Mabon ap Gwynfor AS, Gweinidog Cabinet dros Iechyd a Gofal
Mae'r fframwaith goruchwylio ac uwchgyfeirio, a gyhoeddwyd ym mis Gorffennaf 2025 gan y Llywodraeth flaenorol, yn galluogi sefydliadau'r GIG i gael eu hisgyfeirio'n awtomatig pan fyddant yn cyrraedd trothwyon penodol, a phan fo hyder bod cynlluniau cadarn ar waith i gynnal y gwelliant hwn.
Gallaf gadarnhau bod Bwrdd Iechyd Prifysgol Bae Abertawe yn cael ei isgyfeirio heddiw i lefel 1 ar gyfer perfformiad a chanlyniadau mewn perthynas â Gwasanaethau Iechyd Meddwl Plant a Phobl Ifanc (CAMHS). Mae perfformiad y bwrdd iechyd wedi gwella, ac wedi cael ei gynnal, dros y tri mis diwethaf. Mae hyn yn unol â'r meini prawf isgyfeirio a osodwyd ar ei gyfer.
Mae'r bwrdd iechyd yn parhau i fod o dan fesurau uwchgyfeirio lefel 4 ar gyfer cyllid, strategaeth a chynllunio; gwasanaethau mamolaeth a newyddenedigol; a pherfformiad a chanlyniadau mewn perthynas â chanser, heintiau a gafwyd yn yr ysbyty, a gofal brys ac argyfwng. Mae'r bwrdd iechyd hefyd o dan fesurau uwchgyfeirio lefel 3 ar gyfer gofal a gynlluniwyd.
Hoffwn ddiolch i'r sefydliad ac i'r timau clinigol am eu ffocws miniog ar wella mynediad amserol a gofal iechyd meddwl i blant a phobl ifanc.
Mae statws uwchgyfeirio diwygiedig y sefydliad hwn i'w weld ar dudalen we trefniadau cynyddu ac ymyrraeth GIG Cymru.
Cyhoeddir y datganiad hwn yn ystod y toriad er mwyn rhoi'r wybodaeth ddiweddaraf i'r Aelodau. Os bydd yr Aelodau am imi wneud datganiad pellach, neu ateb cwestiynau ynghylch hyn pan fydd y Senedd yn dychwelyd, byddwn yn hapus i wneud hynny.