Gwerthuso Lleoedd Lleol ar gyfer Natur: 2020 i 2025 (adroddiad terfynol)

Canlyniadau'r rhaglen: agweddau ac ymddygiadau

Fe wnaeth gwaith maes dynnu sylw at sut roedd cymryd rhan yn y rhaglen yn atgyfnerthu neu'n cryfhau agweddau cadarnhaol presennol tuag at natur i raddau helaeth.

Roedd y rhai a gymerodd ran eisoes yn ymgysylltu â mannau gwyrdd cyn iddynt gymryd rhan yn y rhaglen. O ganlyniad, nid oedd fawr o newid yn lefelau ymgysylltu'r rhai a gymerodd ran. Fodd bynnag, adroddwyd am gynnydd mewn ymddygiadau ecogyfeillgar cyffredinol o ganlyniad i ymwneud â'r rhaglen.

Canlyniadau'r rhaglen: manteision personol

Adroddwyd am ystod o fuddion personol o ganlyniad i ymwneud â'r rhaglen. Ymhlith y manteision a adroddwyd yr oedd llesiant gwell, meithrin  gwybodaeth neu sgiliau, cwrdd â phobl newydd ac iechyd corfforol gwell.

Canlyniadau'r rhaglen: pobl sydd â  mynediad cyfyngedig at fyd natur

Nododd y rhai a gymerodd ran mewn prosiectau wedi'u hanelu at y rhai sydd â mynediad cyfyngedig i natur eu bod yn teimlo'n gysylltiedig ag eraill a bod eu hiechyd wedi gwella.

Dulliau: sut a pham y cyflawnodd prosiectau ganlyniadau

Tynnodd y gwerthusiad sylw at y dulliau canlynol a oedd yn sail i'r canlyniadau a nodwyd:

• roedd alinio nodau'r prosiect â chymhelliant i gymryd rhan yn fwy tebygol o arwain at bobl yn cymryd rhan yn y prosiect
• deall pwy y mae'r prosiectau yn eu targedu a theilwra dulliau ymgysylltu yn unol â hynny
• cynnig hyblygrwydd i grwpiau a sefydliadau gyflawni prosiectau mewn ffyrdd sy'n cefnogi anghenion lleol
• cyfuno gweithgarwch ymarferol â chyfleoedd dysgu i annog rhagor o gyfrifoldeb ymhlith gwirfoddolwyr
• defnyddio gwybodaeth a phrofiad presennol grwpiau cymunedol a chefnogi'r rhai sy'n cyflawni prosiectau i feithrin capasiti
• sicrhau bod gweithgarwch ar y safle yn cael ei gynnal i sicrhau canlyniadau a gyflawnwyd