Llwybr Coedwig Cymru: Coedwig Llantrisant i Nant y Moel

Coedwig Llantrisant i Nant y Moel

Darn o’r llwybr sy’n addas i feiciau gan ddilyn Rhwydwaith Beicio Cenedlaethol 4 ac 883.

Safleoedd Coedwig Genedlaethol ar hyd y llwybr hwn

CCoetiroedd Caerdydd a Bro Morgannwg (Ynysmaerdy a Choedwig Llantrisant)
Coed Bach Dimbath
Coetiroedd Bach (Nant y Moel) oddi ar y llwybr.
Coedwig Ogwr (Nant y Moel)

Llwybr

Gan ddechrau yng Nghoedwig Llantrisant, mae mannau parcio ar gael yng Nghoed Garthmaelwg neu Donysguboriau gerllaw. Ymunwch â llwybr Coedwig Cymru drwy Rwydwaith Beicio Cenedlaethol 4.

Mae'r rhan 18km hon o'r llwybr yn dilyn Rhwydwaith Beicio Cenedlaethol 4 nes i chi gyrraedd Melin Ifan Ddu, lle mae'r llwybr yn parhau ar Rwydwaith Beicio Cenedlaethol 883.

Wrth i'r llwybr fynd tua'r gogledd o Goedwig Llantrisant, cewch olygfeydd o'r coed ffynidwydd Douglas aeddfed, yr amcangyfrifir eu bod tua 100 mlwydd oed.

Mae'r llwybr oddi ar y ffordd yn parhau ochr yn ochr ag ardaloedd coediog i Thomastown, lle mae'r llwybr wedyn yn troi i'r gorllewin tuag at y Felin Ifan Ddu gan ddilyn dyffryn coediog Nant Llanilid a Chwm Ogwr Fach.

Wrth i chi fynd i mewn i Felin Ifan Ddu, byddwch yn mynd heibio'r fynedfa i Goed Bach Dimbath; safle Coedwig Genedlaethol Cymru. Mae'r coetir llydanddail cymysg 2.3 hectar hwn yn cael ei reoli gan Cymoedd i’r Arfordir ar gyfer y gymuned leol. Gallwch gael mynediad at amwynderau lleol ym Melin Ifan Ddu, gan gynnwys parcio a gwasanaethau bysiau.

O'r fan hon, mae'r llwybr yn parhau oddi ar y ffordd tua'r gogledd i Nant y Moel gan ddilyn ardaloedd o goetir llydanddail ar hyd Ogwr Fawr, gyda golygfeydd i Goedwig Ogwr, coedwig weithredol gydag ardaloedd eang o gonwydd yn cael eu cynaeafu yn fasnachol. Mae'r llwybr yn mynd trwy Olchfeydd Ogwr; ardal goetir gymunedol, lle gallech weld adar coetir fel y Dringwr Bach.

Mae'r llwybr yn mynd trwy Fro Ogwr, gan barhau ar hyd y dyffryn coediog nes i chi gyrraedd Nant y Moel, lle gallwch gamu oddi ar y llwybr i ymweld â Choetiroedd Bach Nant y Moel. Mae’r coetir hwn a blannwyd yn 2021 yn cynnwys 25 rhywogaeth o goed brodorol.

Yn Nant y Moel mae'r llwybr yn gwyro oddi wrth Rwydwaith Beicio Cenedlaethol 883 i ddilyn llwybrau troed i goedwig Nant y Moel. Mae coedwig Nant y Moel yn rhan o Goedwig Ogwr, sy’n cael ei rheoli gan Cyfoeth Naturiol Cymru ac mae’n rhan o Goedwig Genedlaethol Cymru.

Map o’r llwybr

Efallai na fydd y map yn hygyrch i bob defnyddiwr. Os oes angen fersiwn fwy hygyrch o’r map hon arnoch, e-bostiwch digidol@llyw.cymru.

Allwedd y map

Ni fydd eitemau sydd wedi'u marcio â seren* yn weladwy nes eu bod wedi'u chwyddo i mewn ar y map.

