Newidiadau i reoliadau cymorth i fyfyrwyr a diogelu ffioedd ar gyfer 2026 i 2027 (SFWIN 07/2025)

Mae'r Hysbysiad Gwybodaeth hwn yn disgrifio'r diwygiadau a gynhwysir yn y rheoliadau cymorth i fyfyrwyr a rheoliadau cysylltiedig ar gyfer blwyddyn academaidd 2026 i 2027.

Bydd Rheoliadau Addysg (Cyllid Myfyrwyr) (Diwygiadau Amrywiol) (Rhif 3) (Cymru) 2025 ("Rheoliadau 2025") yn gwneud newidiadau i'r rheoliadau hynny sy'n darparu ar gyfer cymorth statudol i fyfyrwyr a diogelu ffioedd dysgu (er mwyn i statws ffioedd cartref a ffioedd dysgu wedi'u capio fod yn gymwys). Mae'r newidiadau hyn yn berthnasol i fyfyrwyr cymwys sy'n preswylio fel arfer yng Nghymru ac sy'n dilyn cwrs addysg uwch dynodedig mewn blwyddyn academaidd sy'n dechrau ar neu ar ôl 1 Awst 2026.

Sylwer: mae'r wybodaeth a ddisgrifir yn yr hysbysiad hwn at ddibenion cyfarwyddo'n unig ac mae'n dibynnu ar Reoliadau 2025 yn cael eu gwneud yn gyfraith. Nid yw'r hysbysiad hwn yn cwmpasu pob manylyn o'r polisi ac ni ddylid ei drin fel cyngor cyfreithiol nac esboniad cyflawn o'r gyfraith.

Rydym wedi gwneud pob ymdrech i sicrhau bod yr wybodaeth yn gywir ar adeg ei chyhoeddi, ond ni ddylid dibynnu arni fel crynodeb cyflawn a chywir o Reoliadau 2025. Os bydd anghysondeb rhwng yr hysbysiad hwn a Rheoliadau 2025, Rheoliadau 2025 fydd drechaf.

Disgwylir i Reoliadau 2025 ddod i rym ym mis Rhagfyr 2025.

Gwnaeth Swyddfa Gartref Llywodraeth y DU newidiadau i'w Rheolau Mewnfudo i gynnwys cyn-filwyr unedau milwrol Gurkha a Hong Kong a ryddhawyd cyn 1 Gorffennaf 1997 fel Atodiad newydd o fewn y Rheolau Mewnfudo. Mae hyn yn darparu llwybr i setliad i bartneriaid (a phartneriaid sydd wedi dioddef profedigaeth) a dibynyddion y cyn-filwyr neu gyn-filwr sydd wedi marw hyn. O'r blaen, roedd Swyddfa Gartref y DU yn caniatáu consesiwn y tu allan i'r Rheolau Mewnfudo ar gyfer cyn-filwyr Gurkha a ryddhawyd cyn 1 Gorffennaf 1997, lle gallent wneud cais am ganiatâd amhenodol i ddod i mewn neu i aros. Nid oedd darpariaeth debyg ar gyfer cyn-filwyr o Hong Kong.

Ar hyn o bryd mae rheoliadau cymorth i fyfyrwyr a diogelu ffioedd Cymru yn gwneud partneriaid gwarchodedig (sy'n cynnwys partneriaid sydd wedi dioddef profedigaeth) yn gymwys i gael cymorth i fyfyrwyr. Mae'r cynlluniau hefyd yn gwneud darpariaeth i blentyn person o'r fath fod yn gymwys.

Bydd Rheoliadau 2025 yn ymestyn cwmpas y categori cymhwysedd partneriaid gwarchodedig i gynnwys partneriaid a phlant cyn-filwyr Gurkha a rhai o Hong Kong a ryddhawyd cyn 1 Gorffennaf 1997 ac sydd wedi marw.

Bydd y diwygiadau yn berthnasol i flwyddyn academaidd cwrs sy'n dechrau ar neu ar ôl 1 Awst 2026, a byddant yn berthnasol i fyfyrwyr israddedig ac ôl-raddedig newydd a'r rhai sy'n parhau â'u cwrs.

Ar hyn o bryd, caiff myfyrwyr sy'n ymgymryd â chwrs israddedig llawn-amser wneud cais am swm ychwanegol o ran eu benthyciad cynhaliaeth pan fydd eu blwyddyn academaidd yn ymestyn y tu hwnt i 30 wythnos a 3 diwrnod.

