Mae'r gêm arswyd zombie boblogaidd o Gymru, Sker Ritual, yn parhau i adeiladu ar ei llwyddiant byd-eang gyda rhyddhau ei phennod ddiweddaraf, Tides of Terror, gyda chefnogaeth Llywodraeth Cymru drwy Cymru Greadigol.
Wedi'i ddatblygu gan Wales Interactive o Benarth, mae Sker Ritual yn gêm arswyd ddychrynllyd am saethu zombies wedi'i hysbrydoli gan lên gwerin Cymru; gêm oedd yn hynod boblogaidd o'r cychwyn cyntaf pan lansiwyd hi ym mis Ebrill 2024.
Cyrhaeddodd y gêm y siartiau hapchwarae byd-eang ar unwaith, gan gyrraedd y 3 uchaf ar Steam, y 5 uchaf ar Xbox a'r 10 uchaf ar PlayStation, gan gadarnhau ei lle fel un o gemau cyfrifiaduron a chonsolau mwyaf poblogaidd y byd ar y lansiad ac yn llwyddiant mawr i Gymru.
O ganlyniad i'w llwyddiant cychwynnol, edrychodd Wales Interactive beth allai fod yn bosibl ar gyfer dyfodol bydysawd Sker Ritual, a daeth y cwmni gemau cyntaf i dderbyn Cyllid Cynhyrchu Cymru Greadigol, gan eu galluogi i adeiladu pennod nesaf y gêm: Tides of Terror, ehangiad egniol sy'n cyflwyno agweddau newydd ar chwarae y gêm, gan gynnwys map ffres, cenhadaeth newydd, gelynion newydd a nodweddion fel sgwrs llais, modd trydydd person, traws-chwarae a gemau arferol.
Mae Cyllid Cynhyrchu yn gynllun Cymru Greadigol sydd wedi'i gynllunio i gefnogi twf Cymru fel cyrchfan ar gyfer cynnwys o'r safon uchaf. Mae'n darparu cymorth ariannol i gwmnïau ffilm, teledu, gemau ac animeiddio yng Nghymru sy'n datblygu cynyrchiadau o ansawdd uchel ac eiddo deallusol gwreiddiol ar gyfer cynulleidfaoedd rhyngwladol.
Mae'r gronfa yn blaenoriaethu prosiectau sy'n creu cyflogaeth hirdymor â sgiliau, yn hyrwyddo cynaliadwyedd a lles yn y sector cynhyrchu, ac yn arddangos diwylliant, iaith a daearyddiaeth Cymru.
Wedi'i ryddhau fesul cam dros y flwyddyn ddiwethaf, daeth cyflwyno Tides of Terror i ben mewn penwythnos treialu am ddim diweddar a welodd ymgysylltiad cryf gan chwaraewyr, gyda Sker Ritual eisoes yn pasio'r marc 2 filiwn o chwaraewyr. Daeth hyn â chyfanswm y lawrlwythiadau ar draws masnachfraint Sker i 11 miliwn ledled y byd, carreg filltir arwyddocaol arall i'r sector gemau yng Nghymru.
Diolch i'r cyllid cynhyrchu, roedd Wales Interactive hefyd yn gallu buddsoddi yn y genhedlaeth nesaf o dalent, gan greu 12 lleoliad i hyfforddeion ar draws rhaglennu, peirianneg sain a sicrhau ansawdd. Roedd y lleoliadau hyn yn cynnig profiad ymarferol, go iawn yn y diwydiant i ddatblygu gyrfa yn gynnar yn un o stiwdios blaenllaw Cymru.
Meddai Dr David Banner MBE, Prif Swyddog Gweithredol a Chyd-sylfaenydd Wales Interactive:
Mae'n wych gweld cefnogaeth barhaus Cymru Greadigol i ddiwydiant Gemau Cymru ac rydym wrth ein boddau mai ein prosiect Maid of Sker 2 fydd y gêm fideo gyntaf i dderbyn cyllid cynhyrchu. Rydym hefyd yn falch iawn o fod wedi helpu i feithrin talent newydd gydag uchelgeisiau ar gyfer gyrfaoedd yn y diwydiant gemau. Mae Wales Interactive wedi dod yn un o arweinwyr byd-eang ein maes, gan werthu miliynau o gemau fideo a ffilmiau rhyngweithiol ledled y byd, a bydd y gefnogaeth hon gan Lywodraeth Cymru yn chwarae rhan bwysig yn ein llwyddiant a'n twf yn y dyfodol."
Meddai Jack Sargeant, Gweinidog y Diwydiannau Creadigol:
Mae llwyddiant Sker Ritual yn dangos pa mor bwerus y gall llên gwerin Cymru a thalent Cymru fod gyda chwaraewyr ledled y byd - ac mae'r ymateb i Tides of Terror wedi bod yn arbennig o drawiadol.
"Rwy'n falch iawn bod Llywodraeth Cymru wedi gallu cefnogi Wales Interactive drwy gynllun Cyllido Cynhyrchu Cymru Greadigol. Nod y gronfa yw helpu busnesau yn y sector i dyfu, creu swyddi a chreu cyfleoedd newydd — a phan fydd stiwdio fel Wales Interactive yn mynd i’r lefel nesaf, mae talent creadigol Cymru hefyd yn gwella.
"Rydym yn falch o fod wedi cefnogi Wales Interactive ar hyd eu taith ddatblygu, ac rwy'n annog datblygwyr eraill ledled Cymru i edrych ar y gefnogaeth sydd ar gael i ddod â'u syniadau eu hunain yn fyw. Dymunaf pob llwyddiant i Wales Interactive wrth i fydysawd Sker barhau i dyfu."
I ddarganfod mwy am Gyllid Cynhyrchu Cymru Greadigol, cliciwch yma.
