Prydau Ysgol am ddim i holl blant Ysgolion Cynradd (UPFSM)

Bydd pob plentyn ysgol gynradd yng Nghymru yn cael prydau ysgol am ddim erbyn 2024. Mae’r ymrwymiad hwn mewn ymateb i’r pwysau cynyddol o ran costau byw ar deuluoedd a’n huchelgeisiau o fynd i’r afael â thlodi plant a sicrhau nad oes unrhyw blentyn yn mynd heb fwyd yn yr ysgol. Mae Llywodraeth Cymru wedi ymrwymo i roi’r cynllun ar waith cyn gynted â phosibl.

Mae manteision ehangach hefyd i brydau ysgol am ddim, gan gynnwys hybu bwyta’n iach ar draws yr ysgol, cynyddu’r amrywiaeth o fwyd y gall dysgwyr ei fwyta, gwella sgiliau cymdeithasol amser bwyd, yn ogystal â gwella ymddygiad a chyrhaeddiad.

Mae’r polisi yn rhan o’r Cytundeb Cydweithio rhwng Llywodraeth Cymru a Phlaid Cymru, a fydd yn ymestyn prydau ysgol am ddim i holl blant ysgolion cynradd dros y tair blynedd nesaf.

Bydd y mwyafrif o awdurdodau lleol yn gallu dechrau darparu prydau ysgol am ddim i Ddosbarthiadau Derbyn o ddechrau tymor yr Hydref, Medi 2022 ac ymestyn y cynnig i Flynyddoedd 1 a 2 erbyn dechrau tymor yr Haf, Ebrill 2023 fan bellaf. Yr amserlen arfaethedig yw:

• Medi 2022 - holl ddysgwyr Dosbarthiadau Derbyn yn cael cynnig prydau ysgol am ddim
• Ebrill 2023 - cynnig prydau ysgol am ddim i holl ddysgwyr Dosbarthiadau Derbyn, Blwyddyn 1 a Blwyddyn 2
• gall ysgolion sy'n gallu dosbarthu prydau ysgol am ddim i ddysgwyr ym Mlynyddoedd 1 a 2 (yn ogystal â'r Dosbarth Derbyn) wneud hynny o fis Medi

Bydd y wybodaeth a ddarperir gan eich awdurdod lleol yn nodi pa mor gyflym y bydd prydau ysgol gynradd am ddim yn cael eu cyflwyno yn ysgol eich plentyn.

Mae cyfleusterau arlwyo pob ysgol yn wahanol. Bydd angen amser ar rai ysgolion cynradd i baratoi a threfnu’r gwaith ymlaen llaw sydd ei angen i feithrin capasiti arlwyo. Mae gwaith yn cael ei wneud mewn llawer o ysgolion cynradd fel bod ceginau yn gallu darparu ar gyfer nifer sylweddol uwch o blant i dderbyn prydau ysgol.

Bydd angen i chi gofrestru eich plentyn ar gyfer prydau ysgol am ddim a bydd y wybodaeth yma’n cael ei darparu gan ysgol neu Awdurdod Lleol eich plentyn dros y misoedd nesaf.

Er mwyn i ysgol eich plentyn gyfri cyfanswm nifer uwch y plant sydd angen prydau ysgol, efallai y gofynnir i chi gofrestru. Gallwch fod yn dawel eich meddwl na fydd budd-daliadau cysylltiedig eraill yn cael eu heffeithio.

Ni fydd gweithredu’r cynllun cyffredinol yn effeithio ar blant hŷn sy’n derbyn neu’n gymwys i wneud cais am bryd ysgol am ddim ar hyn o bryd.

Am fwy o wybodaeth, cysylltwch â'ch awdurdod lleol.