Rhaglen gwerth £56 miliwn i atgyfnerthu amddiffynfeydd llifogydd ac arfordirol Cymru

Mae'r rhaglen Rheoli Perygl Llifogydd ac Erydu Arfordirol wedi'i blaenoriaethu ar sail risg, gan ystyried ffactorau fel tebygolrwydd ac effaith llifogydd, digwyddiadau blaenorol, nifer yr eiddo a fydd yn elwa ar y gwaith a manteision ehangach y cynllun. 

O safbwynt y cam adeiladu'n unig, mae disgwyl i dros 6,500 o eiddo elwa ar y cynlluniau sydd ar y gweill ar gyfer 2018-19. 

Bydd awdurdodau lleol a Cyfoeth Naturiol Cymru yn derbyn cyllid ar gyfer cyflwyno cynlluniau rheoli perygl llifogydd er mwyn gwarchod pobl, eiddo a busnesau. Bydd manteision ehangach hefyd ynghlwm wrth lawer o'r cynlluniau gan gynnwys gwelliannau i gynefinoedd, manteision o ran hamdden a lleihau perygl i'r seilwaith. 

Caiff y cyllid ei ddefnyddio ar gyfer cwblhau gwaith adeiladu prosiectau newydd a phrosiectau presennol, yn ogystal â chwmpasu a chynllunio cynlluniau at y dyfodol.  Cafodd y rhaglen newydd ei datblygu ar y cyd â chynrychiolwyr o Lywodraeth Cymru, Cyfoeth Naturiol Cymru, Cymdeithas Llywodraeth Leol Cymru, yr awdurdodau lleol, Dŵr Cymru a'r Sefydliad Peirianwyr Sifil.

Ymysg y cynlluniau newydd ar raddfa fawr a fydd yn cychwyn mae: 

• Amddiffynfeydd llifogydd Machynys yn Llanelli 
• Lecwydd yng Nghaerdydd
• Gwaith ar lanw'r Afon Cadoxton 
• Llansannan a Mochdre yng Nghonwy
• Llanberis yng Ngwynedd 
• Llanmaes ym Mro Morgannwg 
• Parc yr Onnen yn Aberystwyth 
• Cronfa Ddŵr Llyn Tegid, Gwynedd

Cyhoeddodd Llywodraeth Cymru yr wythnos ddiwethaf hefyd gynlluniau ar gyfer Canolfan Monitro Arfordirol Cymru a fydd yn cyfrannu at benderfyniadau ynghylch cynlluniau addasu arfordirol a chynlluniau posibl ar lefel genedlaethol. 

Gydol tymor y Cynulliad hwn mae Llywodraeth Cymru'n bwriadu neilltuo gwerth £151 miliwn o fuddsoddiad cyfalaf ar gyfer gweithgareddau rheoli perygl Cyfoeth Naturiol Cymru ac awdurdodau lleol. Ar y cyd â'r Rhaglen Rheoli Perygl Arfordirol, mae hyn yn cynrychioli buddsoddiad posibl o dros £263 miliwn mewn cynlluniau llifogydd ac arfordirol gydol cyfnod y Llywodraeth hon.
Dywedodd y Gweinidog:

"Gall llifogydd gael effaith ddifrifol ar fywydau pobl. Mae'r cyllid hwn yn tystio ymhellach i'n hymrwymiad i leihau perygl a sicrhau cydnerthedd o safbwynt llifogydd ac erydu arfordirol. "Rydym yn buddsoddi mewn cynlluniau newydd a gwaith cynnal a chadw ar raddfa fawr ar draws Cymru. Rwyf hefyd wedi gwarchod cyllideb Cyfoeth Naturiol Cymru ar gyfer gweithgareddau rheoli perygl llifogydd dros y flwyddyn ariannol nesaf, ac wedi ymrwymo i gyllido Canolfan Monitro Arfordirol newydd Cymru a fydd yn gwella ein dealltwriaeth o brosesau arfordirol ac yn cyfrannu at well penderfyniadau. "Mae'n bleser gen i gyhoeddi'r rhaglen uchelgeisiol hon a fydd yn cefnogi cymunedau ac ardaloedd ar draws Cymru sy'n wynebu'r peryglon mwyaf o safbwynt llifogydd ac erydu arfordirol."