Ein polisi yw nad yw'r myfyrwyr hynny ar flwyddyn ryngosod neu'r rhai sy'n dilyn cyrsiau penodol sy'n gysylltiedig â'r GIG, ac sy'n cael bwrsariaeth GIG â phrawf modd ar gyfer y cwrs hwnnw, yn gymwys i gael y benthyciad cynhaliaeth ychwanegol. Mae'r GIG yn darparu cymorth ychwanegol i'w fyfyrwyr mewn blynyddoedd estynedig.

Cynyddwyd y gefnogaeth i fyfyrwyr amser llawn y GIG yn y flwyddyn academaidd 2024 i 2025 trwy sicrhau bod cyfradd lawn y benthyciad cynhaliaeth ar gael iddynt. Wrth wneud hynny, cafodd myfyrwyr bwrsariaeth y GIG a myfyrwyr blwyddyn ryngosod eu tynnu'n anfwriadol i sylw gan y rheoliadau ar gyfer y ddarpariaeth benthyciadau ychwanegol mewn blynyddoedd estynedig.

Bydd Rheoliadau 2025 yn diwygio Rheoliadau Addysg (Cymorth i Fyfyrwyr) (Cymru) 2018 ("Rheoliadau 2018") i sicrhau bod y polisi'n cael ei weithredu fel y'i bwriadwyd. Mae hyn yn golygu na fydd myfyrwyr bwrsariaeth a blwyddyn ryngosod y GIG yn cael mynediad at y benthyciad cynhaliaeth ychwanegol mewn blynyddoedd estynedig.

Bydd y diwygiadau yn berthnasol i flwyddyn academaidd cwrs sy'n dechrau ar neu ar ôl 1 Awst 2026, a byddant yn berthnasol i fyfyrwyr israddedig ac ôl-raddedig newydd a rhai sy'n parhau â'u cyrsiau.

Mae Rheoliadau 2018 yn caniatáu i fyfyrwyr â phrofiad gofal (o dan 25 oed ar ddechrau eu cwrs) sy'n astudio cwrs amser llawn neu ran-amser dderbyn uchafswm y grant cynhaliaeth heb brawf modd; mae hyn yn golygu nad yw'n ofynnol i fyfyrwyr gyflwyno manylion incwm eu haelwydydd (HHI) wrth wneud cais am y cymorth hwn. Yn yr un modd, gall myfyrwyr â phrofiad gofal (o dan 25 oed ar ddechrau eu cwrs) sy'n astudio ar gwrs amser llawn wneud cais am grant teithio heb yr angen i gyflwyno manylion incwm eu haelwydydd.

Ein polisi yw i fyfyrwyr sydd â phrofiad gofal (o dan 25 oed ar ddechrau eu cwrs) hefyd dderbyn Grantiau i Ddibynyddion (os ydynt yn berthnasol) heb yr angen i gyflwyno manylion incwm eu haelwydydd. Nid oes darpariaeth ar gyfer hyn yn y rheoliadau ar hyn o bryd.

Bydd Rheoliadau 2025 yn diwygio Rheoliadau 2018 i sicrhau bod polisi'n cael ei weithredu fel yn ôl y bwriad.

Bydd y diwygiad yn berthnasol i flwyddyn academaidd cwrs sy'n dechrau ar neu ar ôl 1 Awst 2026, a bydd yn berthnasol i fyfyrwyr israddedig newydd a phresennol, llawn amser a rhan amser.

Er mwyn bod yn gymwys i gael cymorth i fyfyrwyr a diogelu ffioedd, rhaid i berson fod â chysylltiad digon cryf a phresennol â'r DU. Rhaid i bawb sy'n dod o fewn y categorïau cymhwysedd sydd wedi'u seilio ar ddiogelu o dan y rheoliadau cymorth i fyfyrwyr a diogelu ffioedd perthnasol gael caniatâd presennol i ddod i mewn neu aros i gymhwyso fel myfyriwr cymwys. Os nad oes gan berson ganiatâd mwyach, yna bydd darpariaethau terfynu yn berthnasol a bydd ei gymhwysedd yn dod i ben (yn union cyn diwrnod cyntaf y flwyddyn academaidd y mae'r person yn gwneud cais am gymorth, neu fod cymorth i gael ei ddarparu, mewn perthynas â hi).

