Grant cerbydau di-allyriadau a seilwaith gwefru cerbydau trydan (ZEV ac EVCI): canllawiau

Mae Grant ZEV ac EVCI wedi’i gynllunio i helpu sefydliadau’r sector cyhoeddus i oresgyn y costau ymlaen llaw sy’n gysylltiedig â throsglwyddo i gerbydau di-allyriadau a seilwaith gwefru.

Trwy gefnogi cerbydau a’r seilwaith sydd ei angen i’w gweithredu, mae’r grant yn galluogi sefydliadau i:

• ddatgarboneiddio eu fflyd
• lleihau costau tanwydd a chynnal a chadw 
• dangos arweinyddiaeth o ran trafnidiaeth glân a chynaliadwy

Mae’r grant ZEV ac EVCI yn darparu cyllid ar gyfer: 

• cerbydau fflyd di-allyriadau, gan gynnwys faniau, cerbydau nwyddau trwm, bysiau mini, cerbydau cyfleustodau a cherbydau a ddefnyddir ar gyfer tasg benodol, a cherbydau ymateb arbenigol
• seilwaith gwefru cerbydau trydan y bwriedir iddo gael ei ddefnyddio’n bennaf ar gyfer fflyd
• cyfleuster storio ynni sy’n gysylltiedig â seilwaith gwefru cerbydau trydan

Mae’r cyllid yn cynnwys: 

• cyllid seilwaith: hyd at 90% o gostau seilwaith gwefru a chyfleuster storio ynni
• taliadau sefydlog: ar gael ar gyfer cerbydau lle mae’r bwlch cost rhwng cerbydau di-allyriadau a cherbydau injan hylosgi mewnol (ICE) yn fach
• cyllid llenwi bwlch: mae’n cwmpasu’r gwahaniaeth mewn pris rhwng cerbydau di-allyriadau a cherbydau ICE ar gyfer cerbydau mwy neu arbenigol.

Nod Grant ZEV ac EVCI yw: 

• cyflymu’r gwaith o ddatgarboneiddio fflydoedd cerbydau’r sector cyhoeddus yng Nghymru
• cefnogi’r broses o drosglwyddo i gerbydau di-allyriadau fel safon ar gyfer ceir a faniau ysgafn o 2025
• lleihau amlygiad i gostau tanwydd anwadal a lleihau costau rhedeg oes gyfan
• gwella ansawdd aer lleol yn y cymunedau a wasanaethir gan sefydliadau’r sector cyhoeddus
• sicrhau bod y sefydliadau sy’n cymryd rhan yn arweinwyr ym maes trafnidiaeth glân a chynaliadwy 

Cyllid cerbydau: 

• Dim ond cerbydau di-allyriadau y mae’r grant yn eu cefnogi, gan gynnwys cerbydau trydan batri a cherbydau celloedd tanwydd hydrogen
• Mae taliadau grant sefydlog ar gael ar gyfer faniau cymwys
• Mae cyllid llenwi bwlch ar gael ar gyfer cerbydau mwy o faint, arbenigol neu lai cyffredin
• Gall costau sy’n gysylltiedig ag addasiadau i gerbydau arbenigol gael eu cynnwys
• Nid yw ceir, cerbydau hybrid, cerbydau casglu gwastraff a cherbydau llogi contract yn gymwys

Seilwaith gwefru a chyfleuster storio ynni: 

• Gall hyd at 90% o’r costau cyfalaf gael eu hariannu ar gyfer seilwaith gwefru sy’n canolbwyntio ar fflyd
• Mae’r costau cymwys yn cynnwys pwyntiau gwefru, uwchraddio cysylltiad â’r grid, gwaith trydanol ar y safle, seilwaith galluogi ehangach, a blwyddyn o gostau meddalwedd swyddfa gefn
• Mae cyfleuster storio ynni yn gymwys pan mae’n uniongyrchol gysylltiedig â seilwaith gwefru cerbydau trydan
• Nid yw costau refeniw parhaus a gwariant nad yw’n gyfalaf yn gymwys
• Gall y seilwaith gwefru a ariennir trwy’r grant gael ei ddefnyddio ar gyfer cerbydau nad ydynt yn rhan o fflyd pan nad oes angen ei ddefnyddio ar gyfer y fflyd

Mae ceisiadau’n cael eu cyflwyno yn ystod rowndiau cyllido diffiniedig ac yn cael eu hasesu’n gystadleuol. 

Rhaid i ymgeiswyr gyflwyno ceisiadau ar wahân ar gyfer:

• prosiectau cerbydau di-allyriadau (ZEV)
• prosiectau seilwaith gwefru cerbydau trydan (EVCI)

Mae ceisiadau’n cael eu hasesu yn erbyn meini prawf cyhoeddedig, gan gynnwys a ydynt yn cyd-fynd ag amcanion y grant, gwerth am arian, a’r gallu i gyflawni’r prosiect o fewn yr amserlenni gofynnol. 

Bydd ymgeiswyr llwyddiannus yn derbyn llythyr cynnig grant. Dim ond gwariant yr eir iddo ar ôl dyddiad dechrau’r grant ac yn unol â’r llythyr cynnig wedi’i lofnodi sy’n gymwys i gael cyllid. 

Nid yw cyflwyno cais yn gwarantu y bydd cyllid yn cael ei roi. 

Mae’r grant ar gael i ystod o sefydliadau sector cyhoeddus sydd wedi’u lleoli yng Nghymru, gan gynnwys: 

• awdurdodau lleol
• byrddau iechyd lleol a chyrff y GIG
• gwasanaethau tân ac achub
• awdurdodau parciau cenedlaethol
• cyrff a noddir gan Lywodraeth Cymru
• prifysgolion a cholegau addysg bellach

Mae’r mathau o gerbydau sy’n gymwys yn cynnwys faniau, cerbydau nwyddau trwm, bysiau mini, cerbydau cyfleustodau a cherbydau a ddefnyddir ar gyfer tasg benodol, a cherbydau ymateb arbenigol. 

Nid yw ceir, cerbydau hybrid, cerbydau gwastraff a cherbydau a gaffaelir trwy drefniadau llogi contract yn gymwys o dan y grant hwn. 

Mae Gwasanaeth Ynni Llywodraeth Cymru ar gael i gefnogi sefydliadau trwy gydol y broses ymgeisio. 

Ar gyfer ymholiadau cyffredinol am y grant, cymhwystra, neu’r broses ymgeisio, e-bost: transport.grant@energyservice.cymru

Ar gyfer ymholiadau technegol sy’n ymwneud â cherbydau di-allyriadau neu seilwaith gwefru, e-bost: transport@energyservice.cymru