Gwneud i addysg weithio i chi

Cymorth ariannol ar gyfer coleg neu chweched dosbarth

Mae mynd i'r coleg neu'r chweched dosbarth yn eich helpu i gael cymwysterau, dod o hyd i ddiddordebau newydd, gwneud ffrindiau a pharatoi ar gyfer eich gyrfa, a'r rhan orau? Mae cymorth ariannol ar gael i wneud eich taith addysgol yn fwy llyfn!

Arian y gallwch ei gael

Lwfans Cynhaliaeth Addysg

Os ydych chi'n 16 i 18 oed, efallai y byddwch chi'n gymwys i gael Lwfans Cynhaliaeth Addysg. 

Mae hwn yn rhoi £40 ichi bob wythnos i helpu gyda'ch costau addysg. Gallwch chi ei ddefnyddio ar gyfer llyfrau, cinio neu deithio. 

Gwiriwch a allwch chi gael Lwfans Cynhaliaeth Addysg ar wefan Cyllid Myfyrwyr Cymru.

Grant Dysgu Llywodraeth Cymru

Os ydych chi'n 19 oed neu'n hŷn ac yn astudio yn y coleg, efallai y byddwch chi'n gymwys i gael y grant hwn. 

Gallech chi gael hyd at £1,919 i helpu gyda chostau coleg. 

Gwiriwch a allwch chi gael Grant Dysgu Llywodraeth Cymru ar wefan Cyllid Myfyrwyr Cymru.

Y Gronfa Ariannol Wrth Gefn

Mae'r gronfa hon yn rhoi arian i fyfyrwyr sydd angen help ychwanegol. Nid oes angen ichi ei dalu'n ôl.

Gallwch chi wneud cais am arian y gronfa hon hyd yn oed os ydych chi eisoes yn cael Lwfans Cynhaliaeth Addysg neu Grant Dysgu Llywodraeth Cymru.

I gael gwybod mwy, siaradwch â'ch tiwtor neu swyddfa'r coleg.

Teithio'n rhatach ar y bysiau

Os ydych chi'n 16 i 21 oed, gallwch chi gael FyNgherdynTeithio am ddim.

Drwy ddefnyddio FyNgherdynTeithio byddwch chi'n talu tua 30% yn llai am bris y tocyn. Mae hyn yn arbed arian ichi ei wario ar bethau eraill.

Mae Llywodraeth Cymru yn arbrofi ar dâl hyd yn oed rhatach ar hyn o bryd:

  • £1 am docyn unffordd
  • £3 am docyn diwrnod

Dangoswch FyNgherdynTeithio i'r gyrrwr i gael y disgownt.

I gael rhagor o wybodaeth a gwneud cais, ewch i fyngherdynteithio.trc.cymru.

Mynd i'r brifysgol?

Os ydych chi'n mynd i'r brifysgol, mae cymorth ariannol ar gael i helpu gyda ffioedd a chostau byw.