Mae adeilad hanesyddol rhestredig Gradd II yng nghanol tref Aberteifi wedi cael ei adfer yn llwyr, ac mae'r cyfleusterau wedi cael eu hatgyweirio a'u diweddaru.
Bydd Neuadd y Farchnad yn Aberteifi, sydd newydd gael ei hadnewyddu, yn cynnig cynaliadwyedd i'r masnachwyr yn yr hirdymor, yn cynnig profiadau manwerthu a bwyta unigryw, ac yn rhoi hwb i'r economi leol.
Mae'r prosiect adfywio strategol wedi cael cymorth drwy'r grant Creu Lleoedd o dan y rhaglen Trawsnewid Trefi a'r rhaglen Adeiladu ar gyfer y Dyfodol.
Yn ddiweddar, cafodd Julie James, Ysgrifennydd y Cabinet dros Dai, Llywodraeth Leol a Chynllunio, y pleser o ymweld â'r farchnad lle dywedodd:
Drwy hoelio sylw ar gyfleusterau cymunedol, ar wella profiadau ymwelwyr, gwneud lleoedd yn fwy cofiadwy, a chyfrannu at iechyd a lles, mae Neuadd Farchnad Aberteifi yn ymgorffori'r hyn rydym ni'n ceisio'i gyflawni yng nghanol ein trefi ym mhob cwr o Gymru.
Dw i'n ddiolchgar am y cyfle i weld yn llygad y ffynnon sut mae'n grant Creu Lleoedd dan y rhaglen Trawsnewid Trefi wedi cael ei ddefnyddio i helpu i weddnewid neuadd y farchnad, a dw i'n edrych 'mlaen at gael ei hagor ym mis Mehefin.
Dywedodd y Cynghorydd Clive Davies:
Mae hwn yn un o'r prif brosiectau yn Aberteifi sydd wedi bod yn elwa o gyllid y rhaglen Trawsnewid Trefi a buddsoddiad cyfalaf gan Gyngor Sir Ceredigion'.
Gall adeiladau treftadaeth fod yn eithaf costus i'w hadnewyddu, a heb y cymorth hwn, fydden ni ddim wedi gallu sicrhau bod y dref yn cael defnyddio'r ganolfan hon unwaith eto.
Mae'r farchnad yn berl go iawn a bydd yn denu busnesau newydd ac yn annog y gymuned fusnes sydd gennym yn Aberteifi eisoes i ddod 'nôl yma.”