Mae Rheoliadau Addysg (Benthyciadau at Radd Ddoethurol Ôl-raddedig) (Cymru) 2018 a Rheoliadau Addysg (Cymorth i Fyfyrwyr) (Graddau Meistr Ôl-raddedig) (Cymru) 2019 yn cynnwys y categori cymhwysedd "personau y rhoddwyd caniatâd iddynt ddod i mewn neu aros fel partner a ddiogelir a'u plant". Fodd bynnag, mae'r ddarpariaeth terfynu cyfatebol yn absennol o'r rheoliadau hyn ar gyfer ôl-raddedigion.

Mae'r rheoliadau cymorth i fyfyrwyr ar gyfer myfyrwyr israddedig yn cynnwys y categori cymhwysedd a'r ddarpariaeth terfynu cyfatebol.

Bydd Rheoliadau 2025 yn diwygio'r rheoliadau ar gyfer ôl-raddedigion i sicrhau y gall terfynu cymorth weithredu'n gyson ar draws yr holl reoliadau cymorth i fyfyrwyr a diogelu ffioedd.

Bydd y diwygiad yn berthnasol i flwyddyn academaidd cwrs sy'n dechrau ar neu ar ôl 1 Awst 2026, a bydd yn berthnasol i fyfyrwyr ôl-raddedig newydd a'r rhai sy'n parhau â'u cwrs presennol.

Mae Rheoliadau 2025 yn gwneud nifer fach o ddiwygiadau technegol ychwanegol i wella eglurder o fewn y rheoliadau cymorth i fyfyrwyr a diogelu ffioedd, a dileu darpariaethau a cyfeiriadau nad oes eu hangen mwyach. Ceir crynodeb ohonynt isod:

Dinasyddion Wcráin a ddiogelir

Gall geiriad rhai darpariaethau o fewn y categori cymhwysedd 'gwladolion Wcráin a ddiogelir' gael eu camddehongli. Bydd Rheoliadau 2025 yn diwygio geiriad presennol y rheoliadau cymorth i fyfyrwyr a diogelu ffioedd i sicrhau dealltwriaeth glir o'r gofynion ar gyfer cymhwysedd. Yn ogystal, cyfeirir at baragraffau perthnasol yn y Rheolau Mewnfudo er gwybodaeth. Nid oes unrhyw newid i bolisi yn deillio o'r newidiadau hyn.

Benthyciadau at ffioedd colegau Rhydgrawnt

Mae'r rheoliadau cymorth i fyfyrwyr yn caniatáu i fenthyciadau ffioedd coleg gael eu darparu ar gyfer myfyrwyr sy'n ymgymryd â chwrs amser llawn dynodedig yn Rhydgrawnt sy'n arwain at gymwysterau penodol neu gwrs sy'n denu bwrsariaeth neu dyfarniad sy'n destun prawf modd a wnaed o dan adran 63 o Ddeddf Gwasanaethau Iechyd ac Iechyd y Cyhoedd 1968 neu Erthygl 44 o Orchymyn Iechyd a Gwasanaethau Cymdeithasol Personol (Gogledd Iwerddon) 1972. O'r blaen, roedd y cyrsiau hyn yn destun codi taliadau ar wahân gan y coleg a'r brifysgol sy'n darparu'r cwrs; Bellach, dim ond un tâl ffi dysgu safonol sydd. Nid oes angen y darpariaethau hyn bellach byddant yn cael eu dileu (gan gynnwys cyfeiriadau cysylltiedig).

Antilles yr Iseldiroedd

Mae'r diffiniad cyfredol o Antilles yr Iseldiroedd (Bonaire, Curaçao, Saba, Sint Eustatius, Sint Maarten) y cyfeirir ato yn y rheoliadau cymorth i fyfyrwyr a diogelu ffioedd yn anghywir. Bydd cyfeiriadau at Antilles yr Iseldiroedd o fewn rheoliadau yn cael eu disodli gan y derminoleg gywir ar gyfer tiriogaethau tramor yr Iseldiroedd.