Llwybr Coedwig Cymru Trail

Image	Coedwig Llantrisant i Nant y Moel	Image	Coedwig Genedlaethol i Gymru
Image	Llwybr Coedwig Cymru: dechrau / diwedd adran

Teithio

Image	Maes parcio	Image	Safle Bws / Coets
Image	Gorsaf Drenau	Image	Terfynell Fferi
Image	Ardal Awyrennau

Cyfleusterau

Image	Toiled Cyhoeddus	Image	Tafarn / Bwyty*
Image	Caffi*	Image	Gwesty / Lletya / Tŷ Llety*
Image	Gwyliau / Safle Gwersylla*

Ynglŷn â safleoedd y Goedwig Genedlaethol yn yr adran hon

Coetiroedd Caerdydd a Bro Morgannwg (Ynysmaerdy a Choedwig Llantrisant)

Mae Ynysmaerdy a Choedwig Llantrisant yn cael eu rheoli gan Cyfoeth Naturiol Cymru ac mae'n rhan o Goedwig Genedlaethol Cymru. Mae'r coetiroedd hyn yn blanhigfeydd conwydd yn bennaf gydag ardaloedd bach o ffawydd hynafol a safleoedd coetir hynafol a fydd yn cael eu cadw a'u hadfer yn raddol. Mae’n bosibl crwydro drwy Goedwig Llantrisant ar droed, ar gefn ceffyl neu ar feic. Mae maes parcio bach ar gael yng Nghoed Garthmaelwg.

Coed Bach Dimbath

Coetir newydd hygyrch gyda chyfleoedd i'r gymuned leol ymgysylltu â natur a dysgu amdano. Mae llawer o fentrau cyffrous wedi'u cynllunio yn y coetir hwn fel rhan o'r Grant Buddsoddi mewn Coetir (gan Lywodraeth Cymru a Chronfa Dreftadaeth y Loteri Genedlaethol) sy'n trawsnewid y coetir hwn yn safle hygyrch a reolir yn dda sy'n cynnwys y gymuned leol - gan adeiladu coetir gwydn ar gyfer y dyfodol.

Coetiroedd Bach (Nant y moel)

Plannwyd y coetir yn 2021 gan wirfoddolwyr, plant ysgol a thrigolion lleol, ac mae’r coetir 100m2 hwn yn cynnwys 25 rhywogaeth o goed. Mae safleoedd Coetiroedd Bach yn ardal newydd o goetir trwchus, brodorol sy'n dilyn dull Dr Akira Miyawaki o greu coedwigoedd. Mae hyn yn golygu coetiroedd sy’n cael eu rheoli’n dda, yn hygyrch ac yn rhoi cyfle i gymunedau fod yn rhan o’r coetir a byd natur.

Darganfyddwch fwy am Coetiroedd Bach Tiny Forest.

Coedwig Ogwr (Nant y Moel)

Mae coedwig Nant y Moel yn rhan o floc Coedwig Ogwr, sy’n cael ei reoli gan Cyfoeth Naturiol Cymru ac mae’n rhan o Goedwig Genedlaethol Cymru.

Mae Nant y Moel yn goedwig gonwydd ucheldirol sydd wedi'i lleoli ar rannau uchaf Cwm Ogwr, Pen-y-bont ar Ogwr. Planhigfa fasnachol sy'n cynnwys Sbriws Sitca, Pinwydd yr Alban ac ardaloedd bychain o goetir llydanddail cymysg.

Mae’r coetir wedi dioddef difrod gan y gwynt, lle mae stormydd diweddar wedi dadwreiddio neu dorri coed. Byddwch yn ymwybodol y bydd gwaith yn digwydd yma i adfer y difrod storm. Dilynwch arwyddion diogelwch a dargyfeiriadau ar y tir.

Eisiau gwybod mwy?

Mae Llwybr Coedwig Cymru yn cynnwys 4 adran wahanol.

Mae pob un ohonynt yn llwybrau hardd trwy safleoedd y Goedwig Genedlaethol.

Darganfod mwy