Mae Llywodraeth Cymru wedi cyhoeddi £10 miliwn o gyllid Trawsnewid Trefi ar gyfer prosiectau adfywio ledled Cymru, gyda Wrecsam yn derbyn £5 miliwn o gyfanswm y buddsoddiad.
- Mae £10 miliwn o gyllid Trawsnewid Trefi wedi'i gymeradwyo ar gyfer prosiectau adfywio ledled Cymru, gyda Wrecsam yn derbyn £5 miliwn o gyfanswm y buddsoddiad.
- Cyfarfu'r Gweinidog Cabinet dros Lywodraeth Leol, Tai a Chynllunio ag artistiaid lleol yn Nhŷ Pawb i glywed am eu profiadau o weithio a thyfu eu busnesau o fewn yr hwb greadigol.
- Mae'r cyllid hwn yn cyflawni'r blaenoriaethau a nodwyd gan y Tasglu Canol Trefi, gan helpu i greu cymunedau ledled Cymru lle mae pobl eisiau byw a gweithio, ac ymweld â nhw.
Bydd £5 miliwn hefyd yn cefnogi prosiectau ym Mrynmawr, Castell-nedd, Trefynwy, y Bala a Chasnewydd, yn ogystal â'r cynllun creu lleoedd ar gyfer De-orllewin Cymru.
Daw'r cyhoeddiad wrth i'r Gweinidog Cabinet dros Lywodraeth Leol, Tai a Chynllunio, Siân Gwenllian, ymweld â Thŷ Pawb yn Wrecsam i weld drosto'i hun effaith adfywio ar ganol y ddinas a chwrdd ag artistiaid sydd wedi'u lleoli yno.
Mae Tŷ Pawb, sy'n cynnwys cyfuniad o stondinau marchnad, gofod stiwdio a chyfleusterau oriel, wedi dod yn ganolbwynt i adfywiad diwylliannol ac economaidd Wrecsam, gan gefnogi artistiaid a masnachwyr lleol, a denu ymwelwyr i ganol y ddinas.
Ymhlith y rhai y cyfarfu'r Gweinidog Cabinet oedd Liam Stokes-Massey, artist murluniau sydd wedi bod yng nghwt bugail Tŷ Pawb ers dros chwe blynedd. Dywedodd Liam fod y gofod wedi siapio ei yrfa yn sylweddol, gan gynnig eiddo rhent isel ar y stryd fawr ochr yn ochr â chyfleoedd rhwydweithio, sgyrsiau, gweithdai a phrofiad curadu oriel.
Mae Rachel West, sy'n rhedeg The Art Bunny, wedi gweithio fel artist llawrydd yn Wrecsam ers tua 14 mlynedd ac wedi gweld y sîn greadigol leol yn trawsnewid yn ddramatig dros y pump i chwe blynedd diwethaf. Mae'n dweud fod Tŷ Pawb wedi chwarae rhan bwysig yn ei gyrfa, gan gynnwys y cyfle i baentio wal ffotograffau, cynnal ei harddangosfa unigol gyntaf, ac agor ei siop gelf ei hun yn y gofod.
Dywedodd y Gweinidog Cabinet:
Mae wedi bod yn bleser gwirioneddol ymweld â Thŷ Pawb a gweld yr effaith drawsnewidiol y mae'r gofod hwn wedi'i chael ar gymuned greadigol Wrecsam.
Mae cwrdd ag artistiaid fel Liam a Rachel wedi dangos i mi yn union beth y gellir ei gyflawni pan fyddwn yn buddsoddi yng nghanol ein trefi, nid yn unig mewn brics a morter, ond yn y bobl a'r syniadau sy'n dod â nhw'n fyw.
Bydd y £10 miliwn hwn yn helpu i adeiladu ar y gwaith gwych rydyn ni eisoes yn ei weld yn digwydd mewn llefydd fel Wrecsam, gan gefnogi busnesau lleol, rhoi hwb i'r nifer o ymwelwyr a chreu mannau y gall cymunedau ymfalchïo ynddynt. Mae hefyd yn adlewyrchu'r blaenoriaethau a nodir gan ein Tasglu Canol Trefi, sy'n helpu i sicrhau bod adfywio yn cael ei yrru gan yr hyn sydd ei angen ar gymunedau mewn gwirionedd.
Dywedodd y Cynghorydd Mark Pritchard, Arweinydd Cyngor Bwrdeistref Sirol Wrecsam:
Hoffwn ddiolch i Siân Gwenllian a Llywodraeth Cymru am gefnogi Wrecsam ac am gydnabod y potensial enfawr sydd gan y ddinas i’w gynnig.
Rydym eisoes wedi cyflawni nifer o gynlluniau adfywio mawr gyda chefnogaeth Llywodraeth Cymru, gan gynnwys y farchnad awyr agored, y Stryd Fawr, y ganolfan greadigol yn yr Hen Lyfrgell a’r amgueddfa.
Bydd y cynlluniau cyffrous sydd gennym ar gyfer Stryd Henblas, safle blaenorol yr Hippodrome a Stryd Caer yn rhan arall o’r jig-so, wrth i ni geisio helpu Wrecsam i wireddu ei wir botensial fel dinas fodern a hyderus.