Coronafeirws

Mae'r rheoliadau cymorth i fyfyrwyr yn parhau i gynnwys darpariaethau sy'n ymwneud â phandemig y coronafeirws, pan fo'r cwrs yn gwrs dysgu o bell. Mae'r darpariaethau hyn yn caniatáu i berson nad yw'n gallu bod yng Nghymru ar ddiwrnod cyntaf blwyddyn academaidd gyntaf y cwrs am reswm sy'n gysylltiedig â'r coronafeirws fod yn gymwys i gael cymorth i fyfyrwyr. Gan nad oes bellach gyfyngiadau teithio i'r DU nac i Gymru am resymau sy'n gysylltiedig â'r coronafeirws, nid oes angen yr holl ddarpariaethau cysylltiedig (gan gynnwys cyfeiriadau cysylltiedig) yn y rheoliadau cymorth i fyfyrwyr mwyach a byddant yn cael eu dileu. 

Gofynion diwrnod cyntaf ar gyfer myfyrwyr sydd wedi'u sefydlu ac sy'n preswylio fel arfer yn y DU

Mae rheoliadau yn darparu ar gyfer diogelu ffioedd dysgu i fyfyrwyr penodol. Bydd person ar gwrs cymwys sy'n dod o fewn 'categori sefydlog' (a gynhwysir yn Atodlen y rheoliadau diogelu ffioedd) ac sy'n bodloni'r meini prawf preswyliad perthnasol yn gymwys i gael statws ffioedd cartref a'r terfyn ffioedd dysgu. Mae'r gofynion preswyliad cyffredin a nodir yn y rheoliadau diogelu ffioedd yn glir. Fodd bynnag, mae potensial i ystyr "blwyddyn academaidd" o fewn y rheoliadau diogelu ffioedd gael ei gamddeall. Bydd Rheoliadau 2025 yn diwygio geiriad presennol y rheoliadau diogelu ffioedd i'w gwneud yn eglur mai dim ond ar ddyddiad dechrau go iawn y cwrs (er enghraifft, y diwrnod y mae blwyddyn academaidd gyntaf ei gwrs yn dechrau mewn gwirionedd) y mae angen i berson sydd wedi'i sefydlu fod yn byw yn y DU ac nid cyn hynny (hynny yw, diwrnod cyntaf y flwyddyn academaidd safonol). 1 Ionawr, 1 Ebrill, 1 Gorffennaf, 1 Medi) i fod yn gymwys i gael statws ffioedd cartref neu terfynau ffioedd dysgu. Nid oes unrhyw newid i bolisi yn deillio o'r newidiadau hyn.

Bydd y newidiadau technegol ychwanegol hyn i reoliadau yn berthnasol i flwyddyn academaidd cwrs sy'n dechrau ar neu ar ôl 1 Awst 2026.

Roedd Rheoliadau Addysg (Athrofa Brifysgol Ewrop) (Cymru) 2014 ("Rheoliadau EUI") yn darparu ar gyfer cymorth cynnal a chadw ar gyfer hyd at un myfyriwr o Gymru fesul blwyddyn academaidd i ymgymryd ag astudiaethau ôl-raddedig yn yr EUI. Fodd bynnag, daeth aelodaeth y DU o Gonfensiwn yr EUI i ben o ganlyniad i'r DU yn gadael yr Undeb Ewropeaidd. Ar ôl i'r DU roi'r gorau i'w chyfranogiad ffurfiol yn yr EUI, nid yw'r drefn reoleiddiol a ddarperir ar ei chyfer o dan Reoliadau EUI bellach yn cyd-fynd â'r trefniadau cymorth sydd eu hangen ar fyfyrwyr o Gymru. Felly, bydd Rheoliadau 2025 yn dirymu Rheoliadau EUI ac yn dileu darpariaethau cysylltiedig.

Os oes gennych ymholiadau ynghylch ceisiadau, sut i wneud cais, taliadau neu unrhyw agwedd arall ar y gwasanaeth, cysylltwch â Cyllid Myfyrwyr Cymru.

anfonwch e-bost at Os oes gennych unrhyw ymholiadau am yr Hysbysiad Gwybodaeth hwn, anfonwch e-bost at Is-adran Strategaeth a Chyllid Llywodraeth Cymru.

Mae fersiynau o'r ddogfen hon mewn print bras, Braille ac mewn ieithoedd eraill ar gael ar gais.

Rydym yn croesawu gohebiaeth yn Gymraeg neu yn Saesneg.