Llosgi tanwydd solet domestig

Mae llosgi domestig yn cyfeirio at losgi tanwydd solet dan do, fel pren neu lo, mewn stôf neu dân agored. Gall defnyddio stôf neu dân agored gartref gael effaith negyddol ar eich iechyd ac ansawdd aer.

Mae llosgi'r tanwyddau hyn yn rhyddhau gronynnau bach iawn sy'n gallu teithio'n ddwfn i'r ysgyfaint ac organau eraill, a elwir hefyd yn PM2.5.

Mae dod i gysylltiad â PM2.5 yn cael ei gysylltu â chlefydau anadlol a cardiofasgwlaidd, a gall gyfrannu at glefydau niwrolegol a diabetes math 2.

Dim ond yn achlysurol y mae llawer o aelwydydd yn llosgi, ond gall effaith gyfunol llawer o gartrefi sy'n gwneud hyn fod yn sylweddol.

Argymhellion ar gyfer sut i losgi'n ddiogel

Oes angen i chi losgi o gwbl? 

Os oes gennych ffordd arall o wresogi eich cartref, ceisiwch osgoi llosgi yn gyfan gwbl i leihau llygredd a diogelu eich iechyd.

Os ydych chi'n llosgi, dewiswch opsiynau glanach ar gyfer eich tanwydd a'ch stôf

Chwiliwch am labelau allyriadau isel a dewiswch gyflenwyr ag enw da. Peidiwch byth â llosgi pren gwlyb gan nad yw'n llosgi'n dda a gan ei fod yn cynhyrchu allyriadau mwy niweidiol.

Gwiriwch gyfarwyddiadau eich stôf yn ofalus

Dilynwch gyfarwyddiadau'r gwneuthurwr bob amser, gan gynnwys llosgi tanwydd addas yn unig.

Gwnewch yn siŵr bod eich stôf wedi'i gosod a'i chynnal a'i chadw'n iawn

Mae cadw'ch stôf mewn cyflwr da yn ei gwneud hi'n fwy diogel. Rydym yn cynghori bod eich simnai'n cael ei gwasanaethu gan ysgubwr simneiau proffesiynol ardystiedig bob blwyddyn.

Ystyriwch eich cymdogion 

Gall mwg grwydro felly meddyliwch am sut y gallai effeithio ar eraill.