Gallwch enwebu pobl ar-lein – mae’r broses yn syml.
Cyhoeddwyd y cynnwys hwn dan weinyddiaeth Llywodraeth Cymru 2016 i 2021
Mae Llywodraeth Cymru wedi sefydlu Gwobrau Dysgu Proffesiynol Cymru i roi cydnabyddiaeth i’r goreuon yn eu maes mewn ysgolion o bob cwr o Gymru ac i ddathlu ymroddiad athrawon a’u gwaith caled a sut y maent yn ysbrydoli disgyblion.
Bydd pobl yn gallu enwebu pobl broffesiynol ym maes addysg, ynghyd ag ysgolion cyfan, ar gyfer y gwobrau. Caiff y buddugwyr eu cyhoeddi mewn digwyddiad arbennig yn Neuadd y Ddinas, Caerdydd, ddydd Sul 7 Mai 2017.
Gallwch enwebu pobl ar-lein – mae’r broses yn syml. Ymhlith y categorïau mae:
- Athro / athrawes y flwyddyn.
- Pennaeth y flwyddyn.
- Gwobr am hyrwyddo lles disgyblion a/neu gynhwysiant mewn ysgol.
- Gwobr am gefnogi athrawon a dysgwyr.
- Gwobr i ysgol gyfan am hyrwyddo perthynas dda â rhieni a’r gymuned.
Dywedodd Kirsty Williams:
“Mae bod yn athro’n waith anodd iawn – ond mae hefyd yn waith pwysig ofnadwy.
“Mae’r gwobrau newydd hyn yn gyfle i ddiolch i athrawon a rhoi cydnabyddiaeth i athrawon ac arweinwyr gwych.
“Felly dyna ofyn am enwebiadau: rwy’n galw ar ddisgyblion, rhieni ac ysgolion i enwebu eu hoff athrawon er mwyn inni ddathlu rhagoriaeth ym maes addysg.”
Caiff Gwobr Griffith Jones ei chyflwyno i’r enillwyr. Bu i Griffith Jones o Landdowror gyfrannu’n fawr at droi Cymru’n un o wledydd mwyaf llythrennog y byd yn y 1700au.
Bydd panel o feirniaid o bob cwr o Gymru’n cael ei ffurfio i graffu ar yr enwebiadau.