A494 pont Afon Dyfrdwy

Pam rydym yn ei wneud

Mae strwythur Pont Afon Dyfrdwy ar yr A494 mewn cyflwr gwael, sy'n gofyn am arolygiadau manylach a gwaith monitro ychwanegol cyn cael ei disodli..

Rydym wedi edrych ar amrywiaeth o opsiynau ac yn anelu at gyflwyno cynllun a fydd yn:

• Sicrhau bod y ffordd yn addas ar gyfer ceir, cerbydau nwyddau a thrafnidiaeth gyhoeddus
• Gwneud hi'n haws i bobl ddefnyddio opsiynau teithio mwy gwyrdd a mwy cynaliadwy fel cerdded, beicio, olwyno neu drafnidiaeth gyhoeddus fel dewis arall yn lle cerbydau modur
• Torri allyriadau carbon drwy gydol y prosiect
• Gwarchod a gwella’r bywyd gwyllt a byd natur yn lleol
• Blaenoriaethu diogelwch a lleihau effaith digwyddiadau neu gau ffyrdd
• Tarfu cyn lleied â phosib ar bethau yn ystod y gwaith adeiladu a chadw traffig i symud

Cynnydd presennol

Ar ôl ystyried yr holl ffactorau technegol, cymdeithasol, economaidd ac amgylcheddol yn ofalus - 
a gwrando ar adborth yr ymgynghoriad cyhoeddus a gynhaliwyd rhwng Rhagfyr 2024 a Mawrth 2025 – mae Ysgrifennydd y Cabinet dros Drafnidiaeth a Gogledd Cymru wedi gwneud penderfyniad.

Mae’r opsiwn a ffefrir i ddisodli Pont Afon Dyfrdwy bresennol yr A494 yn cynnwys:

• Pont newydd sbon a fydd yn cael ei hadeiladu i’r de-ddwyrain o’r bont bresennol yn cario dwy lôn o draffig a lleiniau caled i bob cyfeiriad
• Bydd gwelliannau hefyd yn digwydd ar y briffordd sy'n mynd at y bont a'r ardaloedd cyfagos, gan gynnwys llwybrau cerdded a seiclo newydd a gwell, gwaith tirlunio a nodweddion bioamrywiaeth gwell, a seilwaith priffyrdd gwell fel aliniad ffyrdd gwell, draenio, goleuadau a chyffordd newydd well.

Yn bwysig, bydd y rhan fwyaf o'r gwaith adeiladu yn digwydd i ffwrdd o'r ffordd bresennol, felly gall yr A494 aros ar agor am y rhan fwyaf o'r gwaith—gan darfu cyn lleied â phosib ar bethau.

Camau nesaf

Rydyn ni’n cynnal cyfnod ymgynghori o Dydd Mawrth, 30 Medi, tan Dydd Mawrth, 11 Tachwedd.

Nod yr ymgynghoriad hwn yw rhoi cyfle i unrhyw berson neu sefydliad gefnogi, gwrthwynebu neu awgrymu dewisiadau amgen i ddogfennau Gorchymyn drafft y cynllun.

Fel rhan o'r broses Statudol, bydd Llywodraeth Cymru yn ystyried yr holl ymatebion i'r Gorchmynion drafft ac yna'n penderfynu a ddylid cynnal Ymchwiliad Cyhoeddus Lleol.

Gweld y Gorchmynion

Mae'r holl ddogfennau ar gael i'w gweld yn yr adran Gorchmynion ar waelod y dudalen hon.

Gellir eu gweld hefyd yn bersonol rhwng dydd Mawrth, 30 Medi, a dydd Mawrth, 11 Tachwedd, yn:

Llyfrgell Glannau Dyfrdwy,
Y Ganolfan Hamdden,
Chester Road West,
Queensferry,
Glannau Dyfrdwy,
CH5 1SA

Llun i Gwener: 9am i 5pm
Sadwrn: 9am i 1.30pm

Swyddfa Cyffordd Llandudno Llywodraeth Cymru,
Sarn Mynach,
Cyffordd Llandudno,
LL31 9RZ

Llun i Gwener: 10am i 5pm

Os yw unrhyw un eisiau siarad â chynrychiolydd Llywodraeth Cymru am y prosiect, rhaid gwneud apwyntiad o leiaf 3 diwrnod gwaith cyn ymweliad. I drefnu apwyntiad, e-bostiwch A494RiverDeeBridgeConsultation@gov.wales

Digwyddiadau arddangos cyhoeddus

Rydym hefyd yn cynnal 2 arddangosfa gyhoeddus lle bydd tîm y prosiect ar gael i ateb unrhyw gwestiynau sydd gennych.

Dydd Mercher, 22 Hydref
10am i 6pm
Ty Calon, Campws Queensferry, Chester Road West, Queensferry, Glannau Dyfrdwy, CH5 1SA 

Dydd Mercher, 29 Hydref
10am i 6pm
Eglwys Sant Andrew, Sealand Avenue, Garden City, Glannau Dyfrdwy, CH5 2HN

Cyflwyno eich barn

Rhaid i unrhyw wrthwynebiadau gael eu cyflwyno’n ysgrifenedig i’r Gangen Gorchmynion cyn dydd Mawrth 11 Tachwedd 2025.

E-bostiwch Trafnidiaeth.YGangenOrchmynion@llyw.cymru neu ysgrifennwch at:

Cangen Gorchmynion,
Trafnidiaeth,
Llywodraeth Cymru,
Parc Cathays,
Caerdydd,
CF10 3NQ.

Rhaid ddefnyddio’r cyfeirnod qA2280938 a qA2282120 a nodi’r sail dros wrthwynebu.

Os ydych chi’n dymuno gwrthwynebu, cefnogi neu gyflwyno sylwadau, bydd eich gohebiaeth yn cael ei hystyried gan dîm y prosiect ac efallai y bydd angen i ni ymgynghori â phobl a sefydliadau y tu allan i Lywodraeth Cymru.

Ymgynghoriadau cyhoeddus

Fe wnaethom ni ofyn am adborth ar 5 o opsiynau oedd ar y rhestr fer, rhwng Rhagfyr 2024 a Mawrth 2025.

Yn flaenorol, cynhaliwyd ymgynghoriad cyhoeddus 12 wythnos rhwng mis Tachwedd 2018 a mis Chwefror 2019.

Amserlen

Cyhoeddi Gorchmynion drafft a datganiad amgylcheddol: hydref 2025
Cyfnod ymgynghori ar gyfer sylwadau: hydref 2025
Ymchwiliad cyhoeddus lleol:  gwanwyn/haf 2026
Penderfyniad y Gweinidog:  haf 2026
Gwneud Gorchmynion: haf 2026
Gwaith galluogi ar y safle: hydref 2026
Dechrau'r prif waith adeiladu: gwanwyn 2027
Pont newydd yn agor: hydref 2029
Dymchwel yr hen bont: gwanwyn 2030