Diolch i raglen dair blynedd wedi’i hariannu gan Lywodraeth Cymru, bydd pobl ifanc ledled Cymru yn cael cyfleoedd newydd i ddod i gysylltiad uniongyrchol â’r gwleidyddion sydd wedi’u hethol i’w cynrychioli.
Mae Grant Ymgysylltu â Democratiaeth Llywodraeth Cymru yn darparu £400,000 bob blwyddyn i gefnogi cyfleoedd parhaus yn y gymuned i ennyn diddordeb pobl mewn democratiaeth, ac i sicrhau bod mwy o gyfle i unigolion gymryd rhan mewn democratiaeth dros y tymor hir. Ers ei lansio ym mis Chwefror 2023, mae’r grant wedi cefnogi 30 o sefydliadau sy’n cyflwyno 42 o brosiectau dros Gymru gyfan.
Yn ddiweddar, mae un o'r sefydliadau hyn, The Politics Project, wedi cael £357,060 a fydd yn cael ei ddarparu dros dair blwyddyn ariannol i gyflwyno sawl gweithgaredd gwahanol i gysylltu pobl ifanc â'r gwleidyddion sy'n eu cynrychioli. Mae ei raglen Deialog Ddigidol flaenllaw yn hwyluso sgyrsiau rhwng disgyblion ysgol â chynghorwyr lleol, Aelodau'r Senedd, Aelodau Seneddol trwy sesiynau rhyngweithiol rheolaidd.
Maent hefyd yn cyflwyno digwyddiadau Deialog Arweinydd blynyddol, gan roi cyfle prin i fyfyrwyr ofyn cwestiynau'n uniongyrchol i ffigurau gwleidyddol cenedlaethol, yn ogystal â hyfforddiant a chefnogaeth i ysgolion a cholegau i drefnu a threfnu hustyngau ieuenctid, ar gyfer eu myfyrwyr, ar gyfer Etholiadau Senedd 2026.
Yn ddiweddar, aeth Jayne Bryant, Ysgrifennydd y Cabinet dros Lywodraeth Leol a Thai, ar ymweliad ag Ysgol y Bont-faen a chymryd rhan mewn sesiwn holi ac ateb gyda disgyblion sy’n cymryd rhan yn y rhaglen.
Ar ôl ei hymweliad, dywedodd Ysgrifennydd y Cabinet:
“Mae democratiaeth yn ffynnu pan fydd pobl ifanc yn cael eu grymuso i ofyn cwestiynau, herio syniadau, ac yn gweld eu hunain yn cael eu cynrychioli yn y penderfyniadau sy’n cael eu gwneud.
“Mae’r rhaglen hon yn gam pwerus tuag at ennyn diddordeb unigolion mewn cymryd rhan mewn bywyd dinesig gydol eu hoes a sicrhau bod pob llais yng Nghymru yn cael ei glywed.”
Dywedodd Ian Pope, Pennaeth Rhaglen yn The Politics Project:
“Diolch i Ysgol y Bont-faen a Jayne Bryant am sesiwn Deialog wych. Roedd y cwestiynau gan y dysgwyr yn graff ac yn dreiddgar ac roedd yn wych gweld pobl ifanc yn cymryd mantais lawn o’r cyfle. Mae Politics Project am wneud yn siŵr y bydd pob person ifanc yn gallu cael y cyfle pan fyddan nhw yn yr ysgol i gynnal sgwrs ystyrlon â gwleidydd ac i feithrin cysylltiadau cadarnhaol. Rydyn ni wir yn gwerthfawrogi cefnogaeth Ysgrifennydd y Cabinet a Llywodraeth Cymru i’n helpu i gyrraedd y nod hwnnw.”