrhau eu bod yn diwallu anghenion sy’n newid yr holl bobl sy’n defnyddio gwasanaethau GIG Cymru. Maent hefyd yn hwyluso gweithgarwch cyson ac o ansawdd o ran ymgysylltu ac adrodd ‘ar waith bob amser’.

Yn gywir,

Sue Tranka
Y Prif Swyddog Nyrsio, Cyfarwyddwr Nyrsio GIG Cymru.