Strategaeth Ganser Genedlaethol ar gyfer Cymru

Mae Llywodraeth Cymru wrthi'n datblygu Strategaeth Ganser Genedlaethol newydd ar gyfer Cymru. Nod y strategaeth yw gwella'r canlyniadau i bobl sy'n cael eu heffeithio gan ganser yng Nghymru, a'u profiadau.

Wrth sôn am ganlyniadau o ran canser, yr hyn a olygir yw am ba mor hir y bydd pobl yn goroesi ar ôl diagnosis o ganser, a nifer y bobl sy'n marw o ganser bob blwyddyn.

Rydym am glywed sylwadau, sy'n seiliedig ar dystiolaeth, gan bobl a sefydliadau yng Nghymru, am ddyfodol gofal canser. 

Byddwn yn defnyddio'r ymatebion i'r alwad am dystiolaeth fel sail i'r strategaeth. Byddwn yn cyhoeddi crynodeb o'r ymatebion ochr yn ochr â'r strategaeth derfynol.

Gall ymatebion dynnu ar brofiad personol, arbenigedd proffesiynol, tystiolaeth ymchwil, neu safbwyntiau sefydliadau. 

Rhowch dystiolaeth, enghreifftiau ac argymhellion lle bo'n bosibl. Os gallwch, cyfeiriwch at dystiolaeth sy'n cefnogi eich barn, neu darparwch hyperddolen. Ymhlith yr enghreifftiau o dystiolaeth a fyddai'n ddefnyddiol mae ymchwil a gyhoeddwyd, data cymharol rhyngwladol, gwerthusiadau o wasanaethau, archwiliadau clinigol, tystiolaeth o gynllunio'r gweithlu, a mesurau profiad a adroddwyd gan gleifion. Fodd bynnag, nid yw’r rhestr hon yn hollgynhwysfawr.

Os nad oes gennych dystiolaeth, bydd eich barn yn dal i gael ei hystyried.