Sut bydd y rhaglen yn helpu'r sector iechyd a gofal cymdeithasol i ymateb i'r argyfwng hinsawdd.
Cynnwys
Y cefndir a'r cyd-destun
Yn 2019, gwnaethom ddatgan argyfwng hinsawdd yng Nghymru. Roeddem am sbarduno mwy o ffocws a mwy o weithredu i gwrdd â'r heriau a ddaw yn sgil yr argyfwng hinsawdd.
Mae gan Gymru darged cyfreithiol rwymol i gyflawni allyriadau sero net erbyn 2050. Rydym hefyd wedi nodi uchelgais i’r sector cyhoeddus yng Nghymru gyrraedd nod sero net erbyn 2030.
Mae dau ymateb i'r argyfwng hinsawdd:
- lliniaru: cynyddu dalfeydd a lleihau ffynonellau nwyon tŷ gwydr
- addasu: y broses o addasu i’r hinsawdd wirioneddol neu’r hinsawdd ddisgwyliedig a’i heffeithiau
Mae llawer o waith ar y gweill i'n helpu i gynllunio sut y gallwn leihau ein hallyriadau carbon yn y sector iechyd a gofal cymdeithasol. Mae hyn yn cynnwys y canlynol:
- mae’r cynllun cyflenwi strategol ar gyfer datgarboneiddio GIG Cymru yn nodi mentrau i leihau allyriadau yn y GIG
- mae ffyniant i bawb: Cymru sy'n effro i'r hinsawdd yn darparu cynllun 5 mlynedd ar gyfer addasu rhwng 2020 a 2025
- map trywydd datgarboneiddio gofal cymdeithasol yng Nghymru
- fframwaith Gofal Sylfaenol Gwyrddach
Y rhaglen
Fe wnaethom sefydlu'r rhaglen genedlaethol iechyd a gofal cymdeithasol i daclo'r argyfwng hinsawdd yn ystod hydref 2021. Nod y rhaglen yw darparu goruchwyliaeth strategol ar gyfer ymateb y sector iechyd a gofal cymdeithasol i'r argyfwng hinsawdd.
O fewn y rhaglen mae 5 bwrdd prosiect cenedlaethol:
- trafnidiaeth a chaffael
- adeiladau, ystadau a chynllunio tir
- ymagwedd at ofal iechyd
- gofal cymdeithasol
- cynlluniau addasu
Mae gan y rhaglen £2.4 miliwn o gyllid refeniw dros 3 blynedd i:
- gefnogi prosiectau ar draws y sector sy'n cyfrannu at leihau allyriadau
- helpu'r sector i addasu i effeithiau'r newid yn yr hinsawdd
Adrodd ar allyriadau a chynlluniau datgarboneiddio
Amcangyfrifwyd bod ôl troed carbon GIG Cymru yn 2018/2019 yn 1,001,378 tCO2e. Mae hyn oddeutu 2.6% o gyfanswm yr allyriadau yng Nghymru.
Mae sefydliadau GIG Cymru yn adrodd am allyriadau bob blwyddyn i'r canllaw adrodd sero net.
Mae data ac argymhellion sero-net y sector cyhoeddus yn darparu'r amcangyfrifon diweddaraf ar gyfer allyriadau carbon.
Mae gan bob un o gyrff y GIG gynlluniau gweithredu ar gyfer datgarboneiddio, sy'n nodi:
- sut y byddant yn lleihau allyriadau
- sut y byddant yn cyfrannu at gyflawni'r cynllun cyflenwi strategol ar gyfer datgarboneiddio
Gwybodaeth ychwanegol
I ddarganfod mwy am y rhaglen genedlaethol iechyd a gofal cymdeithasol i daclo'r argyfwng hinsawdd:
- gwyliwch ein fideo esboniadol i ddarganfod mwy am ein nodau a'n hamcanion
- cofrestrwch i dderbyn ein newyddlen
- cysylltwch â thîm y rhaglen yn HSC.ClimateEmergency@llyw.cymru
- ewch i Iechyd Gwyrdd Cymru i ddysgu am y rhwydwaith ar gyfer iechyd a gofal cynaliadwy yng Nghymru
Llywodraeth Cymru'n mynd i'r afael â'r newid yn yr hinsawdd
Mae llawer o waith ar y gweill ar draws Llywodraeth Cymru i frwydro yn erbyn effeithiau'r newid yn yr hinsawdd.
Ewch i Gweithredu ar Hinsawdd Cymru i weld sut y gallwch chi gymryd rhan.