Cyflwyno dwy wobr newydd yn ein rhaglen wrth i ni agor enwebiadau ar gyfer y Gwobrau Addysgu Proffesiynol Cymru, sy’n digwydd am y chweched tro.
Rydym yn falch iawn o gyhoeddi bod enwebiadau ar gyfer Gwobrau Addysgu Proffesiynol Cymru bellach ar agor! Eleni, rydym yn cyflwyno dau gategori newydd cyffrous, gan ehangu ymhellach ein hadnabyddiaeth o dalentau eithriadol o fewn cymuned addysgol Cymru.
Am y tro cyntaf erioed, rydym yn estyn ein gwahoddiad i'r gweithwyr proffesiynol ymroddedig mewn colegau, ochr yn ochr â'n haddysgwyr ysgol gwych. P'un a ydych chi'n athro, darlithydd, neu staff cefnogi, dyma'ch eiliad i serennu!
Wrth i hwyl yr ŵyl dawelu a’n hystafelloedd dosbarth droi’n fwrlwm o egni o’r newydd, mae’n amser perffaith i gydnabod y rhai sy’n gwneud i’n system addysg ffynnu. Mae Gwobrau Addysgu Proffesiynol Cymru yn fwy na seremoni wobrwyo; mae'n ddathliad o'r rhai sy'n mynd yr ail filltir ar gyfer dyfodol ein hieuenctid.
Dyma'ch cyfle i daflu goleuni ar y gweithwyr addysg proffesiynol mwyaf ysbrydoledig, medrus ac ymroddedig yr ydych yn eu hadnabod. Mae gennym ddeg categori amrywiol eleni, gan gynnwys: Pennaeth y Flwyddyn, Defnyddio’r Gymraeg mewn modd sy’n ysbrydoli, Athro Newydd Eithriadol, Athro’r Flwyddyn mewn Ysgol Gynradd, Gwobr y dysgwyr ar gyfer Athro/Darlithydd Gorau, Athro’r Flwyddyn mewn Ysgol Uwchradd, Cynorthwyydd Cymorth Dysgu.
Mae gwobr Betty Campbell MBE am hyrwyddo cyfraniadau a safbwyntiau cymunedau Du, Asiaidd a ethnig leiafrifol - gwobr newydd a gyflwynwyd y llynedd - hefyd yn dychwelyd, tra bod dwy wobr newydd hefyd ar gael.
Gan adlewyrchu ar ennilll Gwobr Betty Campbell MBE y llynedd, dywedodd pennaeth Ysgol Uwchradd Llanwern:
Rydym yn hynod falch o fod yr ysgol gyntaf i dderbyn y wobr hon i gydnabod y gwaith rydym yn ei wneud i wneud ysgol gynhwysol. Mae’n diolch i’n staff, llywodraethwyr, dysgwyr, rhieni a gofalwyr am eu hymrwymiad i ddathlu amrywiaeth, sydd wedi’i wreiddio’n gynhenid yn ein diwylliant o ddydd i ddydd.
Y gwobrau newydd ar gyfer 2024 yw Darlithydd y Flwyddyn, ac Ymgysylltiad Dysgwyr yn yr Ysgol/Coleg.
Bydd gwobr Ymgysylltiad Dysgwyr yn yr Ysgol/Coleg yn cael ei dyfarnu i unigolyn, tîm neu ysgol/coleg sydd wedi dangos dull rhagorol o helpu i wella ymgysylltiad a phresenoldeb dysgwyr. Gall llawer o ffactorau cymhleth a chydgysylltiedig gyfrannu at ymgysylltu â dysgwyr.
Er bod llawer ohonynt cyn COVID-19, mae'r pandemig wedi cyflwyno hyd yn oed mwy o gymhlethdodau a ffactorau yn y cyd-destun hwn. Mae cymryd rhan mewn ysgol/coleg yn effeithio ar gyrhaeddiad, lles a dinasyddiaeth, ac mae'r wobr hon yn dathlu lle mae dysgwyr wedi cael eu cefnogi yn y maes hwn.
Mynegodd Jeremy Miles, y Gweinidog dros Addysg a’r Gymraeg, ei frwdfrydedd:
Rwy’n falch iawn o agor yr enwebiadau ar gyfer Gwobrau Addysgu Proffesiynol Cymru eleni. Ers y gwobrau cyntaf yn 2016 rydym wedi derbyn cannoedd o enwebiadau yn dathlu’r goreuon ym myd addysg, ac eleni rwy’n siŵr na fydd yn eithriad.
“Mae gwella presenoldeb yn fater allweddol i mi. Rwyf wedi gweld cymaint o waith da yn hyrwyddo ymgysylltiad dysgwyr ac mae’n bwysig ein bod yn cydnabod hyn. Mae’r wobr newydd ar gyfer ‘Ymgysylltiad Dysgwyr yn yr Ysgol/Coleg’ yn rhan o’r gydnabyddiaeth honno.
Am y tro cyntaf, mae gweithwyr proffesiynol Addysg Bellach yn ymuno â'n harwyr ysgol yn y rhestr ar gyfer Gwobrau Addysgu Proffesiynol Cymru. Mae croeso i ddysgwyr, rhieni, cydweithwyr a'r cyhoedd gyflwyno enwebiadau. Mae enwebu’n syml drwy fynd i www.llyw.cymru/gwobrauaddysgu.
Mae'r enwebiadau ar agor tan 2 Chwefror 2024, gyda'r seremoni fawreddog i'w chynnal ym mis Gorffennaf. Byddwch yn rhan o'r daith anhygoel hon.
I gael rhagor o fanylion ac i enwebu, ewch i www.llyw.cymru/gwobrauaddysgu.
Ymunwch â ni gan ddefnyddio #GwobrauAddysguCymru2024 a dilynwch @LlC_Addysg am ddiweddariadau.